ହସ୍ପିଟାଲ ବେଡରେ ମୃତ୍ୟୁ ସହ ଲଢୁଛି ବାପଛେଉଣ୍ଡ ଝିଅ ମୋନାଲିସା । ଆପଣଙ୍କର ଛୋଟିଆ ସହାୟତା ମୋନାଲିସାକୁ ଦେବ ନୂଆ ଜୀବନ ।
କନକ ବ୍ୟୁରୋ : ମୃତ୍ୟୁ ସହ ସଂଘର୍ଷ କରୁଛି ମୋନାଲିସା, ବାସ୍ ଆପଣଙ୍କ ସହାୟତା ମିଳିଲେ ବଞ୍ଚିଯିବ ବାପଛେଉଣ୍ଡ ଝିଅର ଜୀବନ । ଯିଏ ପ୍ରତିଦିନ ଅନ୍ୟଙ୍କ ଜୀବନ ବଞ୍ଚାଇବାରେ ସାଥ୍ ଦେଉଥିଲା, ଏବେ ସିଏ ନିଜେ ପ୍ରତିଦିନ ମୃତ୍ୟୁ ସହ ଲଢେଇ କରୁଛି । ୧୫ ଦିନ ହେବ ପ୍ରତିଦିନ ଚାଲିଛି ମୃତ୍ୟୁ ସହ ଛକାପଞ୍ଝା । କିନ୍ତୁ ସାହସୀ ଝିଅ ମୋନାଲିସା ଦମ୍ଭ ହାରିନି କି ହାର ମାନିନି । କାରଣ ହସ୍ପିଟାଲ ବେଡରେ ଶୋଇଥିବା ମୋନାଲିସା ଜାଣିଛି ଯଦି ସିଏ ଦମ୍ଭ ହାରିଦେବ ତେବେ ତାହାର ପୂରା ପରିବାର ଭାସିଯିବ । ଏ କାହାଣୀ ହେଉଛି ଚିଲିକା ବଉଳାବନ୍ଧ ଗ୍ରାମର ମୋନାଲିସା ଶତପଥୀଙ୍କର । ଯିଏ ସଡକ ଦୁର୍ଘଟଣାର ଶିକାର ହୋଇ ଏବେ ହସ୍ପିଟାଲ ବେଡରେ ଜୀବନ ମରଣ ସହ ସଂଗ୍ରାମ କରୁଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସ୍ୱାସ୍ଥ୍ୟ ଅଧିକାରିଣୀ ଭାବେ ରାମଚନ୍ଦ୍ରପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ କାମ କରୁଥିବା ମୋନାଲିସା ଗତ ୧୯ ତାରିଖରେ ଡ୍ୟୁଟି ସାରି ସ୍କୁଟିରେ ଫେରୁଥିବା ବେଳେ ବୀରରାମଚନ୍ଦ୍ରପୁର ନିକଟରେ ଏକ ଅଜଣା ଗାଡି ତାଙ୍କୁ ପଛପଟୁ ଧକ୍କର ଦେଇଥିଲା । ରକ୍ତ ଜୁଡୁବୁଡୁ ଅବସ୍ଥାରେ ରାସ୍ତାରେ ପଡି ରହିଥିବା ମୋନାଲିସାଙ୍କୁ ସ୍ଥାନୀୟ ଲୋକ ଉଦ୍ଧାର କରିବା ପରେ ତାଙ୍କୁ ପ୍ରଥମେ ସାକ୍ଷୀଗୋପାଳ ଓ ପରେ କ୍ୟାପିଟାଲ ହସ୍ପିଟାଲରେ ଭର୍ତ୍ତି କରିଥିଲେ । ପରେ ତାଙ୍କୁ ଆମ୍ରି ହସ୍ପିଟାଲରେ ଚିକିତ୍ସା କରିବାକୁ ଭର୍ତ୍ତି କରାଯାଇଛି । ମୋନାଲିସାଙ୍କର ମେରୁଦଣ୍ଡ ହାଡ ସହ ବାମ ଗୋଡ ଓ ଛାତିର ହାଡ ମଧ୍ୟ ଭାଙ୍ଗିଯାଇଛି । ଏଭଳି ସ୍ଥିତିରେ ତାଙ୍କର ଜରୁରୀ ଚିକିତ୍ସା ପାଇଁ ୧୫ ଲକ୍ଷ ଟଙ୍କାରୁ ଅଧିକ ଟଙ୍କାର ଆବଶ୍ୟକତା ପଡୁଛି ।
