ବାହାଘର ଭାଙ୍ଗିଦେଲା ମଟନ । ବରଯାତ୍ରୀଙ୍କୁ ନିର୍ଦ୍ଧୁମ ଛେଚିଲେ, ୬ ଲକ୍ଷ ଟଙ୍କା ଦେଇ ବର ମୁକୁଳିଲେ ।

17,075

କନକ ବ୍ୟୁରୋ : ମଟନ ମାଗିବା ପଡିଲା ମହଙ୍ଗା । ଶିଶୁପାଳ ହୋଇ ଫେରିଲା ବର । କେବଳ ବିବାହ ଭାଙ୍ଗିଲାନି ବରଂ ଉତ୍ତମ ମଧ୍ୟମ ଖାଇଲେ ବରଯାତ୍ରୀ । ବିବାହ ଭୋଜିରେ ବରଯାତ୍ରୀଙ୍କ ଉନ୍ମତକାଣ୍ଡ ପରେ ଶିଶୁପାଳ ହୋଇ ଫେରିଛି ବର । ଏଭଳି ଏକ ଘଟଣା ମାହାଙ୍ଗା ଅଞ୍ଚଳରେ ଚର୍ଚ୍ଚାର ବିଷୟ ପାଲଟିଛି ।

ସୂଚନା ଅନୁଯାୟୀ, ଗତ ରବିବାର ଦିନ କେନ୍ଦ୍ରାପଡାର ମହାକାଳପଡାରୁ ମାହାଙ୍ଗାର ଦେବରିଓ ଗାଁକୁ ବର ହୋଇ ଆସିଥିଲେ ପ୍ରିୟରଞ୍ଜନ । କନ୍ୟା ଘରେ ବର ପହଞ୍ଚିବା ପରେ ଭୋଜି ଭାତକୁ ନେଇ ବରଯାତ୍ରୀଙ୍କ ସହ କନ୍ୟାପକ୍ଷଙ୍କର ବଚସା ଆରମ୍ଭ ହୋଇଥିଲା । ବରଯାତ୍ରୀ ଅଧିକ ମଟନ ଖାଇବାକୁ ମାଗିବା ସହ କନ୍ୟା ଘର ଲୋକଙ୍କୁ ଖରାପ ଭାଷାରେ ଗାଳିଗୁଲଜ କରିବାରୁ ବିବାଦର ସୁତ୍ରପାତ ଆରମ୍ଭ ହୋଇଥିଲା ।

ଚେୟାର ଭାଙ୍ଗିବା ସହ କନ୍ୟାର ଖୁଡିଙ୍କୁ ମାଡ ମାରିଥିଲେ ବରପକ୍ଷ । ଏପରିକି ଖୋଦ ବର ନିଜେ ଛାତ ଉପରକୁ ଯାଇ ପାଟିତୁଣ୍ଡ କରିବା ପରେ ବିବାଦ ଅଧିକ ଉଗ୍ରରୂପ ନେଇଥିଲା । ଆଉ ଏହାପରେ କନ୍ୟାର ଗାଁ ଲୋକ ବରଯାତ୍ରୀଙ୍କୁ ଉତ୍ତମ ମଧ୍ୟମ ଦେଇଥିଲେ । ତେବେ ବିବାଦର ସମାଧାନ ପୂର୍ବରୁ ଖୋଦ୍ କନ୍ୟା ପ୍ରିୟରଞ୍ଜନଙ୍କୁ ବିବାହ କରିବେ ନାହିଁ ବୋଲି ସଫା ସଫା ମନା କରିଦେଇଥିଲେ । ବରପକ୍ଷ ମଦ ପିଇ ଏଭଳି ଆଚରଣ କରିଥିବା ଅଭିଯୋଗ ଆଣିଥିଲେ କନ୍ୟାପକ୍ଷ । ଆଉ ଏହାସହ ବର ଓ ବରପକ୍ଷଙ୍କୁ ଅଟକ ରଖିଥିଲେ ।

ବରପକ୍ଷ ଗ୍ରାମରେ ଅଟକ ଥିବାର ଖବର ପାଇ ଘଟଣାସ୍ଥଳରେ ପହଞ୍ଚିଥିଲା ସ୍ଥାନୀୟ ପୋଲିସ । ତେବେ କ୍ଷତିପୂରଣ ବାବଦକୁ ଟଙ୍କା ଦେବା ପରେ ବରପକ୍ଷ ଏଠାରୁ ମୁକୁଳିବେ ବୋଲି ଜିଦ୍ ଧରିଥିଲେ କନ୍ୟାପକ୍ଷ । ଆଉ ଶେଷରେ ପୋଲିସ ଉପସ୍ଥିତିରେ ୬ ଲକ୍ଷ ଟଙ୍କା ଦେଇ ଦୀର୍ଘ ୧୮ ଘଣ୍ଟା ପରେ କନ୍ୟା ବିନା ଶିଶୁପାଳ ହୋଇ ଫେରିଥିଲେ ପ୍ରିୟରଞ୍ଜନ । ଆଉ ମଙ୍ଗୁଳା କନ୍ୟାକୁ ସ୍ଥାନୀୟ ଅଞ୍ଚଳର ଅନ୍ୟ ଜଣେ ଯୁବକ ବିବାହ କରିଥିବା ଜଣାପଡିଛି । ତେବେ ବରପକ୍ଷର କହିବା ଅନୁଯାୟୀ, କନ୍ୟାଘର ଲୋକେ ପ୍ରଥମେ ତାଙ୍କୁ ଖରାପ ବ୍ୟବହାର କରିଥିଲେ । ଏହାକୁ ବିରୋଧ କରିବାରୁ ମୋ ଭାଉଜଙ୍କୁ ଗାଲିଗୁଲଜ କରିଥିଲେ କନ୍ୟାପକ୍ଷ । ତେଣୁ ତାଙ୍କୁ ଭୁଲ ମାଗିଲେ ହିଁ ବିବାହ କରିବି ବୋଲି କହିଥିଲେ ବର । କିନ୍ତୁ କୌଣସି କାରଣବଶଃତ କନ୍ୟା ବିବାହ କରିବାରୁ ମନା କରିଦେଇଥିଲେ ।

Comments are closed.