କ୍ରିକେଟ ଖେଳିନଥିଲେ ପେଟ୍ରୋଲ ପମ୍ପରେ କାମ କରୁଥାନ୍ତି । କାହିଁକି ଏମିତି କହିଲେ ହାର୍ଦ୍ଦିକ ପାଣ୍ଡ୍ୟା?
କନକ ବ୍ୟୁରୋ : ଟିମ୍ ଇଣ୍ଡିଆର ଷ୍ଟାର ଅଲରାଉଣ୍ଡର ହାର୍ଦ୍ଦିକ ପାଣ୍ଡ୍ୟାଙ୍କ ସଫଳତାର କାହାଣୀ ତ ସମସ୍ତେ ଜାଣିଥିବେ କିନ୍ତୁ କ୍ରିକେଟ ଖେଳିବା ପୂର୍ବରୁ ତାଙ୍କର ସଂଘର୍ଷମୟ କାହାଣୀ ବେଶି କେହି ଜାଣିନଥିବେ । ଆକ୍ରମଣାତ୍ମକ ବ୍ୟାଟିଂ ଓ ଚତୁର ବୋଲିଂ ବଳରେ ଟିମ୍ ଇଣ୍ଡିଆର ଭରସାଯୋଗ୍ୟ ଅଲରାଉଣ୍ଡର ଥିବା ହାର୍ଦ୍ଦିକ ପାଣ୍ଡ୍ୟା ଗତ କିଛି ବର୍ଷ ମଧ୍ୟରେ କ୍ରିକେଟ ଜଗତରେ ନିଜର ଏକ ସ୍ୱତନ୍ତ୍ର ଛାପ ଛାଡିଛନ୍ତି । ନିଜର ଦମଦାର ବ୍ୟାଟିଂ ଓ ଚତୁର ବୋଲିଂ ବଳରେ ଅନେକଥର ଟିମ୍ ଇଣ୍ଡିଆକୁ ବଡ ବିଜୟ ଭେଟି ଦେଇଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ନିଜର ବ୍ୟକ୍ତିଗତ ଜୀବନ ବାବଦରେ କହି ପୂର୍ବରୁ ବିବାଦୀୟ ହୋଇଥିବା ହାର୍ଦ୍ଦିକ ଏବେ ଏମିତି କିଛି କହିଛନ୍ତି ଯାହା ତାଙ୍କ କ୍ରିକେଟ ଖେଳ ପୂର୍ବର ସଂଘର୍ଷମୟ କାହାଣୀକୁ ବଖାଣୁଛି । ହାର୍ଦ୍ଦିକ କହିଛନ୍ତି ଟଙ୍କା ରୋଜଗାର କରିବା ଓ ଅଧିକ ଟଙ୍କା ରୋଜଗାର କରିବା ନିହାତି ଜରୁରୀ । ଏହାଛଡା ଟଙ୍କାର ଗୁରୁତ୍ୱ କଣ ତାହାକୁ ମଧ୍ୟ ବେଶ ଭଲ ଭାବେ ବୁଝିବା ଆବଶ୍ୟକ । ହାର୍ଦ୍ଦିକ କହିଛନ୍ତି, ୨୦୧୮ରେ ମୁମ୍ବାଇ ଇଣ୍ଡିଆନ୍ସ ଯେତେବେଳେ ତାଙ୍କୁ ୧୧ କୋଟି ଟଙ୍କା ଦେଇ ଦଳରେ ରଖିଥିଲା ସେତେବେଳେ ମଧ୍ୟ ସେ ଏତେ ଉତ୍ସାହିତ ହୋଇନଥିଲେ । ବରଂ ଏହି ସମୟରେ ସେ ନିଜକୁ ବେଶ ଶାନ୍ତଚିତ୍ତରେ ରଖିଥିଲେ ।