ବାପଛେଉଣ୍ଡ ମୋନାଲିସା ଘରର ଏକମାତ୍ର ରୋଜଗାରକ୍ଷମ ଥିଲେ । ଘରର ବଡ ଝିଅ ହୋଇଥିବାରୁ ତାଙ୍କ ରୋଜଗାରରେ ହିଁ ଘର ଚଳୁଥିଲା । ତେଣୁ ଯେତେବେଳେ ମୋନାଲିସା ହସ୍ପିଟାଲ ବେଡରେ ଜୀବନ ଓ ମରଣ ସହ ସଂଘର୍ଷ କରୁଛନ୍ତି ସେତେବେଳେ ଏତେ ଟଙ୍କା ଯୋଗାଡ କରିବା ପରିବାର ପକ୍ଷରେ ସମ୍ଭବ ହୋଇପାରୁନି । ଯେଉଁଥିପାଇଁ ଅନ୍ୟ କାହାର ସହାୟତା ଆଶାକୁ ଚାହିଁ ବସିଛି ପରିବାର । କେହି ବଦାନ୍ୟ ବ୍ୟକ୍ତି ଯଦି ସହଯୋଗ ହାତ ବଢାନ୍ତି ତେବେ କେବଳ ମୋନାଲିସାଙ୍କ ଜୀବନ ରକ୍ଷା ହୋଇପାରନ୍ତାନି ବରଂ ତାଙ୍କର ପରିବାର ମଧ୍ୟ ଏଭଳି ଯନ୍ତ୍ରଣାଦାୟକ ସ୍ଥିତିରୁ ମୁକୁଳିପାରନ୍ତା ।
ପିଲାଟି ବେଳୁ ବାପାଙ୍କୁ ହରାଇଥିବା ମୋନାଲିସାଙ୍କ ପରିବାର କହିଲେ ମା, ଦୁଇ ଭଉଣୀ ଓ ଗୋଟିଏ ଭାଇ । ସାନ ଭାଇ ଓ ମଝିଆ ଭଉଣୀ ଏବେ ପାଠ ପଢୁଥିବା ବେଳେ ମୋନାଲିସାଙ୍କ ଉପରେ ପୂରା ପରିବାରର ଦାୟିତ୍ୱ ଥିଲା । କିନ୍ତୁ ଏବେ ମୋନାଲିସା ହସ୍ପିଟାଲରେ ଜୀବନ ମରଣ ସହ ଯୁଝି ହେଉଛନ୍ତି । ଗୋଟିଏ ଟଙ୍କା ହେଉ ପଛେ ଯଦି ଓଡ଼ିଶାବାସୀ ସହଯୋଗରେ ହାତ ବଢାନ୍ତେ ତେବେ ମେଧାବୀ ମୋନାଲିସା ଜୀବନ ଯୁଦ୍ଧରେ ଜିତିବା ପୁଣିଥରେ କର୍ମକ୍ଷେତ୍ରକୁ ଫେରି ଅନ୍ୟଙ୍କ ଜୀବନ ବଞ୍ଚାଇ ପାରନ୍ତେ ।
ମୋନାଲିସାଙ୍କୁ ସହାୟତାର ହାତ ବଢାଇବାକୁ ଚାହୁଁଥିଲେ
Name : Monalisha Satapathy
A/c No : 10760110057490
IFSC Code : UCBA0001076
Branch : UCO Bank
Gangadharpur, Nachuni