ଭୁବନେଶ୍ୱରରେ ୩୧ ଟଙ୍କା ବଦଳରେ ପେଟ୍ରୋଲ ପାଇଁ ୭୨ ଟଙ୍କା କାହିଁକି ଦେଉଛନ୍ତି ଗ୍ରାହକ ! ଗୋଟିଏ କ୍ଲିକରେ ଜାଣନ୍ତୁ ପେଟ୍ରୋଲ ଓ ଡ଼ିଜେଲ ଦରର ପୂରା ହିସାବ ନିକାଶ
କନକ ବ୍ୟୁରୋ : ବୋଲ ମାନୁନି ପେଟ୍ରୋଲ ଓ ଡିଜେଲ ଦର । ଗ୍ରାହକଙ୍କ ପକେଟରେ ନିଆଁ ଲଗାଇଲାଣି ପେଟ୍ରୋଲ ଦର । ଏପ୍ରିଲ ୧ରୁ ସାଧାରଣ ଲୋକ ମହଙ୍ଗା ମାଡରୁ ଉଠିନଥିବା ବେଳେ ଆଉ ଏକ ମହଙ୍ଗା ମାଡ ଦେଇଛି ତୈଳ କମ୍ପାନୀ । ମୋଦି ସରକାରର ୪ ବର୍ଷ ମଧ୍ୟରେ ପ୍ରଥମ ଥର ପାଇଁ ରେକର୍ଡ ଭାଙ୍ଗିଛି ପେଟ୍ରୋଲ ଦର । ଭୁବନେଶ୍ୱରରେ ପେଟ୍ରୋଲର ଦର ୭୨ ଟଙ୍କା ୬୭ ପଇସା ଥିବା ବେଳେ ଡିଜେଲର ରେକର୍ଡ ଦର ୬୯ ଟଙ୍କା ୪୦ ପଇସାରେ ପହଞ୍ଚିଛି । ଯାହା ଗ୍ରାହକଙ୍କୁ ଏବେ ଚିନ୍ତାରେ ପକାଇଛି ।
Kanak News is now on WhatsApp
Join and get latest news updates delivered to you via WhatsApp
ଅନ୍ତର୍ଜାତୀୟ ବଜାରରେ ଅଶୋଧିତ ତେଲ ମୂଲ୍ୟ ବୃଦ୍ଧି ଘଟିବାରୁ ଦେଶରେ ପେଟ୍ରୋଲ ଏବଂ ଡିଜେଲ୍ ଦର ବଢୁଛି ବୋଲି କୁହାଯାଉଛି । କିନ୍ତୁ ପେଟ୍ରୋଲ ଓ ଡିଜଲେର ହିସାବ ନିକାସ ଜାଣିଲେ ଆପଣ ମୁଣ୍ଡରେ ହାତ ଦେବେ । ୩୧ ଟଙ୍କାର ପେଟ୍ରୋଲ ସାଧାରଣ ଲୋକ ପାଖରେ ପହଞ୍ଚିବା ବେଳକୁ କିପରି ୭୨ ଟଙ୍କାରେ ପହଞ୍ଚୁଛି ଓ ୩୩ ଟଙ୍କାର ଡିଜେଲକୁ ଗ୍ରାହକ କାହିଁକି ୬୯ ଟଙ୍କାରେ କିଣୁଛନ୍ତି ତାହାର ପୂରା ହିସାବ ଆମେ ଆପଣଙ୍କୁ ଜଣାଇବୁ । କେନ୍ଦ୍ର ଓ ରାଜ୍ୟ ସରକାର କେଉଁ କେଉଁ ଟିକସ ନେଇ ଏହାର ମୂଲ୍ୟ ବୃଦ୍ଧି କରୁଛନ୍ତି ତାହା ଅଧିକାଂଶ ଲୋକ ଜାଣିନାହାନ୍ତି ।
ଭୁବନେଶ୍ୱରରେ ଏବେ ପେଟ୍ରୋଲର ଦର ୭୨.୬୭ ଟଙ୍କା ଥିବା ବେଳେ ଡିଜେଲର ଦର ୬୯.୪୦ ଟଙ୍କା ରହିଛି । କିନ୍ତୁ ଏହି ତୈଳ ଗ୍ରାହକଙ୍କ ପାଖରେ ପହଞ୍ଚିବା ପୂର୍ବରୁ ବିଭିନ୍ନ ସୋପାନ ଦେଇ ଆସିଥାଏ । ପେଟ୍ରୋଲ ହିସାବକୁ ଦେଖିଲେ, ରିଫାଇନାରୀ ଗେଟ ଦର ବା ବିଶୋଧନ ଓ ପ୍ରବେଶ କର ସହ ୩୧.୬୯ ଟଙ୍କାରେ ଭୁବନେଶ୍ୱରରେ ପହଞ୍ଚିଥାଏ ପେଟ୍ରୋଲ । କିନ୍ତୁ ଖାଉଟିଙ୍କ ପାଖରେ ପହଞ୍ଚିବା ପୂର୍ବରୁ ପରିବହନ ଖର୍ଚ୍ଚ ବାବଦକୁ ୩.୫୮ ଟଙ୍କା ନିଆଯାଇଥାଏ । ଏସବୁ ବାଦ ଡିଲରର ଲାଭ ବାବଦକୁ ୩.୬୦ ପଇସା, କେନ୍ଦ୍ରୀୟ ଶୁଳ୍କ ୧୯.୪୮ ଟଙ୍କା ଓ ଭାଟ ବାବଦରେ ରାଜ୍ୟ ସରକାର ୧୪.୩୨ ଟଙ୍କା ନେଇଥାନ୍ତି । ଆଉ ଏହାପରେ ପେଟ୍ରୋଲ ଦର ୭୨.୬୭ ଟଙ୍କାରେ ଗ୍ରାହକଙ୍କୁ ବିକ୍ରି ହୋଇଥାଏ ।
