ପ୍ରେମିକାର ଆତ୍ମହତ୍ୟା ଧମକ ଶୁଣି ବେଦୀରୁ ଧାଇଁଲା ବର । ମଙ୍ଗୁଳା କନ୍ୟା ମଥାରେ ସିନ୍ଦୂର ଦେଇ ବାହା ହେଲା ଭୋଜିକୁ ଆସିଥିବା ବସ କଣ୍ଡକ୍ଟର । କର୍ଣ୍ଣାଟକରେ ରିପିଟ୍ ହେଲା ରବ ନେ ବନା ଦୀ ଯୋଡି…
କନକ ବ୍ୟୁରୋ: ଧମକ ଦେଲା ପ୍ରେମିକା, ବେଦୀ ଛାଡିଦେଲା ବର । ବାହାଘର ପୂର୍ବରୁ ପ୍ରେମିକା ସହ ବର ଫେରାର । ଚେତାବନୀ ଦେଲା ପ୍ରେମିକା, ବାହା ବେଦୀରୁ ଉଠି ପଳାଇଲା ବର । ପ୍ରେମିକାର ଆତ୍ମହତ୍ୟା ଧମକ ପାଇ ଆତ୍ମସମର୍ପଣ କଲା ବର । ତମେ ମୋର ହେବନି ତ ଆଉ କାହାର ହେବନି… ମୋ ଛଡା ଆଉ କାହାକୁ ବାହା ହେଲେ ବେଦୀ ଆଗରେ ଆତ୍ମହତ୍ୟା କରିବି, ତମରି ସାମ୍ନାରେ ବିଷ ପିଇଦେବି… ଫୋନରେ ପ୍ରେମିକାର ବାରମ୍ବାର ଧମକ ପରେ ବ୍ୟସ୍ତ ହୋଇପଡିଥିଲା ବର । ଆଉ ନିଜ ପ୍ରାଣପ୍ରିୟାକୁ ବଞ୍ଚାଇବାକୁ ସିଧା ଧାଇଁଥିଲା ପ୍ରେମିକା ପାଖକୁ । ଏପଟେ ବର ନିଖୋଜ ପରେ ଭାଙ୍ଗିପଡିଥିଲା କନିଆଁ । ପ୍ରେମ- ବିବାହର ଏଭଳି ଏକ କରୁଣ କାହାଣୀ ଆସିଛି କର୍ଣ୍ଣାଟକରୁ…
Kanak News is now on WhatsApp
Join and get latest news updates delivered to you via WhatsApp
ତେବେ କର୍ଣ୍ଣାଟକ ଚିକ୍କାମାଙ୍ଗାଲୁରୁର ଏକ ଗାଁରେ ଦୁଇ ଭାଇଙ୍କର ସାଙ୍ଗରେ ବାହାଘର ହେଉଥିଲା । ଗୋଟିଏ ମଣ୍ଡପରେ ଦୁଇ ଭାଇ ଅଶୋକ ଓ ନବୀନଙ୍କ ବିବାହ ହେଉଥିଲା । ଜଣେ ଭାଇର ବାହାଘର ଚାଲିଥିବା ବେଳେ ଅନ୍ୟ ଜଣେ ଭାଇର ବାହାଘର ପାଇଁ ପ୍ରସ୍ତୁତି ଚାଲିଥିଲା । ହେଲେ ଏତିକି ବେଳେ ଘଟିଥିଲା ଅଘଟଣ । ହଠାତ କୁଆଡେ ଅନ୍ତର୍ଦ୍ଧାନ ହୋଇଗଲା ବର, ନିଖୋଜ ହୋଇଗଲେ ନବୀନ । ବହୁ ଖୋଜାଖୋଜି ପରେ ବି ବରର କୌଣସି ଅତାପତ୍ତା ମିଳିଲାନି ।
ସେପଟେ ବର ନିଖୋଜ ଘଟଣା ଶୁଣି ମୁଣ୍ଡରେ ହାତ ଦେଇଦେଲେ କନିଆ ଘରଲୋକେ । ବିବାହ ଉତ୍ସବରେ ସାମିଲ ପାଇଁ ଧିରେଧିରେ ସମ୍ପର୍କୀୟ ପହଞ୍ଚୁଥିବା ବେଳେ କେମିତି ସେମାନଙ୍କ ସାମ୍ନା କରିବେ, କେମିତି ସେମାନଙ୍କୁ ମୁହଁ ଦେଖାଇବେ ଏଇ ଚିନ୍ତାରେ ଥିଲେ କନିଆ ସିନ୍ଧୁଙ୍କ ପରିବାର । ଝିଅ ତାଙ୍କର ସବୁଦିନ ପାଇଁ ମଙ୍ଗୁଳା ହୋଇ ରହିଯିବ, ଘରେ କାନ୍ଦ ବୋବାଳି ପଡିଥିବା ବେଳେ ମଙ୍ଗୁଳା କନ୍ୟା ମଥାରେ ସିନ୍ଦୁର ଦେଇ ସାତ ଜନମର ସାଥି କରିବାକୁ ହାତ ବଢାଇଥିଲେ ଜଣେ ବସ କଣ୍ଡକ୍ଟର । ଚନ୍ଦ୍ରପା ନାମକ ଜଣେ ଯୁବକ ବିବାହ ଉତ୍ସବକୁ ନିମନ୍ତ୍ରିତ ଅତିଥି ହୋଇ ଆସିଥିବା ବେଳେ କନ୍ୟାର ଏ ଦୁଃଖ ଦେଖି ନିଜକୁ ସମ୍ଭାଳି ପାରିନଥିଲେ । ଆଉ ବିବାହ ପାଇଁ ହାତ ବଢାଇଥିଲେ । ବସ କଣ୍ଡକ୍ଟରଙ୍କ ଏଭଳି ମହାନକାମ ପରେ ବଡ ବିପତ୍ତିରୁ ବର୍ତ୍ତିଯାଇଥିଲା କନ୍ୟାଘର ।
ତେବେ କର୍ଣ୍ଣାଟକର ଏ କାହାଣୀ ବଲିଉଡ ସିନେମା ରବ ନେ ବନାଦୀ ଯୋଡି କଥା ମନେପକାଇ ଦେଇଛି । ଯେଉଁଠି ଅନୁଷ୍କାଙ୍କ ବିବାହକୁ ସାହାରୁଖ ଖାନ ଅତିଥି ହୋଇଯାଉଛନ୍ତି । ମାତ୍ର ବିବାହର କେଇ ମୁହୂର୍ତ୍ତ ପୂର୍ବରୁ ଏକ ଦୁର୍ଘଟଣାରେ ବରର ମୃତ୍ୟୁ ହେଉଛି ଆଉ କିଙ୍କ ଖାନ୍ କନ୍ୟାକୁ ବାହାହୋଇ ବଡ ହୃଦୟର ପରିଚୟ ଦେଉଛନ୍ତି । ୨୦୦୮ର ଏହି ସିନେମା କାହାଣୀ ୨୦୨୧ରେ ସତ ହୋଇଛି । ଯାହାକୁ ଦେଖି ସମସ୍ତଙ୍କ ମୁହଁରୁ ବାହାରି ଆସୁଛି ରବ୍ ନେ ବନାଦୀ ଯୋଡି…