ଲୋକସଭାରେ ପାରିତ ହେଲା କୃଷି ସୁଧାର ବିଲ: ଟୁଇଟ କରି ପ୍ରଧାନମନ୍ତ୍ରୀ କହିଲେ, ଐତିହାସିକ କୃଷି ସୁଧାର ବିଲ ଯୋଗୁଁ ଉପକୃତ ହେବେ କୃଷକ, ଦଲାଲରାଜର ହେବ ଅନ୍ତ
କୃଷି ବିଲକୁ ବିରୋଧ କରି କେନ୍ଦ୍ର କ୍ୟାବିନେଟରୁ ଇସ୍ତଫା ଦେଲେ ଶିରୋମଣୀ ଅକାଳି ଦଳର ନେତ୍ରୀ ହରସିମରତ କୌର
କନକ ବ୍ୟୁରୋ: କୃଷି ସୁଧାର ବିଲ୍ ଲୋକସଭାରେ ପାରିତ ହୋଇଛି । ଏହା ଦେଶର କୃଷକମାନଙ୍କ ପାଇଁ ଐତିହାସିକ କ୍ଷଣ ବୋଲି କହିଛନ୍ତି ପ୍ରଧାନମନ୍ତ୍ରୀ । ଟ୍ୱିଟ କରି ମୋଦୀ କହିଛନ୍ତି, ଏଥିରେ କୃଷକମାନେ ଲାଭବାନ ହେବେ ଏବଂ ଦଲାଲରାଜର ଅନ୍ତ ହେବ । କୃଷକମାନଙ୍କୁ ସେମାନଙ୍କ ଉତ୍ପାଦନକୁ ଉଚିତ ମୂଲ୍ୟରେ ବିକ୍ରି କରିବା ପାଇଁ ନୂଆ ସୁଯୋଗ ସୃଷ୍ଟି କରିବ । ଏହାସହ ପୂର୍ବରୁ ଥିବା ସର୍ବନିମ୍ନ ବିକ୍ରୟ ମୂଲ୍ୟ ବା ଏମଏସପି ଜାରି ରହିବ ଏବଂ ସରକାର କୃଷି ଇତ୍ପାଦ କିଣିବେ ବୋଲି ଭରସା ଦେଇଛନ୍ତି ପ୍ରଧାନମନ୍ତ୍ରୀ । ସେପଟେ ଏହି ବିଲ୍କୁ ନେଇ ମୋଦୀ ସରକାରଙ୍କୁ ଝଟକା ଦେଇଛି ସହଯୋଗୀ ଶିରୋମଣୀ ଅକାଳୀ ଦଳ । କେନ୍ଦ୍ରମନ୍ତ୍ରୀ ପଦରୁ ହରସିମ୍ରତ କୌର ବାଦଲ ଇସ୍ତଫା ଦେଇଛନ୍ତି । ଏହାକୁ ନେଇ ପଂଜାବରେ ଚାଷୀ ଅସନ୍ତୋଷ ତେଜୁଥିବା ବେଳେ ଏପରି ନିଷ୍ପତି ଦେଇଛନ୍ତି ହରସିମ୍ରତ କୌର ।
Kanak News is now on WhatsApp
Join and get latest news updates delivered to you via WhatsApp
ଲୋକସଭାରେ ଏହି ବିଲ ଆସିବା ପୂର୍ବରୁ କେନ୍ଦ୍ର କ୍ୟାବିନେଟରୁ ଓହରି ଯାଇଛନ୍ତି ହରସିମ୍ରତ କୌର । ତାଙ୍କ ସ୍ୱାମୀ ତଥା ଅକାଳୀ ଦଳ ମୁଖ୍ୟ ସୁଖବୀର ବାଦଲ କହିଛନ୍ତି, ତାଙ୍କ ଦଳ ସରକାରଙ୍କୁ ବାହାରୁ ସମର୍ଥନ ଯୋଗାଇଦେବ, ହେଲେ କୃଷକ ବିରୋଧୀ ରାଜନୀତିକୁ ବିରୋଧ କରିବ । ମୋଦୀଙ୍କ ମନ୍ତ୍ରିମଣ୍ଡଳରେ ଖାଦ୍ୟ ପ୍ରକ୍ରିୟାକରଣ ଶିଳ୍ପ ମନ୍ତ୍ରୀ ଥିଲେ ଆକାଳୀ ଦଳର ହରସିମ୍ରତ କୌର ବାଦଲ । କୃଷି କ୍ଷେତ୍ରରେ ବ୍ୟାପକ ସଂସ୍କାର ଆଣିବା ପାଇଁ ଦୁଇଟି ବିଲ୍ ଉପରେ ଗୁରୁତ୍ୱ ଦେଉଛନ୍ତି ମୋଦୀ ସରକାର । ଦି ଫାର୍ମର୍ସ ପ୍ରଡ୍ୟୁସ ଟ୍ରେଡ୍ ଆଣ୍ଡ କମର୍ସ ବିଲ ଏବଂ ଫାର୍ମର୍ସ ପ୍ରାଇସ୍ ଆସୁରାନ୍ସ ଆଣ୍ଡ ଫାର୍ମ ସର୍ଭିସେସ୍ ବିଲ । ତେବେ ଏହି ଦୁଇ ବିଲକୁ ପଂଜାବ ଓ ହରିୟାଣାରେ କୃଷକମାନଙ୍କ ଭିତରେ ପ୍ରବଳ ଅସନ୍ତୋଷ ସୃଷ୍ଟି ହୋଇଛି । ଟ୍ୱିଟ୍ କରି ହରସିମ୍ରତ କୌର ବାଦଲ କହିଛନ୍ତି, ସେ ତାଙ୍କ ଇସ୍ତଫାପତ୍ର ପ୍ରଧାନମନ୍ତ୍ରୀଙ୍କୁ ପ୍ରଦାନ କରିଛନ୍ତି ।