ବର୍ଷା ଆଣୁଛି ବନ୍ୟା । ଆସନ୍ତା ୨୪ ଘଣ୍ଟାରେ ଉତ୍ତର ଆଭ୍ୟନ୍ତରୀଣ ଓଡିଶାରେ ପ୍ରବଳରୁ ଅତି ପ୍ରବଳ ବର୍ଷା । ଛତିଶଗଡ ଉପର ମୁଣ୍ଡରେ ପ୍ରବଳ ବର୍ଷା ପାଇଁ ହୀରାକୁଦରେ ବଢିବ ଜଳସ୍ତର, ଆହୁରି ଫୁଲିବ ମହାନଦୀ । ଆଞ୍ଚଳିକ ପାଣିପାଗ ବିଭାଗର ସୂଚନା
କନକ ବ୍ୟୁରୋ: ରାଜ୍ୟରେ ଲଘୁଚାପ ପ୍ରଭାବରୁ ଅନେକ ଜିଲ୍ଲାରେ ବର୍ଷା ଲାଗି ରହିଛି । ଉତ୍ତର ଅଭ୍ୟନ୍ତରୀଣ ଓଡିଶାର ଅଧିକାଂଶ ଜିଲ୍ଲାରେ ପ୍ରବଳରୁ ଅତିପ୍ରବଳ ବର୍ଷା ହୋଇଛି । ଏହା ମଧ୍ୟରେ ତେଲକୋଇ ଏବଂ ଲାଇକେରାରେ ୨୧୫ ମିଲିମିଟର ବର୍ଷା ହୋଇଥିବା ରେକର୍ଡ କରାଯାଇଥିବା ସୂଚନା ଦେଇଛନ୍ତି ଆଂଚଳିକ ପାଣିପାଗ ବିଭାଗ ନିର୍ଦ୍ଦେଶକ ଏଚଆର ବିଶ୍ୱାସ ।
Kanak News is now on WhatsApp
Join and get latest news updates delivered to you via WhatsApp
ସେହିପରି ୬ଟି ଜିଲ୍ଲା ଜଗତସିଂହପୁର, ଦେବଗଡ, ସୁନ୍ଦରଗଡ, ସମ୍ବଲପୁର, ଅନୁଗୁଳ ଏବଂ ବୌଦ୍ଧରେ ଗତ ୨୪ ଘଂଟାରେ ୧୦୦ ମିଲିମିଟରରୁ ଅଧିକ ବର୍ଷା ରେକର୍ଡ ହୋଇଛି । ବର୍ତ୍ତମାନ ରାଜ୍ୟରେ ହାରାହାରି ଠାରୁ ୪ ଶହ ପ୍ରତିଶତରୁ ଅଧିକ ବର୍ଷା ହେଲାଣି । ପ୍ରଥମ ଥର ପାଇଁ ୨୭ ଅଗଷ୍ଟରେ ସ୍ୱାଭାବିକ ଠାରୁ ୧୦ ପ୍ରତିଶତ ଅଧିକ ବର୍ଷା ହୋଇଥାଏ । କେବଳ ଅଗଷ୍ଟ ମାସରେ କେବଳ ୫୪ ପ୍ରତିଶତ ଅଧିକ ବର୍ଷା ହୋଇଛି । ସେହିପରି ରାଜ୍ୟର ୧୫ଟି ଜିଲ୍ଲାରେ ୬୦ ପ୍ରତିଶତରୁ ଅଧିକ , ୬ ଜିଲ୍ଲାରେ ସ୍ୱାଭାବିକ ବର୍ଷା ହୋଇଛି । ତେବେ ଆସନ୍ତା ୨୪ ଘଂଟାରେ ରାଜ୍ୟର ପଶ୍ଚିମ ଓଡିଶାରେ ଅଧିକ ବର୍ଷା ହେବ ବୋଲି ପୂର୍ବାନୁମାନ କରିଛି ଆଂଚଳିକ ପାଣିପାଗ ବିଭାଗ । ଛତିଶଗଡ ଉପର ମୁଣ୍ଡରେ ପ୍ରବଳ ବର୍ଷା ସଂଭାବନା ରହିଥିବା କୁହାଯାଇଛି ।
ସେପଟେ ବନ୍ୟା ସ୍ଥିତିକୁ ନେଇ ସୂଚନା ଦେଇଛନ୍ତି ରାଜସ୍ୱ ମନ୍ତ୍ରୀ ସୁଦାମ ମାରାଣ୍ଡି । ମନ୍ତ୍ରୀ କହିଛନ୍ତି, ଗତ ଦୁଇ ତିନି ଦିନ ହେବ ସାରା ରାଜ୍ୟରେ ପ୍ରବଳ ବର୍ଷା ହେଉଥିବାରୁ ବିଭିନ୍ନ ଜିଲ୍ଲାରେ ବନ୍ୟା ପରିସ୍ଥିତି ସୃଷ୍ଟି ହୋଇଛି । ରାଜ୍ୟରେ ୫୫ ମିଲିମିଟରରୁ ଅଧିକ ବର୍ଷା ହୋଇଛି । ବୈତରଣୀ ଓ ବ୍ରାହ୍ମଣୀ ନଈ ଫୁଲିବାରୁ ଭଦ୍ରକ ଓ କେନ୍ଦୁଝରରେ ବନ୍ୟା ହୋଇଛି ।
ବାଲେଶ୍ୱର, ମୟୂରଭଂଜ, ଜଗତସିଂହପୁର କେନ୍ଦ୍ରାପଡାର ତଳିଆ ଅଂଚଳରେ ପାଣି ପଶିଥିବାରୁ ଲୋକଙ୍କୁ ସ୍ଥାନାନ୍ତର କାମ ଆରମ୍ଭ ହୋଇଯାଇଛି । ବନ୍ୟା କାରଣରୁ ମୟୂରଭଂଜରୁ ୨ ଜଣ ଓ କେନ୍ଦୁଝରର ଜଣଙ୍କର ମୃତ୍ୟୁ ହୋଇଥିବା ସୂଚନା ଦେଇଛନ୍ତି ରାଜସ୍ୱ ମନ୍ତ୍ରୀ । ପ୍ରଥମେ ଲୋକଙ୍କ ସ୍ଥାନାନ୍ତର କରିବା ପରେ କ୍ଷୟକ୍ଷତି ଆକଳନ କରାଯିବ ବୋଲି ରାଜସ୍ୱ ମନ୍ତ୍ରୀ କହିଛନ୍ତି । ସେପଟେ ବନ୍ୟା ପରିସ୍ଥିତି ନେଇ ଜଳସମ୍ପଦ ମନ୍ତ୍ରୀ ରଘୁନନ୍ଦନ ଦାସ କହିଛନ୍ତି, ସ୍ଥିତି ଉପରେ ନଜର ରଖାଯାଇଛି । ବରିଷ୍ଠ ଜଳ ସମ୍ପଦ ଅଧିକାରୀ ଗ୍ରାଉଣ୍ଡରେ ଅଛନ୍ତି । ନଦୀବନ୍ଧକୁ ନେଇ କୌଣସି ବିପଦ ନାହିଁ ।