ପୁରୀରେ ଗ୍ରୀନ ଫିଲଡ ବିମାନ ବନ୍ଦର ପାଇଁ ରିପୋର୍ଟ ପ୍ରସ୍ତୁତ : କେନ୍ଦ୍ର ବିମାନ ଚଳାଚଳ ମନ୍ତ୍ରୀ କହିଲେ ରାଜ୍ୟ ସରକାରଙ୍କ ଅନୁମତିକୁ ଅପେକ୍ଷା
ଝାରସୁଗୁଡା ବିମାନ ବନ୍ଦରର ଫେଜ-୨ ଉନ୍ନତି କରଣ କାର୍ଯ୍ୟ ପାଇଁ ୧୮୦ ଏକର ଜମି ଯୋଗାଇ ଦେବାକୁ କଲେ ଅନୁରୋଧ
କନକ ବ୍ୟୁରୋ : ପୁରୀଠାରେ ଗ୍ରୀନ ଫିଲଡ ବିମାନ ବନ୍ଦର ତିଆରି ପାଇଁ ସମସ୍ତ ରିପୋର୍ଟ ତିଆରି ସରିିଛି । ଏହି ରିପୋର୍ଟକୁ ରାଜ୍ୟ ସରକାରଙ୍କୁ ପଠାଯାଇଛି । ରାଜ୍ୟ ଅନୁମତି ଦେବା ପରେ ଖୁବଶୀଘ୍ର ପୁରୀରେ ଗ୍ରୀନ ଫିଲଡ ଏୟାର ପୋର୍ଟ ନିର୍ମାଣ ପାଇଁ ପଦକ୍ଷେପ ଗ୍ରହଣ କରାଯିବ । କେନ୍ଦ୍ର ବେସାମରିକ ବିମାନ ଚଳାଚଳ ମନ୍ତ୍ରୀ ଜ୍ୟୋତିରାଦିତ୍ୟ ସିନ୍ଧିଆ ଏହା କହିଛନ୍ତି ।
Kanak News is now on WhatsApp
Join and get latest news updates delivered to you via WhatsApp
ସୋମବାର ଝାରସୁଗୁଡ଼ାସ୍ଥିତ ବୀର ସୁରେନ୍ଦ୍ର ସାଏ ବିମାନବନ୍ଦରରେ ଆୟୋଜିତ ଉଡ଼ାନ୍ ଉତ୍ସବରେ ଯୋଗଦେବା ଅବସରରେ କେନ୍ଦ୍ର ମନ୍ତ୍ରୀ ଶ୍ରୀ ସିନ୍ଧିଆ କହିଛନ୍ତି ଯେ ପୁରୀ ଠାରେ ଏକ ଗ୍ରିନ୍ଫିଲ୍ଡ୍ ବିମାନବନ୍ଦର ନିର୍ମାଣ କରାଯିବ । କେନ୍ଦ୍ରମନ୍ତ୍ରୀଙ୍କ ଏହି ମନ୍ତବ୍ୟ ପରେ ପୁରୀରେ ଅନ୍ତର୍ଜାତୀୟ ସ୍ତରର ବିମାନବନ୍ଦର ହେବା ଏକପ୍ରକାର ନିଶ୍ଚିତ ହୋଇଯାଇଛି । ଅପରପକ୍ଷେ ରାଜ୍ୟ ସରକାରଙ୍କ ବେସମାରିକ ବିମାନ ବିଭାଗର ଜଣେ ବରିଷ୍ଠ ଅଧିକାରୀ କହିଛନ୍ତି, ପ୍ରାୟ ୧୨ଲକ୍ଷ ଟଙ୍କା ଖର୍ଚ୍ଚ କରି ଭାରତୀୟ ବିମାନବନ୍ଦର କର୍ତ୍ତୃପକ୍ଷଙ୍କ ମାଧ୍ୟମରେ ଡିପିଆର୍ ପ୍ରସ୍ତୁତ କରିଥିଲୁ । ଏହାକୁ ଭିତ୍ତି କରି କେନ୍ଦ୍ରୀୟ ଟିମ୍ ବିମାନବନ୍ଦର ପାଇଁ ଚିହ୍ନଟ ହୋଇଥିବା ସ୍ଥାନ ପରିଦର୍ଶନ କରିଥିଲେ ।
ସେମାନେ କ୍ଷେତ୍ର ପରିଦର୍ଶନ ପରେ ମନ୍ତ୍ରଣାଳୟରେ ଫିଜିବିଲିଟି ରିପୋର୍ଟ ଦାଖଲ କରିଥିଲେ। ଏହାକୁ ସବୁଜ ସଂକେତ ମିଳିଛି । ଏହାପରେ ଆମକୁ ବୈଷୟିକ ରିପୋର୍ଟ ମଗାଯାଇଛି । ଏନେଇ ଏକ ଘରୋଇ ସଂସ୍ଥାକୁ ନିୟୋଜିତ କରାଯାଇଛି । ଏଥିରେ ବିମାନବନ୍ଦର ପାଇଁ କ’ଣ ବାଧକ ଅଛି, କ’ଣ ସୁବିଧା ଅଛି, ଏୟାରଷ୍ଟ୍ରିପ୍ କେଉଁଠି ହେବ, କେତେ ଜମି ଆବଶ୍ୟକ, ଟର୍ମିନାଲ ବିଲଡିଂ କେଉଁ ଦିଗରେ ହେବ, ରନୱେ କେଉଁ ଦିଗରେ ଓ କେତେ ଲମ୍ବର ହେବ, ବିମାନ ପାର୍କିଂ ଅଞ୍ଚଳ କେଉଁଠି ହେବ, ଏଟିସି ଟାୱାର କେଉଁ ଦିଗରେ ଓ କେଉଁଠି ନିର୍ମାଣ ହେବ, ପବନର ଦିଗ ଓ ବେଗ କେଉଁଠି କେତେ ରହୁଛି ଇତ୍ୟାଦି ବିଷୟ ଉପରେ ମାସେ ମଧ୍ୟରେ ରିପୋର୍ଟ ଦିଆଯିବ ।
କେନ୍ଦ୍ରର ମଞ୍ଜୁରୀ ମିଳିବା ପରେ ବିମାନବନ୍ଦରକୁ ପିପିପି ମୋଡରେ ନିର୍ମାଣ କରାଯିବ କି ରାଜ୍ୟ ସରକାର ନିଜ ଅର୍ଥରେ ନିର୍ମାଣ କରିବେ ସେନେଇ ନିଷ୍ପତ୍ତି ହେବ । ଏ ନିଷ୍ପତ୍ତି ରାଜ୍ୟ ସରକାର ନେବେ । ତେଣୁ ଆମେ ଏବେ କେବଳ କେନ୍ଦ୍ରର ନୀତିଗତ ମଞ୍ଜୁରୀକୁ ଅପେକ୍ଷା କରିଛୁ । ଏହା ମିଳିଲେ ଯଥାସମ୍ଭବ ଶୀଘ୍ର ପୁରୀରେ ଏକ ଅନ୍ତର୍ଜାତୀୟ ମାନର ଗ୍ରିନ୍ଫିଲ୍ଡ ବିମାନବନ୍ଦର ନିର୍ମାଣ ହେବ ବୋଲି ସମ୍ପୃକ୍ତ ଅଧିକାରୀ କହିଛନ୍ତି ।