ସୁରତରୁ ଫେରିଥିବା ଶ୍ରମିକଙ୍କୁ ବୁଝାଇବା ପାଇଁ ଗଂଜାମ ପହଂଚିଲେ ଗୁଜୁରାଟ ଓଡିଆ ସମାଜର କର୍ମକର୍ତା । କହିଲେ ଚାକିରୀ ଗ୍ୟାରେଂଟୀ ଓ ବୀମା ନମିଳିଲେ ଫେରନ୍ତୁ ନାହିଁ ଶ୍ରମିକ, ସରକାର କରନ୍ତୁ ପଞ୍ଜୀକରଣ
କନକ ବ୍ୟୁରୋ : କରୋନା ଭୟ ଓ କଳ କାରଖାନା ବନ୍ଦ ହୋଇଯିବା ପରେ ବହୁତ ବାଧା ବିଘ୍ନ ଦେଇ ଘରେ ପହଁଚିଥିବା ଶ୍ରମିକଙ୍କୁ ବୁଝାଇବାକୁ ଗଂଜାମ ଆସିଛନ୍ତି ଗୁଜରାଟରେ କାମ କରୁଥିବା ପ୍ରବାସୀ ଓଡ଼ିଆ ସମାଜ ଟ୍ରଷ୍ଟର କର୍ମକର୍ତା । ଗଂଜାମର ବେଗୁନିଆପଡ଼ା ଓ ଖଲ୍ଲିକୋଟ ଅଂଚଳରେ ଗାଁ ଗାଁ ବୁଲି ସୁରତରୁ ଫେରିଥିବା ଶ୍ରମିକଙ୍କ ସହ ଆଲୋଚନା କରିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ପ୍ରବାସୀ ଓଡ଼ିଆ ସମାଜ ଟ୍ରଷ୍ଟର କର୍ମକର୍ତାମାନେ ଶ୍ରମିକଙ୍କୁ ବୁଝାଉଛନ୍ତିି ଯେ ଏଥର ସୁରତ ଫେରିଲେ ଯେଭଳି କିଛି ସମସ୍ୟା ହେବନାହିଁ, ସେ ଦିଗରେ ଉଭୟ କାରଖାନା ମାଲିକ, ଓଡ଼ିଶା ଓ ଗୁଜରାଟ ସରକାର ଏ ନେଇ ଶ୍ରମିକଙ୍କ କଥା ବୁଝିବା ଦରକାର । ଯେପରିକି ଇପିଏଫ୍, ଇଏସଆଇ ଓ ଜବ୍ ଗ୍ୟାରେଂଟି ଦେଲେ ଯାଇ ଶ୍ରମିକମାନେ ଫେରିବା କଥା ଚିନ୍ତା କରିବେ । ସରକାର ଶ୍ରମିକଙ୍କର ପଂଜିକରଣ କରନ୍ତୁ ଏବଂ ସୁରତରେ ନୋଡାଲ ଅଫିସର ନିଯୁକ୍ତି କରନ୍ତୁ ଓଡ଼ିଶା ସରକାର ।
ଏପଟେ ବିନା ସର୍ତରେ ସୁରଟ ଫେରିବାକୁ ନାରାଜ ଗଂଜାମ ଜିଲ୍ଲାର ପ୍ରବାସୀ ଶ୍ରମିକ । ଯେଉଁ କଂପାନୀକୁ ଝାଳ ବୁହାଇ ଗଢ଼ିଥିଲେ, କରୋନା ବିପଦ ବେଳେ ସେହି କଂପାନୀ ସେମାନଙ୍କୁ ପର କରି ଦେଇଥିଲା । ଏବେ କାରଖାନା ଖୋଲିବା କଥା ଆସିବାରୁ ଶ୍ରମିକଙ୍କ କଥା ମନେ ପଡିଛି କଂପାନୀ ମାଲିକଙ୍କର । କିନ୍ତୁ ପ୍ରବାସୀ ଶ୍ରମିକଙ୍କ ଦାବି ପ୍ରଥମେ ପଂଜିକରଣ କର, ବୀମାଭୁକ୍ତ କର, ଚାକିରିର ଗ୍ୟାରେଂଟି ଦିଅ, ଏହା ପରେ ଫେରିବୁ ସୁରତକୁ । ନହେଲେ ରାଜ୍ୟ ସରକାର ସେମାନଙ୍କୁ କାମ ଦିଅନ୍ତୁ ବୋଲି ଦାବି କରିଛନ୍ତି ପ୍ରବାସୀ ଶ୍ରମିକ । ଗଂଜାମ ଜିଲ୍ଲାରୁ ଲକ୍ଷ ଲକ୍ଷ ଶ୍ରମିକ ସୁରତର ସୂତାକଳ ଓ ଅନ୍ୟାନ୍ୟ କଂପାନୀରେ କାମ କରିଥାନ୍ତି । ହେଲେ କାହା ପାଖରେ ସେମାନଙ୍କର ହିସାବ ନାହିଁ । ନା ଓଡ଼ିଶା ସରକାର ସେମାନଙ୍କର ହିସାବ ରଖିଛନ୍ତି, ନା ହିସାବ ରଖିଛନ୍ତି ଗୁଜରାଟ ସରକାର ।