ଶାନ୍ତନୁଙ୍କୁ ମିଳିଲା ସାହାଯ୍ୟ । ଆଶାବାଡି ନୁହେଁ ଏବେ ପ୍ଲାଷ୍ଟିକ ଗୋଡରେ ଚାଲିବେ ବାଟ, ଭୋକିଲା ପରିବାରର ଭରିବେ ପେଟ । ଶାନ୍ତନୁଙ୍କ ସଙ୍ଘର୍ଷର କାହାଣୀ ପ୍ରସାରଣ ପରେ ପୁରୀରୁ ମିଳିଲା ସାହାଯ୍ୟ
କନକ ବ୍ୟୁରୋ: ସେ ଆଉ ଅନ୍ୟର ସାହାରା ଲୋଡିବେନି କି ଆଶାବାଡିର ସାହାଯ୍ୟ ନେଇ ସାରା ଜୀବନ କାଟିବେନି । କିମ୍ବା ଦୁର୍ଘଟଣାରେ ଗୋଡ କଟି ଯିବା ପରେ ବିଛଣାରେ ଶୋଇ ରହି ଭାଗ୍ୟକୁ ନିନ୍ଦିବେନି । କାରଣ ତାଙ୍କୁ ସାହାଯ୍ୟ କରିବାକୁ ଆଗେଇ ଆସିଛନ୍ତି ସ୍ୱେଚ୍ଛାସେବୀ ସଙ୍ଗଠନ । କଟି ଯାଇଥିବା ଗୋଡରେ ପ୍ଲାଷ୍ଟିକ ଗୋଡ ଲଗାଇବାକୁ ପୁରୀରୁ ସହାୟତା ପାଇଁ ଆସିଛନ୍ତି ପତିତ ପାବନ ସଙ୍ଗଠନ ।
Kanak News is now on WhatsApp
Join and get latest news updates delivered to you via WhatsApp
ଢେଙ୍କାନାଳ ଜିଲ୍ଲା ପରଜଙ୍ଗ ବ୍ଲକ କାମର୍ଦ୍ଦା ଗାଁର ୨୧ ବର୍ଷୀୟ ଶାନ୍ତନୁ ନାୟକ ଏକ ଦୁର୍ଘଟଣାରେ ନିଜ ଡାହାଣ ଗୋଡ ହରାଇଥିଲେ । ଗତ ଫେବୃୟାରୀରେ ସାନ ଭାଇକୁ ପରୀକ୍ଷା କେନ୍ଦ୍ରକୁ ନେବା ବାଟରେ ଟ୍ରକ ସହ ଦୁର୍ଘଟଣା ହୋଇ ଶାନ୍ତନୁ ଡାହାଣ ଗୋଡ ହରାଇଥିଲେ ।
ଗୋଡ କଟିଯିବା ପରେ ପରିବାରର ଏକମାତ୍ର ରୋଜଗାରିଆ ପୁଅ ଘରେ ବସି ରହିିଲା । ଫଳରେ ତେଲ ଲୁଣ ସଂସାର ଚାଲିବା ଏକଦମ କଷ୍ଟ ହୋଇପଡିଲା । ଟଙ୍କା ନଥିବାରୁ ଶାନ୍ତନୁଙ୍କ ଅତ୍ୟାଧୁନିକ ଅସ୍ତ୍ରୋପଚାର ହୋଇପାରିଲାନି ତେଣୁ ତାଙ୍କ ଗୋଡ କଟାହେଲା । ଗୋଡ କଟିଯିବା ପରେ ପ୍ଲାଷ୍ଟିକ ଗୋଡ ପାଇଁ କେହି ଅର୍ଥ ଦାନ କଲେ ସେ ପୁଣି ଥରେ ନିଜ ପରିବାର ଚଳାଇ ପାରନ୍ତେ ବୋଲି ଗୁହାରୀ କରିଥିଲେ ଶାନ୍ତନୁ ।
ତେବେ ଶାନ୍ତନୁଙ୍କ ସଙ୍ଘର୍ଷର କାହାଣୀ କନକ ନ୍ୟୁଜରେ ପ୍ରସାରଣ ପରେ ତାଙ୍କୁ ସାହାଯ୍ୟ ପାଇଁ ଆଗେଇ ଆସିଛନ୍ତି ପୁରୀର ପତିତ ପାବନ ସ୍ୱେଚ୍ଛାସେବୀ ସଂଗଠନ । ଶାନ୍ତନୁଙ୍କ ଡାହାଣ ଗୋଡରେ ଏକ ପ୍ଲାଷ୍ଟିକ ଗୋଡ ଲଗାଇବାକୁ ସେମାନେ ପୁରୀରୁ ପରଜଙ୍ଗ ଆସିଛନ୍ତି । ଆଉ ସେମାନଙ୍କ ସହ ତାଙ୍କୁ ପୁରୀ ନେଇଯାଇଛନ୍ତି ।
ବାମ ଗୋଡକୁ ଲକ୍ଷ୍ୟ କରି ଶାନ୍ତନୁଙ୍କ ଡାହାଣ ଗୋଡ ତିଆରି ହେବ । ତେଣୁ ପୁରୀରେ ୧୦ରୁ ୧୨ ଦିନ ରହିବେ ଶାନ୍ତୁନୁ । ଆଉ ପ୍ଲାଷ୍ଟିକ ଗୋଡ ଲଗାଇ ସାରିବା ପରେ ଶାନ୍ତନୁ ଏନ ନୂଆ ଆଶା ନେଇ ଘରକୁ ଫେରିବେ । ଯାହା ଶାନ୍ତନୁଙ୍କ ପୂରା ପରିବାର ଲୋକଙ୍କ ମୁହଁରେ ହସ ଫୁଟାଇବ । ତେବେ ଶାନ୍ତୁନୁଙ୍କୁ ସାହାଯ୍ୟ ମିଳିବା ପରେ ସେ କନକ ନ୍ୟୁଜକୁ ଧନ୍ୟବାଦ ଦେଇଛନ୍ତି ।