ସେହିଭଳି ଡିଜେଲ କ୍ଷେତ୍ରରେ ମଧ୍ୟ ସମାନ ଚିତ୍ର ଦେଖିବାକୁ ମିଳିଥାଏ । ପେଟ୍ରୋଲ ଭଳି ୩୩.୫୯ ଟଙ୍କାର ଡିଜେଲର ଦର ବିଭିନ୍ନ ଟିକସ ଆଦାୟ ପରେ ବୃଦ୍ଧି ପାଇ ୬୯.୪୦ ପଇସା ବିକ୍ରି ହୋଇଥାଏ । ଅଶୋଧିତ ତୈଳ ବିଶୋଧନ ଓ ପ୍ରବେଶ କର ସହ ଡିଜେଲ ୩୩.୫୯ ଟଙ୍କାରେ ଭୁବନେଶ୍ୱରରେ ପହଞ୍ଚିବା ପରେ ପରିବହନ ଓ ମାକେର୍ଟି ମାର୍ଜିନ ବାବଦକୁ ୪.୦୮ ଟଙ୍କା ନିଆଯାଇଥାଏ । ଏହାବାଦ ଡିଲର ଲାଭ ପାଇଁ ୨.୫୩ ଟଙ୍କା, କେନ୍ଦ୍ରୀୟ ଶୁଳ୍କ ୧୫.୩୩ ଟଙ୍କା ଓ ଭାଟ ବାବଦରେ ରାଜ୍ୟ ସରକାର ୧୩.୮୭ଟଙ୍କା ନେବା ପରେ ଗ୍ରାହକଙ୍କୁ ଡିଜେଲ ବିକ୍ରି ହୋଇଥାଏ । ଯାହାଫଳରେ ୩୩.୫୯ ଟଙ୍କାର ଡିଜେଲ ୬୯.୪୦ ଟଙ୍କାରେ ମିଳିଥାଏ ।
ରାଜ୍ୟ ସରକାର ପେଟ୍ରୋଲ ଓ ଡିଜେଲ ଉପରେ ୨୬ ପ୍ରତିଶତ ଭାଟ ନେଉଛନ୍ତି । ପେଟ୍ରୋଲ ପାଇଁ ୧୪.୩୨ ଟଙ୍କା ନେଉଥିବା ବେଳେ ଡିଜେଲ ପାଇଁ ୧୩.୮୭ ଟଙ୍କା ନେଉଛନ୍ତି । ଏହାବାଦ ପେଟ୍ରୋଲ ଉପରେ ୧୯.୪୮ ଟଙ୍କା ଓ ଡିଜେଲ ଉପରେ ୧୫.୩୩ ଟଙ୍କା କେନ୍ଦ୍ରୀୟ ଶୁଳ୍କ ଦେଇଥାନ୍ତି ଗ୍ରାହକ । ୨୦୧୪-୧୫ ଆର୍ଥିକ ବର୍ଷରେ ରାଜ୍ୟ ସରକାର ପେଟ୍ରୋଲଜାତ ଦ୍ରବ୍ୟ ଉପରେ ୩୦୪୬ କୋଟି ଟଙ୍କା ଟିକସ ଆଦାୟ କରିଥିବା ବେଳେ ୨୦୧୫-୧୬ରେ ଏହା ୩୨୨୪ କୋଟିରେ ପହଞ୍ଚିଥିଲା । ୨୦୧୬-୧୭ ଆର୍ଥିକ ବର୍ଷରେ ଏହା ବୃଦ୍ଧି ପାଇ ୪୫୨୧ କୋଟିରେ ପହଞ୍ଚିଥିବାର ଜଣାପଡିଛି ।
ଗତବର୍ଷ କେନ୍ଦ୍ର ସରକାର ପେଟ୍ରୋଲ ଓ ଡିଜେଲ ଉପରେ କେନ୍ଦ୍ରୀୟ ଶୁଳ୍କ ୨ଟଙ୍କା ହ୍ରାସ କରିଥିଲେ । ଏହାସହ ବିଭିନ୍ନ ରାଜ୍ୟକୁ ମଧ୍ୟ ଭାଟ ହ୍ରାସ କରିବା ପାଇଁ ନିବେଦନ କରିଥିଲେ । ଯାହାଫଳରେ ଗ୍ରାହକ ମାନେ କମ ଦରରେ ପେଟ୍ରୋଲ ଓ ଡିଜେଲ ପାଇପାରିବେ । ତେବେ ମାତ୍ର ଚାରୋଟି ରାଜ୍ୟ ଗୁଜରାଟ, ମଧ୍ୟପ୍ରଦେଶ, ହିମାଚଳ ପ୍ରଦେଶ, ମହାରାଷ୍ଟ୍ର ଭାଟ ହ୍ରାସ କରିଥିଲେ ।