କନକ ବ୍ୟୁରୋ: ଆର୍ତ୍ତତ୍ରାଣଙ୍କ ଆଖିରେ ଆଖିଏ ଲୁହ । ଛାତିରେ ଛାତିଏ କୋହ । ନିଜ ହସଖୁସିର ପରିବାରକୁ ହଇରାଣ ହେଉଥିବା ଦେଖି ନିଜ ଭାଗ୍ୟକୁ ଦୋଷ ଦେଉଛନ୍ତି ଆର୍ତ୍ତତ୍ରାଣ । ଦିନ ଥିଲା ତାଙ୍କ ରୋଜଗାରରେ ସାରା ପରିବାରଟା ଦୁଃଖ କଷ୍ଟରେ ଚଳି ଯାଉଥିଲା । ପାଠ ପଢାଇ ଯାହା କିଛି ଘରକୁ ଆଣୁଥିଲେ ସେତିକିରେ ପୂରା ପରିବାରର ପେଟ ପୂରି ଯାଉଥିଲା । ହେଲେ ଏବେ, ସବୁକିଛି ଓଲଟି ଯାଇଛି । ହସଖୁସିର ପରିବାରରୁ ହସ ହଜିଯାଇଛି , ଓଳିଏ ଖାଇଲେ ଓଳିଏ ଉପାସ ରହିବାକୁ ପଡୁଛି…
Kanak News is now on WhatsApp
Join and get latest news updates delivered to you via WhatsApp
ଜଗତସିଂହପୁର ଜିଲ୍ଲା ସଦର ବ୍ଲକ ଚାନ୍ଦଗଡ ଗାଁର ଆର୍ତ୍ତତ୍ରାଣ ମଲ୍ଲ୍ିକଙ୍କୁ ଅସାଧ୍ୟ ରୋଗ ହେବା ପରେ ଏତେ ତାଙ୍କ ପରିବାରରେ ଦୁଃଖ କୁଣିଆ ହୋଇ ରହିଛି । ପ୍ରାୟ ବର୍ଷେ ହେଲା ସେ ନିଶ୍ୱାସ ନେବାରେ କଷ୍ଟ ଅନୁଭବ କରିବା ସହ ତାଙ୍କ ମୁହଁ ଫୁଲିବା ଆରମ୍ଭ ହୋଇଛିା । ଆର୍ତ୍ତତ୍ରାଣଙ୍କ ଏଭଳି ପରିବର୍ତ୍ତନ ଦେଖି ତାଙ୍କୁ ପ୍ରଥମେ ଏସସିବିରେ ଚିକିତ୍ସା କରା ଯାଇଥିଲା । ଆଉ ସେଇଠି ଜଣାପଡିଥିଲା ତାଙ୍କୁ ମାସ୍ଥାନିଆ ଗ୍ରାଭିସ ଭଳି ମାରାତ୍ମକ ରୋଗ ଗ୍ରାସିଛି ।
ତେବେ ଅଧିକ ଚିକିତ୍ସା ପାଇଁ ତାଙ୍କୁ ଦିଲ୍ଲୀ ଏମସକୁ ପଠାଯାଇଥିଲା । ଦିଲ୍ଲୀରେ ରହି ଚିକିତ୍ସା କରାଇବା ଆର୍ତ୍ତଙ୍କ ପକ୍ଷେ ସମ୍ଭବ ନଥିବାରୁ ଘରେ ଯାହା କିଛି ଥିଲା ସବୁ ବିକି ଭାଙ୍ଗି ଦିଲ୍ଲୀ ଯାଇଥିଲେ । ଘରୋଇ କଲେଜରେ ପଢାଇ, ଟ୍ୟୁସନ କରି ଯାହା କିଛି ରଖିଥିଲେ ତାହା ନିଜ ଚିକିତ୍ସାରେ ଚାଲିଗଲା । ସାଙ୍ଗସାଥୀ, ସମ୍ପର୍କୀୟ, ପଡୋଶୀଙ୍କ ଠାରୁ ଧାରଉଧାର କରି ବର୍ତ୍ତମାନ ସୁଦ୍ଧା ୨୦ ଲକ୍ଷ ଟଙ୍କା ଖର୍ଚ୍ଚ ହୋଇ ସାରିଥିବା ବେଳେ ମାସକୁ ୩ ଲକ୍ଷ ଟଙ୍କା ଖର୍ଚ୍ଚ ହେଉଛି । ଆର୍ତ୍ତଙ୍କ ଏଭଳି ଅବସ୍ଥା ଦେଖି ଜିଲ୍ଲା ପ୍ରଶାସନ ୨୦ ହଜାର ଟଙ୍କା ସହାୟତା ଦେଇଥିବା ବେଳେ ମୁଖ୍ୟମନ୍ତ୍ରୀ ଓ ପ୍ରଧାନମନ୍ତ୍ରୀଙ୍କ ରିଲିଫ ପାଣ୍ଠିରୁ ସହାୟତା ପାଇଁ ଆବେଦନ କରିଛନ୍ତି ।
ସେପଟେ ନିଜ ପରିବାର ଭବିଷ୍ୟତ କଥା ଭାବି ଭାଙ୍ଗି ପଡିଛନ୍ତି ନିଜେ ଆର୍ତ୍ତତ୍ରାଣ ଆଉ ତାଙ୍କ ପତ୍ନୀ ସୁଜାତା । ଘରେ ଦୁଇ ଦୁଇଟି ପାଠପଢା ଝିଅ ଅଛନ୍ତି । ସେମାନେ କଣ କରିବେ ? ସେମାନଙ୍କ ଭବିଷ୍ୟତ କଣ ହେବ ଏସବୁ କଥା ବାପାମାଆଙ୍କୁ ବିଚଳିତ କରିଥିବା ବେଳେ ପଛରେ ଛିଡା ହୋଇ ବାପାଙ୍କୁ ସାହସ ଦେଇଛନ୍ତି ଆର୍ତ୍ତତ୍ରାଣଙ୍କ ସାନ ଝିଅ । ବାପା ଖୁବ ଶୀଘ୍ର ଭଲ ହୋଇ ଯାଆନ୍ତୁ ଆଉ ସେମାନଙ୍କ ସହ ସ୍ୱାଭାବିକ ଜୀବନ ଜିଅନ୍ତୁ ଏଇ ଗୋଟିଏ ଗୁହାରୀ ଠାକୁରଙ୍କୁ କରୁଛନ୍ତି ତାଙ୍କ ଦୁଇ ଗେହ୍ଲା ଝିଅ…