କୋର୍ଟ ପରିସରରୁ କଏଦୀ ଚମ୍ପଟ । ଅନୁଗୁଳ ଜିଲ୍ଲା ଦୌରା ଜଜ୍ କୋର୍ଟ ପରିସରରୁ ପାଇଖାନା ଘର ଆଜବେଷ୍ଟସ ତାଡି ଦୁର୍ଦ୍ଦାନ୍ତ ଅପରାଧୀ ଝସକେତନ ଫେରାର
କନକ ବ୍ୟୁରୋ: କୋର୍ଟ ପରିସରରୁ ଫେରାର ହେଲା ହାର୍ଡକୋର କ୍ରିମିନାଲ । ଅନୁଗୁଳ ଜିଲ୍ଲା ଦୌରା ଜଜ୍ କୋର୍ଟ ପରିସରରୁ ଫେରାର ହୋଇଛି ଦୁର୍ଦ୍ଦାନ୍ତ ଅପରାଧୀ ଝସକେତନ ରାଉତ । ହତ୍ୟା ମାମଲାରେ କୋର୍ଟରେ ହାଜର ହେବା ପରେ ଝସକେତନ ପୋଲିସକୁ ଚକମା ଦେଇ ଫେରାର ହୋଇଛି । ଶୁଣାଣି ପରେ ଝସକେତନ ଏକ ପାଇଖାନା ଘର ଭିତରକୁ ଯାଇଥିବା ବେଳେ ସେଠାରୁ ଆଜବେଷ୍ଟସ୍ ତାଡି ଫେରାର ହୋଇଯାଇଛି । ଗଲା ବେଳେ ଜଣେ ପୋଲିସ କର୍ମଚାରୀଙ୍କ ମୋବାଇଲ ଫୋନ୍ ନେଇ ଯାଇଥିବା ଜଣାପଡିଛି । ଲୋକଙ୍କୁ ହତ୍ୟା କରି ମାଟି ତଳେ ପୋତି ଦେଉଥିବା ଦୁର୍ଦ୍ଦାନ୍ତ ଅପରାଧୀ ଝସକେତନ ଫେରାର ହେବା ପରେ ପୋଲିସର ମୁଣ୍ଡବ୍ୟଥା ବଢିଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଅନୁଗୁଳ ଜରପଡା ଥାନା କୁଶକିଳା ଗାଁର ଝସକେତନ ୨୦୧୬ ଫେବୃଆରୀ ମାସରେ ଦୁଇ ସମ୍ପର୍କୀୟ ଭାଇଙ୍କୁ ମାରି ସରସ୍ୱତୀ ଶିଶୁ ମନ୍ଦିର ପରିସରରେ ଗାତ ଖୋଳି ପୋତି ଦେଇଥିଲା । ଏହା ସହ ୨୦୧୫ ଅଗଷ୍ଟ ମାସରେ କୁକୁରପେଟା ଅଂଚଳର ଅବଳା ଗଡନାୟକ ଓ କୁମୁଦ ଗଡନାୟକଙ୍କୁ ମଧ୍ୟ ହତ୍ୟା କରି ପୋତି ଦେଇଥିଲା । ତେବେ ଖୋଳତାଡ ପରେ ପୋଲିସ ଆଗରେ ସତ ମାନି ଯାଇଥିଲା ଝସକେତନ । ଆଉ ପୋଲିସ ଗାତ ଖୋଳି ମୃତଦେହ ଜବତ କରିବା ସହ ଝସକେତନକୁ ଗିରଫ କରି କୋର୍ଟ ଚାଲାଣ କରିଥିଲା । ଏହି ଘଟଣାକୁ ନେଇ ସେତେବେଳେ ରାଜ୍ୟବ୍ୟାପୀ ବେଶ୍ ଚର୍ଚ୍ଚା ହୋଇଥିଲା । ଏଭଳି ଜଣେ ଅପରାଧୀ ଫେରାର ହେବା ପରେ କୋର୍ଟ ପରିସରରେ ଢିଲା ସୁରକ୍ଷା ବ୍ୟବସ୍ଥାକୁ ନେଇ ସୃଷ୍ଟି ହୋଇଛି ପ୍ରଶ୍ନବାଚୀ । ଘଟଣା ପରେ ଅନୁଗୁଳ ଏସପି ଦୁଇଟି ସ୍ୱତନ୍ତ୍ର ଟିମ୍ ଗଠନ କରି ବିଭିନ୍ନ ସ୍ଥାନରେ ଚଢାଉ ଜାରି ରଖିଛନ୍ତି ।