କଳାହାଣ୍ଡି କପୁରମାଳ ଗାଁର ମିଠା ମକା ଚାଷୀ ହର ପଟେଲ: ୧ ଏକର ଜମିରେ ମକା ଚାଷ ସହ ଅନ୍ୟାନ୍ୟ ପନିପରିବା ଚାଷ କରିଛନ୍ତି ଚାଷୀ ହର ପଟେଲ
କନକ ବ୍ୟୁରୋ: ସୁଇଟକର୍ଣ୍ଣ ଚାଷ ଦେଉଛି ରୋଜଗାର । ପରିବାର ଗୁଜୁରାଣ ମେଂଟାଇବାରେ ସହାୟକ ହୋଇଛି ମିଠା ମକା । ସୁଇଟକର୍ଣ୍ଣ ବଦଳାଇ ଦେଇଛି ଚାଷୀଙ୍କ ଜୀବନ ଶୈଳୀ । ମିଠା ମକା ଚାଷ କରି ସ୍ୱାବଲମ୍ବୀ ହୋଇଛନ୍ତି ଜୟପାଟଣା ବ୍ଲକ କପୁରମାଲ ଗାଁର ହର ପଟେଲ ।
Kanak News is now on WhatsApp
Join and get latest news updates delivered to you via WhatsApp
ସକାଳ ହେଉ କିମ୍ବା ସଂଧ୍ୟା ଛୋଟ ପିଲାଙ୍କ ଠାରୁ ଆରମ୍ଭ କରି ଯୁବ ପିଢ଼ି ଏହାକୁ ଖାଇବାକୁ ଅଧିକାଂଶ ଲୋକ ପସନ୍ଦ କରନ୍ତି । ତେବେ ମିଠାମକା ଚାଷ କରି ଲାଭବାନ ହେଉଛନ୍ତି ଚାଷୀ । କଳାହାଣ୍ଡି ଜିଲ୍ଲା ଜୟପାଟଣା ବ୍ଲକ କପୁରମାଲ ଗାଁର ଯୁବ ଚାଷୀ ହର ପଟେଲ ଏବେ ଏହି ଚାଷ କରି ବେଶ ଲାଭବାନ ହୋଇଛନ୍ତି । କମ୍ ଖର୍ଚ୍ଚ କରି ପାଉଛନ୍ତି ଅଧିକ ଲାଭ । ମାତ୍ର ୮ରୁ ୧୦ ହଜାର ଟଙ୍କା ଖର୍ଚ୍ଚ କରି ୬୦ ହଜାର ଟଙ୍କା ରୋଜଗାର କରୁଛନ୍ତି ହର ପଟେଲ ।
୫ ବର୍ଷ ହେଲା ମିଠା ମକା ଚାଷ କରୁଛନ୍ତି ହର ପଟେଲ । ଖାଲି ମିଠା ମକା ନୁହେଁ ସେ କୋବି, କାକୁଟି, ବାଇଗଣ, ଭେଣ୍ଡି, ଟମାଟୋ ଓ ପୋଟଳ ଚାଷ ମଧ୍ୟ କରିଛନ୍ତି । ଉତ୍ପାଦିତ ଫସଲକୁ ସ୍ଥାନୀୟ ବଜାର ସହ ଆଖପାଖ ଅଂଚଳର ଲୋକଙ୍କୁ ବିକ୍ରି କରି ଭଲ ରୋଜଗାର କରୁଛନ୍ତି । ସ୍ଥାନୀୟ କୃଷି ଅଧିକାରୀଙ୍କ ପରାମର୍ଶ ନେଇ ଜୈବୀକ ପଦ୍ଧତିରେ ଏହି ଚାଷ କରୁଛନ୍ତି ହର । ରୁତୁ ଅନୁସାରେ ଚାଷୀ ଜଣଙ୍କ ନିଜ କ୍ଷେତରୁ ବାର୍ଷିକ ୨ ଥର ଫସଲ ଉତ୍ପାଦନ କରନ୍ତି । ଏହି ଚାଷ ତାଙ୍କ ଆର୍ଥିକ ସ୍ଥିତିରେ ଉନ୍ନତି ଆଣିବାରେ ବେଶ ସହାୟକ ହୋଇଛି । ବଜାରରେ ସୁଇଟ୍ କର୍ଣ୍ଣର ଚାହିଦା ଅଧିକ ରହିଥିବା ଏହି ଚାଷ କରି ଅନ୍ୟ ଚାଷୀଙ୍କ ପାଇଁ ପ୍ରେରଣା ପାଲଟିଛନ୍ତି ହର ପଟେଲ ।