ଏକାଠି ଜନ୍ମ, ଏକାଠି ମୃତ୍ୟୁ । ମାଆ ଗର୍ଭରୁ ସାଙ୍ଗ ହୋଇ ଆସିଥିଲେ, ଶ୍ମଶାନକୁ ବି ସାଙ୍ଗ ହୋଇ ଚାଲିଗଲେ । ମାଆ ବିଷ ପିଇ ଦେବା ପରେ ଆତ୍ମହତ୍ୟା କଲେ ଦୁଇ ଭାଇ ଜଗା-ବଳିଆ । ମୃତ୍ୟୁ ପରେ ମଶାଣୀରେ ଜଳିଳା ତିନି ଜଣଙ୍କ ଜୁଇ… ବରଗଡରୁ ଆସିଲା ଛାତିଥରା କାହାଣୀ
କନକ ବ୍ୟୁରୋ: ଏକାଠି ଜନ୍ମ, ଏକାଠି ମୃତ୍ୟୁ । ସାଙ୍ଗ ହୋଇ ଆସିଥିଲେ, ସାଙ୍ଗ ହୋଇ ଚାଲିଗଲେ । ସ୍ନେହ ମମତାର ମୂଲ ଦେବାକୁ ବିଷ ପିଇଦେଲେ ଦୁଇ ଭାଇ । ଆତ୍ମହତ୍ୟାର ଅଫେରା ପଥରେ ମାଆ ଚାଲିଯିବା ପରେ ପିଲା ବାଛିନେଇଥିଲେ ସେହି ବାଟ । ବାସ୍ ! ତାପରେ ଗାଁ ମଶାଣୀରେ ଏକାଠି ଜଳିଛି ମାଆ ସହ ଦୁଇ ପୁଅ ଜଗା-ବଳିଆଙ୍କ ଜୁଇ…
Kanak News is now on WhatsApp
Join and get latest news updates delivered to you via WhatsApp
ବରଗଡ ଜିଲ୍ଲା ସଦର ଥାନା ଚାରପାଲି ଗାଁରେ ପାରିବାରିକ କଳହର କରୁଣ ପରିଣତି ବିଷରେ ଶେଷ ହୋଇଛି । ଆଉ ଏ ବିଷ ତିନି ତିନି ଜଣଙ୍କ ଜୀବନ ନେଇଛି । ସାମାନ୍ୟ ବଚସା ଯେ ଏତେ ଭୟଙ୍କର ହୋଇଥାଏ ତାହା ଏହି କାହାଣୀ ଶୁଣିଲେ ଆପଣ ଜାଣିପାରିବେ । ଘରୋଇ ବଚସା ନେଇ ଯେତେବେଳେ ମାଆ ଆତ୍ମହତ୍ୟା କରିବାକୁ ବିଲକୁ ବିଷ ଧରି ଦୌଡିଥିଲେ ଠିକ ସେତିକି ବେଳେ ଦୁଇ ପୁଅ ମଧ୍ୟ ମାଆ ପଛେପଛେ ଧାଇଁଥିଲେ । ଆଉ ମାଆ ବିଷ ପିଇଦେବା ପରେ ମାଆକୁ ନିଜଠୁ ବି ଅଧିକ ଭଲପାଉଥିବା ଦୁଇ ପୁଅ ଆଉ ବଞ୍ଚିରହି କି ଲାଭ କହି ବିଷ ପିଇଦେଇଥିଲେ । ତେବେ ଘଟଣାସ୍ଥଳରେ ମାଆର ମୃତ୍ୟୁ ହୋଇଥିବା ବେଳେ ମେଡିକାଲରେ ଆଖି ବୁଝିଥିଲେ ଜଗା-ବଳିଆ । ମମତା ପାଇଁ ମୃତ୍ୟୁପାନ କରିବା ପରେ ମୃତ୍ୟୁର ମୁକସାକ୍ଷୀ ଭାବେ ବିଲ ମଝିର ଏ ଗାମୁଛା ଆଉ ଚପଲ ହିଁ ପଡିଛି ।
ସେପଟେ ଦୁଇ ଭାଇ ଓ ମାଆର ଆକସ୍ମିକ ମୃତ୍ୟୁ ପରେ ଭଉଣୀ ଭାଙ୍ଗି ପଡିଛି । ପ୍ରିୟଜନଙ୍କୁ ହରାଇ ବାହୁନି ବାହୁନି କାନ୍ଦୁଛି । କାଲି ଯେଉଁ ଚୁଲିମୂଳେ ମାଆ ରୋଷେଇ କରି ଭାଇଭଉଣୀଙ୍କୁ ଖୁସିରେ ଖାଇବାକୁ ଦେଉଥିଲା । ଆଜି ସେହି ଚୁଲି ଅଛି ହେଲେ ଚୁଲିମୂଳରେ ମାଆ ନାହିଁ । ଦୁଇ ଭାଇ ଗଲା ପରେ କାମଧନ୍ଦା ପାରୁନଥିବା ବାପାଙ୍କୁ ନେଇ କେମିତି ଚଳିବ କୁନି ଝିଅ । ସେହି ଚିନ୍ତାରେ ଲୁହ ଢାଳୁଛି…