ହାର୍ଦ୍ଦିକ କହିଛନ୍ତି, ପାଖରେ ଟଙ୍କା ରହିବା ନିହାତି ଜରୁରୀ ଓ ଏହାଦ୍ୱାରା ଜୀବନରେ ଅନେକ କିଛି ପରିବର୍ତ୍ତନ ଦେଖିବାକୁ ମିଳେ । ଯାହାର ବଡ ଉଦାହରଣ ହେଉଛି ମୁଁ ନିଜେ । ଯଦି କ୍ରିକେଟ ଖେଳି ନାହାନ୍ତି ତେବେ ପେଟ୍ରୋଲ ପମ୍ପରେ କାମ କରୁଥାନ୍ତି । ମୁଁ ଏହା ମଜା ପାଇଁ କହୁନାହିଁ, ମୋ ପାଇଁ ମୋ ପରିବାର ସବୁଠୁ ବଡ ପ୍ରାଥମିକତା । ତେଣୁ ମୋ ପରିବାର କିଭଳି ଭଲ ଜୀବନ ବଞ୍ଚିବେ ତାହା ମୋର ଦାୟିତ୍ୱ । କୌଣସି ଛୋଟ ସହରରୁ ଆସିଥିବା ଯୁବକ ଯେତେବେଳେ ରୋଜଗାର କରିଥାଏ ସେତେବେଳେ ସିଏ ନିଜ ବାପା-ମା, ଭାଇ-ଭଉଣୀ, ପରିବାର ଓ ସର୍ମ୍ପକୀୟଙ୍କ କଥା ଚିନ୍ତା କରିଥାଏ । ମୁଁ ମଧ୍ୟ ସେହିଭଳି ଏକ ଛୋଟ ସହରରୁ ଆସିଛି । ତେଣୁ ଟଙ୍କାର ଆବଶ୍ୟକତା କଣ ତାହା ବେଶ ଭଲ ଭାବେ ଜାଣିଛି ।
ଚଳିତ ଟି-୨୦ ବିଶ୍ୱକପରେ ଭାରତୀୟ ଦଳରେ ସ୍ଥାନ ପାଇଛନ୍ତି ହାର୍ଦ୍ଦିକ ପାଣ୍ଡ୍ୟା । କିନ୍ତୁ ଏବେ ସେତେଟା ଫର୍ମରେ ନାହାନ୍ତି ହାର୍ଦ୍ଦିକ । ଚଳିତ ଆଇପିଏଲରେ ହାର୍ଦ୍ଦିକଙ୍କୁ ବୋଲିଂ କରୁଥିବାର ଦେଖିବାକୁ ମିଳିନଥିଲା । ଆହତ ସମସ୍ୟାରୁ ସୁସ୍ଥ ହେବା ପରେ ବୋଲିଂ କରୁନାହାନ୍ତି ହାର୍ଦ୍ଦିକ । ଶ୍ରୀଲଙ୍କା ଗସ୍ତରେ ମଧ୍ୟ ବହୁତ କମ ଓଭର ବୋଲିଂ କରିଥିଲେ ହାର୍ଦ୍ଦିକ । ତେଣୁ ଅଭ୍ୟାସ ମ୍ୟାଚରେ ହାର୍ଦ୍ଦିକଙ୍କୁ ବଡ ଇନିଂସ ଖେଳନ୍ତୁ ବୋଲି କ୍ରିକେଟପ୍ରେମୀ ଆଶା ବାନ୍ଧି ବସିଛନ୍ତି । ଯେଉଁ ପ୍ରଦର୍ଶନ ଆଧାରରେ ଆସନ୍ତା ୨୪ରେ ପାକିସ୍ତାନ ବିପକ୍ଷ ମ୍ୟାଚରେ ହାର୍ଦ୍ଦିକଙ୍କୁ ଦଳରେ ସାମିଲ କରିବେ କୋହଲି । କାରଣ ହାର୍ଦ୍ଦିକ ହେଉଛନ୍ତି ଟିମ୍ ଇଣ୍ଡିଆର ଟ୍ରମ୍ପ କାର୍ଡ । ହାର୍ଦ୍ଦିକ ଫର୍ମକୁ ଫେରିଲେ ଭାରତର ଟି-୨୦ ବିଶ୍ୱକପ ବିଜୟୀ ଆଶା ଦ୍ୱିଗୁଣିତ ହୋଇଯିବ ।