ଭଡାଟିଆ ଏବଂ ଘର ମାଲିକଙ୍କ ପାଇଁ ସରକାରୀ ଆଇନ୍ ! ଏଣିକି ଆଉ ଚଳିବନି ଘର ମାଲିକଙ୍କ ମନମାନି: ଭଡାଟିଆଙ୍କୁ ଘରୁ ତଡିଲେ ଏବେ ସିଧା ନିଆଯିବ କାର୍ଯ୍ୟାନୁଷ୍ଠାନ
୨୪ ଘଂଟା ପୂର୍ବରୁ ଦେବାକୁ ପଡିବ ଲିଖିତ ନୋଟିସ୍, ୨ ମାସରୁ ଅଧିକ ସିକ୍ୟୁରିଟ୍ ଚାର୍ଜ ମାଗିପାରିବେନି ମାଲିକ
କନକ ବ୍ୟୁରୋ: ଖୁବ ଶୀଘ୍ର ଦେଶବ୍ୟାପୀ ଲାଗୁ ହେବ ମଡେଲ ଟେନାନ୍ସି ଆକ୍ଟ ତଥା ଆଦର୍ଶ ଭଡା ଆଇନ । ତେବେ ବର୍ତ୍ତମାନ ସମୟରେ ଉଭୟ ଭଡା ଘର ଏବଂ ଦୋକାନକୁ ନେଇ ସେଭଳି କୌଣସି ନିୟମ କାନୁନ ନଥିବା ବେଳେ ଏହି ଆଇନ ଆସିବା ପରେ ଘର ମାଲିକଙ୍କୁ ପ୍ରୋତ୍ସାହନ ମିଳିବ ବୋଲି ଆଶା ରଖିଛନ୍ତି ସରକାର । ଏନେଇ କେନ୍ଦ୍ର ଗୃହ ଓ ସହରାଂଚଳ ବ୍ୟାପାର ସଚିବ ଦୁର୍ଗା ଶଙ୍କର ମିଶ୍ରଙ୍କ କହିବାନୁସାରେ, ୨୦୧୧ର ଜନଗଣନା ଅନୁସାରେ, ଦେଶରେ ପ୍ରାୟ ୧.୧ କୋଟି ଘର ଖାଲି ପଡିଛି । ଯାହାର ମୁଖ୍ୟ କାରଣ ହେଉଛି ଲୋକେ ଘର ଭଡା ଦେବାକୁ କୁଣ୍ଠାବୋଧ କରୁଛନ୍ତି । ତେବେ ଏହି ଆଇନ ଆସିବା ଦ୍ୱାରା ଘର ଭଡାକୁ ନେଇ ଏବେ କୌଣସି ପ୍ରକାରର ଦ୍ୱନ୍ଦ୍ୱ ରହିବ ନାହିଁ ବୋଲି ଶ୍ରୀମିଶ୍ର କହିଛନ୍ତି । ତେବେ ସରକାରଙ୍କ ଏହି ନୂଆ ଆଇନରେ କଣ ସବୁ ନୀତି ନିୟମ ରହିଛି ଆସନ୍ତୁ ଜାଣିବା ।
Kanak News is now on WhatsApp
Join and get latest news updates delivered to you via WhatsApp
ମଡେଲ ଟେନାନ୍ସି ଆକ୍ଟ ଅନୁସାରେ, ଏଣିକି ଭଡାଟିଆଙ୍କୁ ରେଂଟ ଏଗ୍ରିମେଂଟର ଧାର୍ଯ୍ୟ ସମୟ ର୍ପୂବରୁ ବାହାର କରିପାରିବେ ନାହିଁ ଘରମାଲିକ । ତେବେ ଯଦି କୌଣସି ଭଡାଟିଆ ଦୁଇ ମାସ ଯାଏଁ ଭଡା ଦେଇ ନଥିବେ କିମ୍ବା ଭଡାରେ ନେଇଥିବା ଘରକୁ ସେ ଖାରାପ କାମରେ ନିୟୋଜିତ କରିଥିବେ ତେବେ ଏଭଳି ପରିସ୍ଥିତିରେ ଘରମାଲିକ ଭଡାଟିଆଙ୍କୁ ନିଜ ଘରୁ ବାହାର କରିପାରିବେ । ସେପଟେ ଭଡାଟିଆଙ୍କ ସୁବିଧାକୁ ମଧ୍ୟ ସରକାରଙ୍କ ଏହି ନୂଆ ନିୟମରେ ଉଲ୍ଲେଖ କରାଯାଇଛି । ତେବେ କୌଣସି ବି ଘର ମାଲିକ ବିନା କୌଣସି ପୂର୍ବ ସୂଚନା ନଦେଇ ଭଡାଟିଆଙ୍କୁ ହଠାତ୍ ଘରୁ କାଢି ପାରିବେ ନାହିଁ । ଏଥିପାଇଁ ଘର ମାଲିକଙ୍କୁ ୨୪ ଘଂଟା ପୂର୍ବରୁ ଭଡାଟିଆଙ୍କୁ ଲିଖିତ ନୋଟିସ ଦେବାକୁ ହେବ । ସେହିଭଳି ଭଡା ବାବଦକୁ ଭଡାଟିଆଙ୍କଠାରୁ ନିଆଯାଉଥିବା ସିକ୍ୟୁରିଟି ଡିପୋଜିଟ ରୂପରେ ୨ ମାସର ଭଡାରୁ ଅଧିକ ରକମ ମାଗିପାରିବେ ନାହିଁ କୌଣସି ବି ଘରମାଲିକ ।
ଯଦି ଭଡାଟିଆ ରେଂଟ ଏଗ୍ରିମେଂଟ ମୁତାବକ ସମୟ ସୀମା ଭିତରେ ଘର ବା ଦୋକାନ ଖାଲି ନକରନ୍ତି ତେବେ ମାଲିକ ଆଗାମୀ ୨ ମାସ ପର୍ଯ୍ୟନ୍ତ ତାଙ୍କଠାରୁ ଦୁଇ ଗୁଣା ଭଡା ମାଗିପାରିବେ । ସେହିଭଳି ଉଭୟ ରେଂଟ୍ ଏଗ୍ରିମେଂଟ ସରିବା ପରେ ବି ଯଦି ଭଡାଟିଆ ଘର ଖାଲି ନକରନ୍ତି ତେବେ ମାଲିକଙ୍କୁ ୪ ଗୁଣା ପର୍ଯ୍ୟନ୍ତ ରେଂଟ ମାଗିବାର ଅଧିକାର ରହିବ । ଯଦି ଘର ମାଲିକ ବିଲିଡିଂ କିମ୍ବା ଫ୍ଲାଟର ମରାମତି କରିବାକୁ ଚାହୁଁନ୍ତି ତେବେ ରିନୋଭେସନ କାମ ସରିବାର ମାସକ ପରେ ତାଙ୍କୁ ଭଡା ବଢାଇବାକୁ ଅନୁମତି ମିଳିବ । କିନ୍ତୁ ଭଡା ବଢାଇବା ପୂର୍ବରୁ ଭଡାଟିଆଙ୍କ ସହମତି ନେବା ମଧ୍ୟ ନିହାତି ଜରୁରୀ । ଯଦିଓ ଏହି ଆଇନ କେନ୍ଦ୍ର ସରକାର ପ୍ରସ୍ତୁତ କରୁଛନ୍ତି କିନ୍ତୁ ଏହାକୁ ଲାଗୁ କରିବାର ଅଧିକାର ରାଜ୍ୟ ସରକାରଙ୍କ ଉପରେ ନିର୍ଭର କରିବ ।