ଯୁବପିଢି ପାଳିଲେ ନିଆରା ନୂଆବର୍ଷରେ । ହାଡଭଙ୍ଗା ଶୀତରେ ଅସହାୟଙ୍କୁ ହେଲେ ସାହା । ଶୀତ କାକର ଭିତରେ କଟକରୁ ଆସିଲା ମାନବିକତାର ଅସଲି ଚିତ୍ର ।
କନକ ବ୍ୟୁରୋ: ଆମେ ଥାଉ ଥାଉ ସେମାନେ ଥରିବେନି ଶୀତରେ କି କାଙ୍କୁରି କୁଙ୍କୁରି ହେବେନି କାକରରେ । ଜାଡର ଯନ୍ତ୍ରଣାରେ ବି ଜର୍ଜରିତ ହେବେନି ନିରାଶ୍ରୟୀ ଅସହାୟ ଲୋକ । ଏମିତି ଏକ ଭାବନା ନେଇ ରାସ୍ତାକଡର ଗରିବ ଲୋକଙ୍କୁ ନୂଆବର୍ଷରେ ଶୀତବସ୍ତ୍ର ଦେଇଛନ୍ତି କଟକର କିଛି ଯୁବପିଢି । ମାନବ ସେବା ହିଁ ମାଧବ ସେବା ଆଉ ନୂଆ ବର୍ଷକୁ ସ୍ୱାଗତ କରିବାକୁ ଏହି ନିରାଶ୍ରୟୀଙ୍କ ସେବା ପରି ରାତି କାଟିଛନ୍ତି ସହୃଦୟ ବ୍ୟକ୍ତି ।
Kanak News is now on WhatsApp
Join and get latest news updates delivered to you via WhatsApp
ଯେତେବେଳେ ପୁରୁଣା ବର୍ଷର ରାତି ସରି ସରି ଆସୁଥିଲା, ନୂଆବର୍ଷର ସକାଳ ଧିରେଧିରେ ଆସୁଥିଲା ଠିକ ମଝି ରାତିର ମୁହୂର୍ତ୍ତକୁ ନେଇ ଝୁମୁଥିଲେ ଲୋକେ । ନୂଆବର୍ଷକୁ ଘରେ ରହି ସ୍ୱାଗତ କରିବା ସହ ପାର୍ଟି କରୁଥିଲେ । ହେଲେ ଘର ବାହାରେ, ରାସ୍ତାକଡରେ ନୂଆବର୍ଷର ନୂଆ ଶୀତର ଶାସ୍ତିକୁ ସହୁଥିଲେ ନିରାଶ୍ରୟୀ । କିଏ ବସଷ୍ଟାଣ୍ଡରେ କିଏ ରେଳ ଷ୍ଟେସନରେ ଶୀତ ସହ କରୁଥିଲା ରିତିମତ କସରତ । ଥିଲାବାଲାଙ୍କ ପାଇଁ ସିନା ସରକାର ଲଗାଇଥିଲେ କଟକଣା ହେଲେ ନଥିଲା ବାଲାଙ୍କ ପାଇଁ କିନ୍ତୁ କର୍ଫ୍ୟୁ ଲଗାଇଥିଲା କାକର । ଆଉ ଏତକି ବେଳେ ସେମାନଙ୍କୁ ସାହାଯ୍ୟ କରିବାକୁ ଆଗେଇ ଆସିଥିଲେ କଟକର ଯୁବକ ।
କଟକ ସହରର ବିଭିନ୍ନ କ୍ଲବର ପିଲାମାନେ ଏଥର ନୂଆବର୍ଷ ନପାଳି କରିଥିଲେ ନିଆରା କାମ । ମେଡିକାଲ, ବାଦାମବାଡି ବସଷ୍ଟାଣ୍ଡ, ରେଳ ଷ୍ଟେସନ ଏସବୁ ସ୍ଥାନରେ ଯେଉଁ ଅସହାୟମାନେ ରାତି କାଟୁଥିଲେ, ଘର ନଥିବାରୁ ଫୁଟପାଥରେ ମୁଣ୍ଡଗୁଞ୍ଜିଥିଲେ ସେମାନଙ୍କୁ କମ୍ବଳ ଦେଇ ଶୀତରୁ ରକ୍ଷା କରିଛନ୍ତି ଏମାନେ । ଆଉ ପାଳିଛନ୍ତି ନିଆରା ନୂଆବର୍ଷ । ତେବେ ଏମିତି କିଛି କାମ କରି ଏବେ ମାନବିକତାର ପରିଚୟ ଦେଇଛନ୍ତି କଟକର ଯୁବପିଢି ।