ଭୁବନେଶ୍ୱରରେ ହେମାମାଳିନୀଙ୍କ ପ୍ରଚାର: କହିଲେ, ୨୫ ବର୍ଷ ହେବ ଗାଦି ମାଡିବସିଛି ବିଜେଡି, ଯାହା ବିକାଶ ହେବା କଥା ହୋଇନି

କନକ ବ୍ୟୁରୋ: ଭୁବନେଶ୍ୱର ସାଲିଆ ସାହିରେ ବିଜେପିର ଆଶୀର୍ବାଦ ସଭା । ସଭାରେ ଯୋଗଦେଲେ ହେମାମାଳିନୀ । ବିଜେପି ପ୍ରାର୍ଥୀଙ୍କ ପାଇଁ ପ୍ରଚାର କରିବା ସହ ଭୋଟ ମାଗିଲେ । ସେହିପରି ଭୁବନେଶ୍ୱରରେ ରାଜ୍ୟସରକାରଙ୍କ ବିଫଳତା କଥା କହିବା ସହ ମୋଦୀଙ୍କ ସଫଳତାକୁ କହିଥିଲେ ।

ହେମାମାଳିନୀ କହିଥିଲେ, ଏଠାରେ ପୂର୍ବରୁ କଂଗ୍ରେସର ସରକାର ଥିଲା । ତା ପରେ ୨୫ ବର୍ଷ ହେବ ବିଜେଡି ଶାସନ କରୁଛି । ଓଡିଶା ଏବେ କେଉଁ ସ୍ଥିତିରେ ଅଛି । ଭ୍ରଷ୍ଟାଚାର ବଢୁଛି, ବେରୋଜଗାର ବଢୁଛି । ଓଡିଶା ବହୁତ ଭଲ ସାଂସ୍କୃତି ସ୍ଥାନ, ପ୍ରାକୃତିକ ଉପାଦାନ ରହିଛି । ପର୍ଯ୍ୟଟନର ବହୁତ ବିକାଶ ହୋଇପାରିବ । ହେଲେ ବିଜେଡି ସରକାର ୨୫ ବର୍ଷ ହେବ ଧ୍ୟାନ ଦେଇ ନାହାନ୍ତି । ୨୫ ବର୍ଷ ହେବ ଗୋଟିଏ ସ୍ଥାନରେ ଗୋଟିଏ କାମ କରି ଆସୁଛନ୍ତି ।

ନରେନ୍ଦ୍ର ମୋଦୀଙ୍କ ନେତୃତ୍ୱରେ ସାରା ଦେଶରେ ବିକାଶ ହେଉଛି । ପୂରା ଭାରତର ନୂଆ ନିର୍ମାଣ ହେଉଛି । ଦେଶର ଏମିତି ବିକାଶ ଦେଖି ବିଶ୍ୱ ବି ଚକିତ । ଗରିବ, ମହିଳା, ଦଳିତଙ୍କ ପାଇଁ ମୋଦୀ ଅନେକ ଯୋଜନା କରିଛନ୍ତି । ହେଲେ ମୁଁ ଦୁଃଖିତ ଏହା ଓଡିଶାବାସୀଙ୍କ ପାଖରେ ପହଞ୍ଚି ପାରୁନି । ମୋଦୀ ସରକାର ୧୮ ଲକ୍ଷ କୋଟି ଓଡିଶାକୁ ଦେଇଛନ୍ତି ବିକାଶ ପାଇଁ । ହେଲେ ଏଠାରେ କିଛି ବିକାଶ ମୋତେ ଦେଖାଯାଉନି । ଯଦି ଓଡିଶାରେ ଡବଲ ଇଞ୍ଜିନ ସରକାର ହେବ ତାହେଲେ ବିକାଶ ହୋଇପାରିବ ବୋଲି ହେମା ମାଳିନୀ କହିଥିଲେ ।