ଭିନ୍ନ ଭାବେ ସକ୍ଷମ ଗଜପତିର ହରିଶ୍ଚନ୍ଦ୍ର: ଦିବ୍ୟାଙ୍ଗ ହୋଇବି ପରିବା ଚାଷ କରି ନିଜ ପାଇଁ ତିଆରି କରିଛନ୍ତି ସ୍ୱତନ୍ତ୍ର ପରିଚୟ

କହିଲେ ସରକାର ଆର୍ଥିକ ସହାୟତା ଓ କୃଷି ସରଞ୍ଜାମ ଯୋଗାଇଦେଲେ ଆଗେଇ ନେବେ ଚାଷ କାମ

47

କନକ ବ୍ୟୁରୋ: ଅକ୍ଷମ ନୁହଁ ସେ ସକ୍ଷମ । ଦିବ୍ୟାଙ୍ଗ ହୋଇସୁଦ୍ଧା ସେ ଜଣେ ସଫଳ ଚାଷୀ । ଗଜପତି ଜିଲ୍ଲାର ହରିଶ୍ଚନ୍ଦ୍ର ବେହେରା ଭିନ୍ନକ୍ଷମ ହୋଇ ବି ପରିବା ଚାଷ କରି ପାଂଚ ପ୍ରାଣୀ କୁଟୁମ୍ବକୁ ଯୋଗାଇ ଆସୁଛନ୍ତି ଆହାର । ଭିନ୍ନକ୍ଷମ ଭତାକୁ ଛାଡିଦେଲେ ତାଙ୍କୁ ଆଉ କୌଣସିି ସରକାରୀ ସହାୟତା ମିଳୁନାହିଁ । ଦିବ୍ୟାଙ୍ଗ ପାଇଁ ବହୁ ସରକାରୀ ଯୋଜନା ରହିଥିଲେ, ମଧ୍ୟ ହରିଶ୍ଚନ୍ଦ୍ରଙ୍କୁ କୌଣସି ଯୋଜନାରେ ସାମିଲ କରାଯାଇନାହିଁ ।

କ୍ଷେତରେ ଲହଡି ମାରୁଛି ସବୁଜିମା । ବିଲରେ ଫଳିଛି ଭଳିକି ଭଳି ପନିପରିବା । ଯେଉଁ ଚାଷୀଙ୍କ ପରିଶ୍ରମରେ ଏହି କ୍ଷେତ ହସୁଛି, ସେ ହେଉଛନ୍ତି ଜନ୍ମରୁ ଭିନ୍ନକ୍ଷମ । ଗଜପତି ଜିଲ୍ଲା ଗୋଷାଣି ବ୍ଲକ ଉପୁଲଡା ଗାଁରେ ହରିଶ୍ଚନ୍ଦ୍ର ବେହେରା । ଦିବ୍ୟାଙ୍ଗ ଭାବେ ଜନ୍ମ ହୋଇଥିବା ହରିଶ୍ଚନ୍ଦ୍ର କିନ୍ତୁ ଜୀବନ ଯୁଦ୍ଧରେ ହାରମାନିବାକୁ ପ୍ରସ୍ତୁତ ନୁହଁନ୍ତି । କ୍ଷେତରେ ଚାଷ କରି ଯାହା ପରିବା ଅମଳ କରନ୍ତି, ତାକୁ ତିନି ଚକିଆ ସାଇକେଲରେ ନେଇ ଗାଁ ଗାଁ ବୁଲି ବିକ୍ରି କରି ପରିବାର ଚଳାଇ ଆସୁଛନ୍ତି ।

ହରିଶ୍ଚନ୍ଦ୍ର କ୍ଷେତରେ ମୂଳା, ଫୁଲକୋବି, ଭେଣ୍ଡି, ଲାଉ, କଲରା, ମକା ସାଙ୍ଗକୁ ବିଭିନ୍ନ ପ୍ରକାରର ଶାଗ ଚାଷ କରି ସଫଳ ଚାଷୀ ହୋଇପାରିଛନ୍ତି ସତ, କିନ୍ତୁ ପରିବାର ଚଳାଇବା କଷ୍ଟକର ହୋଇପଡୁଛି । ତା ଉପରେ ଦୁଇ ପିଲାଙ୍କ ପାଠପଢା ଖର୍ଚ୍ଚ, ଅଭାବ ବଢାଉଛି । ଏପଟେ ବିନା କୃଷି ଉପକରଣରେ ଫସଳ ଅମଳ ସହ ସାଇକେଲରେ ଗାଁ ଗାଁ ବୁଲି ପରିବା ବିକ୍ରି କରିବା ହରିଶ୍ଚ୍ନ୍ଦ୍ରଙ୍କ ପାଇଁ କଷ୍ଟକର ହୋଇପଡୁଛି । କେବଳ ଭିନ୍ନକ୍ଷମ ଭତାକୁ ଛାଡି ଦେଲେ ହରିଶ୍ଚନ୍ଦ୍ରଙ୍କୁ କୌଣସି ସରକାରୀ ସହାୟତା ମିଳୁନାହିଁ । ତେଣୁ କୌଣସି ସରକାରୀ ଯୋଜନାରେ ତାଙ୍କୁ ସାମିଲ କରି ଚାଷ ଉପକରଣ ସହ ଆର୍ଥିକ ସହାୟତା ଯୋଗାଇ ଦେଲେ ସେ ଅଧିକ ରୋଜଗାର କରି ଅନ୍ୟମାନଙ୍କ ପାଇଁ ଉଦାହରଣ ହୋଇ ପାରିଥାନ୍ତେ ।

ଭିନ୍ନକ୍ଷମଙ୍କ ପାଇଁ ସରକାରଙ୍କ ଅନେକ ଯୋଜନା ରହିଛି । ହେଲେ ଭାସ୍କର ପ୍ରଶାସନର ଦୃଷ୍ଟି ଆଢୁଆଳରେ ରହି ସରକାରଙ୍କ ସୁବିଧା ପାଇବାରୁ ବଂଚିତ ହେଉଛନ୍ତି ।

Comments are closed.