କେନ୍ଦ୍ର ସରକାରଙ୍କ ପାଇଁ ଖୁସିଖବର । ଲଗାତାର ଦ୍ୱିତୀୟ ମାସରେ ଜିଏସଟି ରାଜସ୍ୱ ଆଦାୟ ୧ ଲକ୍ଷ କୋଟି ଟପିଲା ।
କେନ୍ଦ୍ର ସରକାରଙ୍କ ପାଇଁ ଖୁସି ଖବର । ଡିସେମ୍ବର ମାସରେ ଦେଶର ଜିଏସଟି ରାଜସ୍ୱ ୧୦୩,୧୮୪ କୋଟି ଟଙ୍କାରେ ପହଞ୍ଚିଛି । ଏହା ଡିସେମ୍ବର ୨୦୧୮ ତୁଳନାରେ ୧୬ ପ୍ରତିଶତ ଅଧିକ ଥିବାବେଳେ ନଭେମ୍ବର ୨୦୧୯ ତୁଳନାରେ ସାମାନ୍ୟ କମ । ନଭେମ୍ବର ୨୦୧୯ରେ ଏହା ୧୦୩,୪୯୨ କୋଟି ଓ ଡିସେମ୍ବର ୨୦୧୮ରେ ୯୪,୭୨୬ କୋଟି ଟଙ୍କା ଥିଲା ।
Kanak News is now on WhatsApp
Join and get latest news updates delivered to you via WhatsApp
କେନ୍ଦ୍ର ଅର୍ଥମନ୍ତ୍ରାଳୟର ତଥ୍ୟ ଅନୁସାରେ ଡିସେମ୍ବର ମାସରେ ଓଡ଼ିଶାରୁ ୨୩୮୩ କୋଟି ଟଙ୍କାର ଜିଏସଟି ରାଜସ୍ୱ ସଂଗ୍ରହ କରାଯାଇଛି । ଏହା ଡିସେମ୍ବର ୨୦୧୮ର ଜିଏସଟି ରାଜସ୍ୱ ୨୩୪୭ କୋଟି ତୁଳନାରେ ୨ ପ୍ରତିଶତ ଅଧିକ । ଦେଶର ଜିଏସଟି ରାଜସ୍ୱ ସଂଗ୍ରହ ଗତ ଅଗଷ୍ଟ ମାସଠାରୁ ୧ ଲକ୍ଷ କୋଟିରୁ କମ ରହିଆସିଥିଲା, କିନ୍ତୁ ନଭେମ୍ବର ମାସରେ ଏହା ପୁଣି ୧ ଲକ୍ଷ କୋଟି ଉପରକୁ ଯାଇଥିଲା । ଡିସେମ୍ବରରେ ପୁଣି ଥରେ ଏହା ୧ ଲକ୍ଷ କୋଟି ଛୁଇଁପାରିଛି ।
ଡିସେମ୍ବର ମାସରେ ସଂଗ୍ରହ ହୋଇଥିବା ୧୦୩,୧୮୪ କୋଟିରୁ କେନ୍ଦ୍ରୀୟ ଜିଏସଟି ଟଙ୍କା ୧୯,୯୬୨ କୋଟି, ରାଜ୍ୟ ଜିଏସଟି ଟଙ୍କା ୨୬,୭୯୨ କୋଟି, ଇଣ୍ଟିଗ୍ରେଟେଡ ଜିଏସଟି ୪୮,୦୯୯ କୋଟି ଟଙ୍କା ଓ ସେସ ୮୩୩୧ କୋଟି ଟଙ୍କା ଅନ୍ତର୍ଭୁକ୍ତ । ୨୦୧୯-୨୦ ଆର୍ଥିକ ବର୍ଷ ପାଇଁ ଜିଏସଟି ଆଦାୟ ଲକ୍ଷ୍ୟ ୧୩.୭୧ ଲକ୍ଷ କୋଟି ରଖାଯାଇଛି । ଜିଏସଟି ବ୍ୟବସ୍ଥାକୁ ସରଳ କରିବାକୁ ଡିସେମ୍ବର ମାସରେ ଜିଏସଟି ପରିଷଦ କେତେକ ପଦକ୍ଷେପ ନେଇଥିଲା ।
ସବୁଠୁ ବଡ କଥା ହେଉଛି ନାଗାଲାଣ୍ଡରେ ଜିଏସଟି ରାଜସ୍ୱ ସଂଗ୍ରହ ୮୮ ପ୍ରତିଶତ ବୃଦ୍ଧି ପାଇଛି । ୨୦୧୮ ଡିସେମ୍ବରରେ ନାଗାଲାଣ୍ଡରେ ୧୭ କୋଟି ଟଙ୍କା ଜିଏସଟି ବାବଦକୁ ସଂଗ୍ରହ କରାଯାଇଥିଲା । ୨୦୧୯ ଡିସେମ୍ବରରେ ଏହା ୩୧ କୋଟିକୁ ବୃଦ୍ଧି ପାଇଛି ।