କନକ ବ୍ୟୁରୋ: ଆଗରେ ପଡିଛି ପଥ ବହୁଦୂର, ଆହୁରି କେତେ ଯେ ବାକି… ଚାଲିବି ଚାଲିବି ନପଡିବି ଥକି, ମୁଦିବା ଆଗରୁ ଆଖି…
Kanak News is now on WhatsApp
Join and get latest news updates delivered to you via WhatsApp
ଏ ଉକ୍ତି କେବଳ ପାଦଥିବା ମଣିଷ ପାଇଁ ନୁହେଁ ବରଂ ଭବିଷ୍ୟତର ସ୍ୱପ୍ନ ଦେଖୁଥିବା ପିଲା ପାଇଁ ବି ପ୍ରଯୁଜ୍ୟ । ଏ ଝିଅକୁ ଦେଖନ୍ତୁ, ହାତ ଅଛି ହେଲେ କାମ କରିବାକୁ ଅକ୍ଷମ, ପାଦ ଅଛି ହେଲେ ଚାଲିବାକୁ ଅସମର୍ଥ । ତେଣୁ ଆଗକୁ ବଢିବା ପାଇଁ, ଚଳପ୍ରଚଳ ହେବା ପାଇଁ ଗୁରୁଣ୍ଡିବା ସହ ଅନ୍ୟର ସହାୟତା ଲୋଡୁଛି ସତ କିନ୍ତୁ ସେ ମନରୁ ହାରିଯାଇନି । ଶାରୀରିକ ଅକ୍ଷମତା ସତ୍ୱେ ସେ ଭିତରୁ ଭାଙ୍ଗିପଡିନି ।
କଥାରେ ଅଛି ଇଚ୍ଛା ଥିଲେ ଉପାୟ ଆପେ ଆପେ ଆସେ । ସବୁ ଅସମ୍ଭ କାମ ବି ସମ୍ଭବ ସମ୍ଭବ ଲାଗେ । ଆଉ ଏ କଥାକୁ ପ୍ରମାଣିତ କରି ଦେଖାଇଛନ୍ତି କୋରାପୁଟ ଜିଲ୍ଲା ବୋରିଗୁମା ଚରାମୁଳା ଗାଁର ୮ମ ଶ୍ରେଣୀର ଛାତ୍ରୀ ଯଶୋଦା ଦଳେଇ । ଯଶୋଦା ଜନ୍ମରୁ ଦିବ୍ୟାଙ୍ଗ । ଶରୀରର ଗଠନ ଏମିତି ଯେ ଛିଡା ହେବାକୁ କି ସକ୍ଷମ ନୁହେଁ ଯଶୋଦା । ଦୁଇ ହାତ ବି କାମ କରୁନି । କିନ୍ତୁ ତାରି ଭିତରେ ୨ ଗୋଡ ସାହାଯ୍ୟରେ ସେ ଆଙ୍କୁଛି ଚମତ୍କାର ଚିତ୍ର । ପାଦରେ ପେନ୍, ପେନସିଲ ଧରି ଧଳା କାଗଜ ଉପରେ ଦେଖାଉଛନ୍ତି ନିଜ କଳା ପ୍ରତିଭାର ପ୍ରଦର୍ଶନ ।
ହାତ ଅଚଳ ଥିଲେ ବି ସେ ପାଦ ସାହାଯ୍ୟରେ ବହିର ପୃଷ୍ଠାକୁ ବେଶ୍ ସୁନ୍ଦର ଭାବେ ଓଲଟାଇ ପାରନ୍ତି ଲେଖି ବି ପାରନ୍ତି । ଓଡିଆ, ହିନ୍ଦୀ, ଇଂରାଜୀକୁ ପାଦରେ ଲେଖିପାରନ୍ତି ଯଶୋଦା । ପାଠ ପ୍ରତି ବହୁତ ଆଗ୍ରହ ଥିବାରୁ ସ୍କୁଲର ସବୁ ସାରଙ୍କ ପ୍ରିୟ ଅଛନ୍ତି ଦିବ୍ୟାଙ୍ଗ ଛାତ୍ରୀ ଯଶୋଦା ।
ଯଶୋଦାଙ୍କ ବାପା କାମ କରି ପରିବାର ଚଳାନ୍ତି । ଝିଅର ଏମିତି ଅବସ୍ଥା ପାଇଁ ତାଙ୍କୁ ଭତା ବାବଦକୁ ୫୦୦ ଟଙ୍କା ମିଳୁଛି । ଟ୍ରାଇ ସାଇକେଲଟିଏ ବି ମିଳିଛି । ଦିବ୍ୟାଙ୍ଗ ହୋଇ ବି ନିଜ ଇଚ୍ଛାଶକ୍ତି ବଳରେ ଆଗକୁ ପାଠ ପଢିବାକୁ ମନସ୍ଥ କରିଥିବା ଯଶୋଦାକୁ ଯଦି କିଛି ସହାୟତା ମିଳନ୍ତା ପିଲାଟାର ଭବିଷ୍ୟତ ଉଜ୍ୱଳମୟ ହୁଅନ୍ତା ।