ଦିନ ବିତୁଛି, ଭୟ ଘାରୁଛି । ଭାରତରେ କରୋନା ଆକ୍ରାନ୍ତଙ୍କ ସଂଖ୍ୟା ଛୁଇଁଲା ୪୩, ସମସ୍ତ ରାଜ୍ୟ ସରକାରଙ୍କୁ ଗାଇଡଲାଇନ୍ ଜାରି କଲା କେନ୍ଦ୍ର ।
କନକ ବ୍ୟୁରୋ : ଚିନ୍ତା ବଢାଉଛି କରୋନା । ଭାରତରେ କରୋନା ଆକ୍ରାନ୍ତଙ୍କ ସଖ୍ୟା ଆଜି ୪୩ରେ ପହଞ୍ଚିଛି । ଏନେଇ ଆଜି ପୁଣି ଥରେ କେନ୍ଦ୍ର ସ୍ୱାସ୍ଥ୍ୟମନ୍ତ୍ରୀ ହର୍ଷବର୍ଦ୍ଧନ ସମୀକ୍ଷା ବୈଠକ କରିଛନ୍ତି । ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଓ ଉପ-ରାଜ୍ୟପାଳଙ୍କ ସହିତ ଆଲୋଚନା କରିଛନ୍ତି ହର୍ଷବର୍ଦ୍ଧନ ।
Kanak News is now on WhatsApp
Join and get latest news updates delivered to you via WhatsApp
ସମସ୍ତ ରାଜ୍ୟ ସରକାରଙ୍କୁ କରୋନା ଗାଇଡଲାଇନ୍ ଜାରି କରିବା ସହିତ ରାପିଡଆକ୍ସନ ଟିମ୍ ପ୍ରସ୍ତୁତ ରଖିବାକୁ ନିର୍ଦ୍ଦେଶନାମା ଜାରି କରିଛନ୍ତି । ଭାରତରେ ୪୩ ଆକ୍ରାନ୍ତଙ୍କ ମଧ୍ୟରୁ କେରଳରେ ୬ ଜଣ, ତାମିଲନାଡୁରେ ୨, ଆଗ୍ରାରେ ୬ ଜଣ, ଦିଲ୍ଲୀରେ ୩ ଜଣ, ନୋଏଡା, ଗାଜିଆବାଦ ଓ ତେଲେଙ୍ଗାନାରେ ଗୋଟିଏ କରୋନା ରୋଗୀଙ୍କ ଚିକିତ୍ସା କରୋନା ଆଇସୋଲେସନ ୱାର୍ଡରେ ଚାଲିଛି ।
ଭାରତରେ କରୋନା ଭୂତାଣୁ ସଂକ୍ରମିତଙ୍କ ସଂଖ୍ୟା ବଢୁଥିବା ବେଳେ କେନ୍ଦ୍ର ସରକାର ଏହାକୁ ବେଶ ଗୁରୁତର ସହ ନେଇଛନ୍ତି । ସମସ୍ତ ରାଜ୍ୟକୁ କରୋନା ଭୂତାଣୁର ମୁକାବିଲା ପାଇଁ ଗାଇଡଲାଇନ ପଠାଇଛନ୍ତି କେନ୍ଦ୍ର ସରକାର । ଖାଲି ସେତିକି ନୁହେଁ ରାଜ୍ୟ ସରକାରମାନେ ତୁରନ୍ତ ରାପିଡଆକ୍ସନ ଟିମ୍ ତିଆରି କରିବାକୁ ନିର୍ଦ୍ଦେଶନାମା ଜାରି ହୋଇଛି ।
କେରଳରେ ଆଉ ଜଣେ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି । କେରଳରେ ଆଜି ଏକ ୩ ବର୍ଷ ଶିଶୁ କରୋନା ଆକ୍ରାନ୍ତ ହୋଇଥିବା ଜଣାପଡିଛି । ନିକଟରେ ଇଟାଲୀରୁ ଫେରିଥିବା ଏହି ଶିଶୁର ସ୍ୱାବ ରିପୋର୍ଟ ପଜିଟିଭ୍ ଆସିଛି । ବର୍ତ୍ତମାନ ଦେଶରେ କରୋନା ଭୂତାଣୁ ଯାଂଚ କରିବା ପାଇଁ ୪୬ଟି ସ୍ୱତନ୍ତ୍ର ଲ୍ୟାବ କାର୍ଯ୍ୟକାରୀ ହେଉଛି ।
ଯେଉଁମାନେ ୬ ସପ୍ତାହ ଭିତରେ ବିଦେଶରୁ ଆସିଥିବେ ସେମାନେ ସରକାରଙ୍କୁ ଜଣାଇବାକୁ ନିର୍ଦ୍ଦେଶ ରହିଛି । ଯଦି ଅବଗତ ନ କରାଇଲେ ସେମାନଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ନିଆଯିବ ବୋଲି କୁହାଯାଇଛି । ସ୍ୱାସ୍ଥ୍ୟ ମନ୍ତ୍ରୀ କହିଛନ୍ତି କରୋନାକୁ ମୁକାବିଲା କରିବାରେ ଭାରତ ସରକାର ସକ୍ଷମ ଅଛନ୍ତି । ଏଥିପାଇଁ ବହୁ ପୂର୍ବରୁ ପ୍ରସ୍ତୁତି ହୋଇଥିଲା । ଦେଶରେ ୩୦ଟି ବିମାନବନ୍ଦରରେ ଯାଂଚ କରାଯାଉଛି । ୮ଲକ୍ଷ ଲୋକଙ୍କ ଯାଂଚ ଶେଷ ହୋଇଛି । ବିଶେଷ କରି ବିଦେଶୀ ପର୍ଯ୍ୟଟକଙ୍କ ଉପରେ ନଜର ରଖାଯାଇଥିବା ସେ କହିଛନ୍ତି । ଲୋକଙ୍କୁ ସଚେତନ କରିବା ପାଇଁ ଫୋନରେ ମଧ୍ୟ କରୋନା ଭୂତାଣୁ ସମ୍ପର୍କିତ ସଚେତନତା ବାର୍ତ୍ତା ଦିଆଯାଉଛି ।