କନକ ବ୍ୟୁରୋ: ଆମ୍ ଆଦମୀ ପାର୍ଟିକୁ ବଡ ଝଟକା । ଗୁଜରାଟ ବିଧାନସଭା ନିର୍ବାଚନ ପୂର୍ବରୁ ଦଳର ହାତ ଛାଡିଲା ଭାରତୀୟ ଟ୍ରାଇବଲ ପାର୍ଟି । ଗୁଜରାଟରେ ଦୁଇ ଦଳ ଭିତରେ ଥିବା ମେଣ୍ଟ ଭାଙ୍ଗିଯାଇଛି । ଏନେଇ ସୋମବାର ଔପଚାରିକ ଭାବେ ଘୋଷଣା କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ଭାରତୀୟ ଟ୍ରାଇବଲ ପାର୍ଟି ତରଫରୁ କୁହାଯାଇଛି ଯେ, ଯଦି ଆମ୍ ଆଦମୀ ପାର୍ଟି ସହିତ ତାଙ୍କର ମେଣ୍ଟ ରୁହେ, ତେବେ ସେମାନଙ୍କର କ୍ଷତି ହେବ । ଭାରତୀୟ ଟ୍ରାଇବଲ ପାର୍ଟିର ସଙ୍ଗଠନ ଦୁର୍ବଳ ହେବ । ଖାଲି ସେତିକି ନୁହେଁ ତାଙ୍କ ପାର୍ଟିକୁ ଭାଙ୍ଗିବାକୁ ମଧ୍ୟ ପ୍ରୟାସ ହେଇପାରେ । ତେଣୁ ସେମାନେ ଆମ୍ ଆଦମୀ ପାର୍ଟି ସହିତ ମେଣ୍ଟ ଭାଙ୍ଗିବାକୁ ନିଷ୍ପତ୍ତି ନେଇଛନ୍ତି । ଏଥିସହିତ ଆଗାମୀ ନିର୍ବାଚନରେ ଭାରତୀୟ ଟ୍ରାଇବଲ ପାର୍ଟି ଗୁଜରାଟରେ ଏକାକି ନିର୍ବାଚନକୁ ଓହ୍ଲାଇବ ।
ଗୁଜରାଟରେ ୧୮୨ ଆସନରୁ ୨୭ଟି ସିଟରେ ଆଦିବାସୀ ସମାଜର ପ୍ରଭାବ ରହିଛି । ବିଭିନ୍ନ ନିର୍ବାଚନମଣ୍ଡଳୀରେ ହାର-ଜିତ୍ ଫଇସଲା ମଧ୍ୟ ଆଦିବାସୀ ଭୋଟରମାନେ ନିର୍ଣ୍ଣୟ କରିଥାନ୍ତି । ଯେଉଁ କାରଣରୁ ଆମ୍ ଆଦମୀ ପାର୍ଟି ନିର୍ବାଚନ ପୂର୍ବରୁ ଗୁଜରାଟରେ ଭାରତୀୟ ଟ୍ରାଇବଲ ପାର୍ଟି ସହିତ ହାତ ମିଶାଇଥିଲା । ହେଲେ ନିର୍ବାଚନ ପୂର୍ବରୁ ଦୁଇଦଳ ଭିତରେ ମେଣ୍ଟ ଭାଙ୍ଗିଯାଇଛି । ତେବେ ଆମ୍ ଆଦମୀ ପାର୍ଟି ପକ୍ଷରୁ ବର୍ତ୍ତମାନ ସୁଦ୍ଧା ଏନେଇ କୌଣସି ପ୍ରତିକ୍ରିୟା ଦିଆଯାଇନାହିଁ ।
ଗତ କିଛି ସମୟ ଧରିି ଗୁଜରାଟରେ ଆପ୍ ସଂଯୋଜକ ଅରବିନ୍ଦ କେଜରିୱାଲ ସକ୍ରିୟ ରହିଛନ୍ତି । ଚଳିତବର୍ଷ ସେ ଏକାଧିକ ଥର ଗୁଜରାଟ ଗସ୍ତ କରି ସେଠାରେ ମାହୋଲ ପ୍ରସ୍ତୁତ କରିଛନ୍ତି । ତେବେ ବିଜେପିକୁ ଟକ୍କର ଦେବାକୁ ଆପ୍ ଜୋରସୋରରେ ଉଦ୍ୟମ କରୁଛି । ହେଲେ ଶେଷ ମୁହୂର୍ତ୍ତରେ ଦଳକୁ ଝଟକା ଦେଇଛି ଭାରତୀୟ ଟ୍ରାଇବଲ ପାର୍ଟି ।