ବୟସ ହୋଇଗଲା ବୋଲି ବୁଢାବାପାକୁ ରାସ୍ତାରେ ଛାଡିଗଲେ ପୁଅବୋହୂ । ଯାତ୍ରା ଦେଖାଇବାକୁ କହି କେନ୍ଦ୍ରାପଡାରୁ ଆଣି କଟକରେ ଛାଡିଗଲେ…
କନକ ବ୍ୟୁରୋ: ବାପା ! ଦୁଇଟି ଅକ୍ଷରରେ ସାରା ବିଶ୍ୱ । ବାପା ଗୋଟେ ବିଶ୍ୱାସ ଡାକ, ନିଶ୍ୱାର ନାଁ । ବାପା ଆମ ଜୀବନରେ ବଡ ସେତୁବନ୍ଧ । ଯାହା ଉପରେ ଚାଲି ଆମେ ବଡ ହେଉ, ବଞ୍ଚିବା ଶିଖୁ । ପିଲାବେଳେ ବାପାଙ୍କ ଆଙ୍ଗୁଠି ଧରି ଯେଉଁପିଲା ବାଟଚଲା ଶିଖେ ସେହି ପୁଅ ବଡ ହେଲା ପରେ ବାପାଙ୍କ ହାତ ଛାଡିଦିଏ । ଆଜିର ଏ ସ୍ୱାର୍ଥପର ଦୁନିଆରେ ବାପାଙ୍କୁ ବାଡେଇବା, ବାପାଙ୍କୁ ବିଦା କରିଦେବା ଭଳି ଅନେକ ଖବର ସମ୍ବାଦପତ୍ରର ଶିରୋନାମା ପାଲଟୁଛି ଯାହାକୁ ଦେଖି ମନରେ ପ୍ରଶ୍ନ ଆସେ ଧିକ ସେ ପୁଅପଣିଆକୁ । ପୁଅ ଜନ୍ମ କରି କଣ ବାପା ପାପ କରିଛନ୍ତି ?
ସେମିତି ଏକ ଖବର ଆସିଛି ସିଲଭରସିଟି କଟକରୁ । ଯେଉଁଠି ଜଣେ ବାପାଙ୍କୁ ବାଟରେ ବେସାହାରା କରି ପଲାଇଛି ପୁଅ । ବୁଲାଇ ନେବାର ବାହାନା କରି ପର କରିଦେଇଛି ପୁଅ । ଖାଲି ପୁଅ ନୁହେଁ ବୁଢାବୟସରେ ରାସ୍ତା କଡରେ ୭୨ ବର୍ଷର ଏ ଅସହାୟ ବାପାଙ୍କୁ ଛାଡି ପଳାଇଛନ୍ତି ପୁଅବୋହୂ । ଆଉ ପର ସହରର ଭିଡ ଭିତରେ ପୁଅକୁ ଭାରି ଖୋଜୁଥିଲେ ବାପା । ହେଲେ ସେ କେମିତି ଜାଣିବେ ତାଙ୍କ ପୁଅ ତାଙ୍କୁ ଘରୁ ଆଣି ପର ସହରରେ ଛାଡିଯାଇଛି ବୋଲି…
Kanak News is now on WhatsApp
Join and get latest news updates delivered to you via WhatsApp
କଟକ ଶିଶୁ ଭବନ ରାସ୍ତାକଡରୁ ଉଦ୍ଧାର ହୋଇଥିବା ଏ ବୃଦ୍ଧ ଜଣଙ୍କ ହେଉଛନ୍ତି କେନ୍ଦ୍ରାପଡା ଜିଲ୍ଲାର ଗଜେନ୍ଦ୍ର ନାୟକ । ଶନିବାର ରାତିରୁ ମେଡିକାଲ ବାରଣ୍ଡାରେ ପଡିରହିଛନ୍ତି । ବୃଦ୍ଧଙ୍କୁ ଅସହାୟ ଅବସ୍ଥାରେ ଦେଖି ସ୍ଥାନୀୟ ଲୋକେ ପୋଲିସକୁ ଖବର ଦେବା ପରେ ମଉସାଙ୍କୁ ଖାଇବାକୁ ଦେଇଥିଲେ । ଅଭିଯୋଗ ହେଉଛି କି ଅଧରାତିରେ ପୁଅବୋହୂ ବୁଢାବାପାଙ୍କୁ ଏସବିଆଇ ଏଟିଏମ ନିକଟରେ ଛାଡି ଛୁ ମାରିଥିଲେ । ବାପାଙ୍କୁ ଯାତ୍ରା ଦେଖାଇବାକୁ ଆଣି କଟକ ରାସ୍ତାକଟରେ ଛାଡି ଦେଇଗଲେ । ତେବେ ପୋଲିସ ବୃଦ୍ଧଙ୍କ ଫଟୋ କେନ୍ଦ୍ରାପଡା ଥାନାକୁ ପଠାଇଥିବା ସୂଚନା ମିଳିଛି । ଆଉ ଏଭଳି ଏକ ଘଟଣାକୁ ଅନେକ ନିନ୍ଦା ବି କରିଛନ୍ତି ।
ତେବେ କଟକରୁ ଆସିଥିବା ବୁଢାବାପାର ଏ କରୁଣ କାହାଣୀ ହିଁ ବୟାନ କରୁଛି ସତରେ ମାନବିକତା ଧିରେଧିରେ ମରିମରି ଯାଉଛି । ସମସ୍ତେ ନୁହେଁ କିଛି ପୁଅ ବଡ ହେବା ପରେ ବାପାଙ୍କୁ ବୋଝ ଭାବୁଛନ୍ତି । ବାପାଙ୍କୁ ପର କରିଦେଉଛନ୍ତି । ତେବେ ବାପାଙ୍କୁ ଜୀବନରେ ବୋଝ ଭାବୁଥିବା ସେହି ପୁଅମାନଙ୍କୁ ଗୋଟିଏ ପ୍ରଶ୍ନ । ଯେଉଁ ବାପାକୁ ଆଜି ପର କରିବାକୁ ହାତ ଯାଉଛି ସେହି ବାପା କଣ ତୁମ ପାଇଁ କିଛି କରି ନାହାନ୍ତି ? ନିଜ ରକ୍ତକୁ ଝାଳ କରି ମଣିଷ କରିଥିବା ବାପାଙ୍କୁ ପୁଅମାନେ ଏମିତି ଉପହାର ଦେବା କେତେ ଦୂର ଠିକ? ବାପାଙ୍କୁ ବୋଝ ଭାବୁଥିବା ପୁଅମାନେ ନିଜ ବାପାଙ୍କ ତ୍ୟାଗକୁ ଥରେ ମନେପକାନ୍ତୁ । ଦେଖିବେ ଦିନେ ଦୁନିଆରୁ କମିଯିବ ଏମିତି ଘଟଣା । ଆଉ ବାପାମାନେ କହିବେ ମୋ ପୁଅ କୋଟିଏରେ ଗୋଟିଏ…