ବେଦୀରେ କନିଆଁ, ବାଟରେ ବର । ପଶ୍ଚିମବଙ୍ଗରୁ ଓଡ଼ିଶା ବାହା ହେବା ପାଇଁ ଆସୁଥିବା ଦୁଇ ବର ବାଲେଶ୍ୱର ସୀମାରେ ଅଟକ ।
କଡ଼ାକଡ଼ି ଯାଂଚ ଯୋଗୁଁ ଆଗକୁ ବଢ଼ିପାରିଲାନି ବର ଗାଡ଼ି
କନକ ବ୍ୟୁରୋ: କରୋନା କାଳରେ ଦହଗଞ୍ଜ ହେଉଛନ୍ତି ଲୋକେ । କେଉଁଠି ଚିକିତ୍ସା ପାଇଁ ରୋଗୀ ହସ୍ପିଟାଲକୁ ଚାହିଁ ରହିଛି ତ ଆଉ କେଉଁଠି ଶ୍ମଶାନରେ ଅପେକ୍ଷା କରି ରହିଛି ଶବ । ଭୂତାଣୁ କେବଳ ସ୍ୱାସ୍ଥ୍ୟ ସେବାକୁ ଦୋହଲାଇ ଦେଇନି, ବରଂ ସାମାଜିକ ସଂକଟ ଭାବେ ଠିଆ ହୋଇଛି । ପଶ୍ଚିମବଙ୍ଗ ସୀମାନ୍ତ ବାଲେଶ୍ୱର ଜିଲ୍ଲାରୁ ଆସିଛି ଏମିତି ଏକ ଖବର, ଯେଉଁଥିରେ ଭୂତାଣୁ ଯୋଗୁଁ ସୀମାରେ ଅଟକି ରହିଛି ବର ଆଉ ବରକୁ ଅପେକ୍ଷା କରି ରହିଛି କନିଆଁ ।
Kanak News is now on WhatsApp
Join and get latest news updates delivered to you via WhatsApp
ପଡ଼ୋଶୀ ରାଜ୍ୟରୁ ବାହା ହେବା ପାଇଁ ବାହାରି ଆସିଥିବା ବର ହେଲେ ରାସ୍ତା ଉପରେ ଅସହାୟ ଅବସ୍ଥାରେ ଅଟକି ରହିଥିଲେ । କିଏ ଜାଣିଥିଲା, ଯେଉଁ ବାହାଘର ପାଇଁ ବର ଏବଂ ବରଘର ଲୋକ ଏତେ ପ୍ରସ୍ତୁତି କରିଥିଲେ, ତା ଉପରେ କରୋନାର ଗ୍ରହଣ ଲାଗିଯିବ । ବର ଅଛି, ସାଥିରେ କୋଇଲି ବର ବା ମାରକଣ୍ଡି ସହ ସମ୍ପର୍କୀୟ ଅଛନ୍ତି । ହେଲେ କରୋନା କଟକଣା ଯୋଗୁଁ ବର ଗାଡ଼ି ଆଗକୁ ବଢିପାରୁନି । ଏଭଳି ସ୍ଥିତିରେ କୌଣସି ବିକଳ୍ପ ନପାଇ ଲକ୍ଷ୍ମଣନାଥ ତନଖୀ ଫାଟକରେ ଅଟକିରହିଛି ବର।
କେବଳ ଜଣେ ନୁହେଁ ଆଉ ଜଣେ ମଧ୍ୟ ଫାଟକରେ ଅଟକି ରହିଛନ୍ତି । ଜଣେ ବାଲେଶ୍ୱର ବାହା ହେବା ପାଇଁ ଆସୁଥିବା ବେଳେ ଆଉ ଜଣେ ବେଲଦାରୁ ଜଗତସିଂପୁର ଜିଲ୍ଲାର ପାରାଦ୍ୱୀପକୁ ଆସୁଥିଲେ । ହେଲେ କରୋନାର ବେଙ୍ଗଲ ଷ୍ଟ୍ରେନ୍ ଯୋଗୁଁ ଦୁଇ ଜଣଙ୍କୁ ଆଗକୁ ବଢ଼ିବାରେ ଅସୁବିଧା ହେଉଛି । କାରଣ, ପଶ୍ଚିମବଙ୍ଗରୁ ଆସୁଥିବା ସମସ୍ତଙ୍କ ସୀମାରେ ଯାଂଚ କରାଯାଉଛି । ଏଭଳି ସ୍ଥିତିରେ ଏମାନଙ୍କର ନା’ ଆର୍ଟିପିସିଆର୍ ରିପୋର୍ଟ ବି ନାହିଁ ।
ପଶ୍ଚିମବଙ୍ଗରୁ ଚିହ୍ନଟ ହୋଇଥିବା ଟ୍ରିପଲ ମ୍ୟୁଟାଂଟ କରୋନା ଭୂତାଣୁକୁ ନେଇ ରାଜ୍ୟ ସରକାର ଅଧିକ ସଚେତନ ହୋଇଛନ୍ତି । ସରକାରଙ୍କ ନିର୍ଦ୍ଦେଶ ପରେ ପଶ୍ଚିମବଙ୍ଗରେ ସୀମାରେ ଚେକିଂ କଡାକଡି କରାଯାଇଛି । ଅତ୍ୟାବଶ୍ୟକ ସାମଗ୍ରୀ ପରିବହନ କରୁଥିବା ଗାଡିଗୁଡିକୁ ପ୍ରବେଶ ଅନୁମତି ଦିଆଯାଇଥିବା ବେଳେ ଯେଉଁମାନଙ୍କ ୪୮ ଘଂଟା ପୂର୍ବରୁ ଆରଟି-ପିସିଆର ଟେଷ୍ଟ ରିପୋର୍ଟ ନେଗେଟିଭ ଥିବ ସେମାନଙ୍କୁ ଆସିବା ପାଇଁ ଅନୁମତି ଦିଆଯାଉଛି ।