ହାଥରସ୍ ମାମଲା : ଏହା ଏକ ଷଡଯନ୍ତ୍ର । ଭୋଲେ ବାବାଙ୍କ ଓକିଲ ଏପି ସିଂଙ୍କ ବୟାନକୁ ନେଇ ଚାଞ୍ଚଲ୍ୟ

କନକ ବ୍ୟୁରୋ : ହାଥରସ ଘଟଣାରେ ୧୨୧ଜଣଙ୍କ ଜୀବନ ଚାଲିଯାଇଛି । ପୋଲିସ ଏହି ଘଟଣାର ତଦନ୍ତ କରୁଛି । ଆଉ ଏହାରି ଭିତରେ ଭୋଲେ ବାବାଙ୍କ ଓକିଲ ଏପି ସିଂ ଦେଇଛନ୍ତି ଚାଞ୍ଚଲ୍ୟକର ବୟାନ୍ । ଏପି ସିଂ ଏପରି ଦାବି କରିଛନ୍ତି ଯାହା ଏହି ମାମଲାକୁ ଏକ ନୂଆ ମୋଡ ଦେଇଛି । ଏପି ସିଂ କହିଛନ୍ତି, ହାଥରସ ଘଟଣା ଏକ ଷଡଯନ୍ତ୍ର । କିଛି ଲୋକ ଜାଣିଶୁଣି ଏହା ଘଟାଇଛନ୍ତି ।

ଏପି ସିଂଙ୍କ କହିବା ଅନୁସାରେ, ସତସଙ୍ଗରେ ଉପସ୍ଥିତ ଥିବା କିଛି ଲୋକ କହିଛନ୍ତି, ସଂତସଙ୍ଗ ବେଳେ ୧୫ରୁ ୧୬ଜଣ ଅଜ୍ଞାତ ଲୋକ ନଜର ଆସିଥିଲେ । ସେମାନେ ସ୍କର୍ପିଓରେ ଆସିଥିଲେ । ଆଉ ସତସଙ୍ଗ ବେଳେ ଲୋକଙ୍କ ଭିଡ ମଧ୍ୟକୁ ଆସି ଭିଡ ମଧ୍ୟରେ ବିଶାକ୍ତ ଜିନିଷ ସ୍ପ୍ରେ କରିଥିଲେ । ସେମାନେ ତାଙ୍କ ପ୍ୟାଣ୍ଟ ପକେଟ୍ ଏବଂ ଗାମୁଛାରେ ବିଶାକ୍ତ ଜିନିଷ ଆଣିଥିଲେ । ବିଶାକ୍ତ ସ୍ପ୍ରେ କରିବା ପରେ ଲୋକେ ବେହୋସ ହେବାକୁ ଲାଗିଲେ ଏବଂ ସେଠାରେ ଭିଡ ବିକାବୁ ହେବାକୁ ଲାଗିଲା ।

ଏପି ସିଂ କହିଛନ୍ତି, ସତସଙ୍ଗରେ ଉପସ୍ଥିତ ଲୋକେ ଏହି ଘଟଣା ବାବଦରେ ସୂଚନା ଦେଇଛନ୍ତି । କିନ୍ତୁ ସେମାନେ ସାମ୍ନାକୁ ଆସିବାକୁ ଚାହୁଁନାହାନ୍ତି । ନିଜର ପରିଚୟ ଗୋପନ ରଖି ପୂରା ଘଟଣା ବାବଦରେ ମତେ କହିଛନ୍ତି । ଏହା ଏକ ଷଡଯନ୍ତ୍ର ଥିଲା । ଭୋଲେ ବାବାଙ୍କୁ ଫସାଇବା ପାଇଁ ଏପରି କରାଯାଇଥିଲା । ଯେଉଁମାନେ ଏହି ବୟାନ ଦେଇଛନ୍ତି, ସେମାନେ ସେହି ଅଜ୍ଞାତ ବ୍ୟକ୍ତିଙ୍କୁ ଚିହ୍ନିପାରିବେ ବୋଲି ଦାବି କରିଛନ୍ତି । ତେଣୁ ସିସିଟିଭି ଫୁଟେଜ୍ ଦେଖାଇବା ପାଇଁ ଦାବି କରାଯାଇଛି ।