କନକ ବ୍ୟୁରୋ: ‘ରାଜ୍ୟରେ ଏବେ ଅଫିସର ରାଜ୍ ଚାଲିଛି’ । ଏକାଧିକ ଗୁରୁତ୍ୱପୂର୍ଣ ପ୍ରସଙ୍ଗ ଉଠାଇ ସରକାରଙ୍କ ଟାର୍ଗେଟ କରିବା ସମୟରେ ଏଭଳି କହିଛନ୍ତି ବିରୋଧୀ ଦଳ ନେତା ଜୟ ନାରାୟଣ ମିଶ୍ର ।
Kanak News is now on WhatsApp
Join and get latest news updates delivered to you via WhatsApp
ମୁଖ୍ୟ ଶାସନ ସଚିବଙ୍କୁ ବୟନ ଶିଳ୍ପ ମନ୍ତ୍ରୀ ରୀତା ସାହୁ ଭେଟିବା ପ୍ରସଙ୍ଗକୁ ଉଦ୍ଧାର କରି ସେ କହିଛନ୍ତି ଯେ, ରାଜ୍ୟରେ ଏବେ ବିଚିତ୍ର ଶାସନ ଚାଲିଛି । ଏଠି ଅଫିସରଙ୍କ ରାଜ୍ ଚାଲିଛି । ସେହିପରି ଡ୍ରାଇଭର ସଂଘ ସହ ଆଲୋଚନା ବେଳେ ପରିବହନ ମନ୍ତ୍ରୀ ବା ସଚିବ କେହି ବି ଉପସ୍ଥିତ ନଥିଲେ । ମୁଖ୍ୟ ଶାସନ ସଚବିଙ୍କ ସହ ମାତ୍ର ଜଣେ ବିଧାୟକ ଉପସ୍ଥିତ ଥିଲେ । ଖାଲି ଏତିକି ନୁହେଁ କୋଇଡା ବିଡିଓଙ୍କ ଦୁର୍ବ୍ୟବହାର ପ୍ରସଙ୍ଗ ଉଠାଇ ଜୟନାରାୟଣ କହିଛନ୍ତି ଯେ, ସରକାରୀ ଅଫିସର କାହାକୁ ମାନୁ ନାହାନ୍ତି ବୋଲି ଆକ୍ଷେପ କରିଥିଲେ । ଅଫିସର ରାଜ୍ ପ୍ରସଙ୍ଗକୁ ନେଇ ଉଭୟ କଂଗ୍ରେସ ଓ ବିଜେପି ନେତା ଓ ବିଧାୟକ ଗୃହ ଭିତରକୁ ଯାଇଥିଲେ ଏବଂ ଏନେଇ ଆଲୋଚନା କରିବାକୁ ଦାବୀ କରିଥିଲେ ।
ଏହି ପ୍ରସଙ୍ଗକୁ ନେଇ ଅପରାହ୍ନ ୪ଟା ଯାଏଁ ଗୃହ ମୁଲତବୀ ହୋଇଯିବା ପରେ ଉଭୟ ଦଳର ନେତା ଓ ବିଧାୟକ ବିଧାନସଭା ବାହାରକୁ ଆସି ସୋସିଆଲ ମିଡିଆରୁ ସଂଗୃହିତ ଫଟୋକୁ ଗଣମାଧ୍ୟମ ଆଗରେ ଦେଖାଇଥିଲେ । ଫଟୋରେ ମନ୍ତ୍ରୀ ଓ ଅଫିସରଙ୍କ ଭିତରେ ଥିବା ସମ୍ପର୍କ ତଥା ଅଫିସରଙ୍କ ପ୍ରତି ମନ୍ତ୍ରୀମାନଙ୍କର ଆନୁଗତ୍ୟ ଥିବା ଅଭିଯୋଗ କରିଥିଲେ ଜୟନାରାୟଣ ମିଶ୍ର । ଆଗକୁ ବି ଏହି ପ୍ରସଙ୍ଗକୁ ନେଇ ପ୍ରଶ୍ନ ଜାରୀ ରହିବ ବୋଲି ସେ କହିଛନ୍ତି ।