ପ୍ରମାଣ ଅଭାବରୁ ଗୁଜରାଟ ଦଙ୍ଗାର ୨୨ ଜଣ ଅଭିଯୁକ୍ତ ନିର୍ଦ୍ଦୋଷରେ ଖଲାସ, ୨ ଶିଶୁ ସମେତ ୨୨ଜଣଙ୍କୁ ହତ୍ୟା କରି ପୋଡିଦେଇଥିବା ଭଳି ଥିଲା ସଙ୍ଗୀନ ଅଭିଯୋଗ
କନକ ବ୍ୟୁରୋ : ଗୁଜରାଟ ଦଙ୍ଗାକୁ ନେଇ ବିବିସି ପ୍ରସ୍ତୁତ କରିଥିବା ଡକ୍ୟୁମେଣ୍ଟାରୀ ଏବେ ଭାରତୀୟ ରାଜନୀତିରେ ହଇଚଇ ସୃଷ୍ଟି କରିଥିବା ବେଳେ ଏହି ଦଙ୍ଗାକୁ ନେଇ ପୁଣି ଆସିଛି ଏକ ବଡ ଖବର । ୨୦୦୨ ଗୁଜରାଟ ଦଙ୍ଗା ମାମଲାରେ ଗୁଜରାଟର ଏକ ଅଦାଲତ ୨୨ଜଣଙ୍କୁ ପ୍ରମାଣ ଅଭାବରୁ ଦୋଷମୁକ୍ତ କରିଛନ୍ତି । ଏହି ୨୨ଜଣଙ୍କ ଉପରେ ୨ଶିଶୁ ସମେତ ୧୭ଜଣଙ୍କୁ ହତ୍ୟାକରି ପୋଡି ଦେଇଥିବାର ଅଭିଯୋଗ ରହିଥିଲା । ଏହି ହତ୍ୟାକାଣ୍ଡ ପଞ୍ଚମହଲର ହଲୋଲରେ ହୋଇଥିଲା । ଏହି ମାମଲାରେ ୨୨ଜଣଙ୍କ ଉପରେ ମାମଲା ରୁଜୁ ହୋଇଥିଲା । ହେଲେ ଶୁଣାଣି କ୍ରମରେ ୮ଜଣ ଅଭିଯୁକ୍ତଙ୍କର ମୃତ୍ୟୁ ହୋଇଥିଲା ।
Kanak News is now on WhatsApp
Join and get latest news updates delivered to you via WhatsApp
ସଂପୃକ୍ତ ମାମଲାରେ ଅଭିଯୁକ୍ତଙ୍କ ତରଫରୁ ମାମଲା ଲଢୁଥିବା ଓକିଲ ଗୋପାଲସିଂ ସୋଲଙ୍କୀ କହିଛନ୍ତି କି, ଜଷ୍ଟିସ ହର୍ଷ ଦ୍ୱିବେଦୀଙ୍କ ଖଣ୍ଡପୀଠ ୨୨ଜଣ ଅଭିଯୁକ୍ତଙ୍କୁ ନିର୍ଦ୍ଦୋଷରେ ଖଲାସ କରିଛନ୍ତି । ସେସନ କୋର୍ଟ ପ୍ରମାଣ ଅଭାବରୁ ଏଭଳି ରାୟ ଶୁଣାଇଥିବା କଥା ଗୋପାଲସିଂ କହିଛନ୍ତି । ଏହି ମାମଲାର ଶୁଣାଣି ହଲୋଲ ନିକଟ ଏକ ଅଦାଲତରେ ହୋଇଥିଲା ।
ସେପଟେ ଅଭିଯୋଗକାରୀଙ୍କ ପକ୍ଷରୁ ମାମଲା ଲଢୁଥିବା ଓକିଲ କୋର୍ଟରେ କହିଥିଲେ କି, ୨୦୦୨ ଫେବୃଆରୀ ୨୮ ତାରିଖରେ ପଞ୍ଚମହଲ ଜିଲ୍ଲା ହଲୋଲରେ ୧୭ଜଣଙ୍କୁ ହତ୍ୟା କରାଯାଇଥିଲା । ଏଥିରେ ୨ଜଣ ଶିଶୁ ମଧ୍ୟ ରହିଥିଲେ । ଏହାପରେ ଅଭିଯୁକ୍ତମାନେ ପ୍ରମାଣ ନଷ୍ଟ କରିବାକୁ ମୃତକଙ୍କ ଶବକୁ ପୋଡି ଦେଇଥିଲେ ।
ଏଭଳି ହତ୍ୟାକାଣ୍ଡ ପରେ ହତ୍ୟା ଓ ଦଙ୍ଗା ସମ୍ବନ୍ଧିତ ଧାରାରେ ପୋଲିସ ମାମଲା ରୁଜୁ କରିଥିଲା । ୨୦୦୪ ମସିହାରେ ୨୨ ଜଣ ଅଭିଯୁକ୍ତଙ୍କୁ ଗିରଫ କରାଯାଇଥିଲା । ହେଲେ ଏହି ମାମଲାର ଶୁଣାଣି ବେଳେ ଅଭିଯୋଗକାରୀ ପକ୍ଷ ଅଭିଯୁକ୍ତଙ୍କ ବିରୋଧରେ ପ୍ରମାଣ ଯୋଗାଡ କରିପାରିନଥିଲେ । ଏହାସହ ପ୍ରଥମେ ପ୍ରମାଣ ଦେଇଥିବା କିଛି ଲୋକ ପରେ ପ୍ରମାଣ ଦେବାରୁ ବିରତ ରହିଥିଲେ । ଅଭିଯୁକ୍ତଙ୍କ ଓକିଲ କୋର୍ଟକୁ କହିଥିଲେ କି ମୃତକଙ୍କ ଶବ ମିଳିନାହିଁ । ପୋଲିସ କେବଳ ନଦୀତଟରୁ କିଛି ହାଡ ଜବତ କରିଥିଲା ।