ହଟିବ ଇଣ୍ଡିଆ, ଦେଶର ନାଁ କେବଳ ରହିବ ଭାରତ । ସମ୍ବିଧାନ ସଂଶୋଧନ ପାଇଁ କେନ୍ଦ୍ର ସରକାର ପ୍ରସ୍ତୁତି ଚଳାଇଥିବା ଚର୍ଚ୍ଚା । ସଂସଦର ସ୍ୱତନ୍ତ୍ର ଅଧବେଶନରେ ଆଣିପାରନ୍ତି ପ୍ରସ୍ତାବ

କନକ ବ୍ୟୁରୋ: ଦେଶର ନାଁ ଇଣ୍ଡିଆ ହଟାଇ କେବଳ ଭାରତ କରିବାକୁ ଯୋଜନା କରୁଛନ୍ତି ମୋଦୀ ସରକାର । ସଂସଦର ସ୍ୱତନ୍ତ୍ର ଅଧିବେଶନରେ ଏ ସଂପର୍କୀତ ପ୍ରସ୍ତାବ ଆଣିପାରନ୍ତି ମୋଦୀ ସରକାର । ଜି-୨୦ ଅବସରରେ ରାତ୍ରିଭୋଜନ ପାଇଁ ରାଷ୍ଟ୍ରପତିଙ୍କ ପକ୍ଷରୁ ଦିଆଯାଇଥିବା ନିମନ୍ତ୍ରଣ ପତ୍ର ସାମ୍ନାକୁ ଆସିବା ପରେ ଏଭଳି ଚର୍ଚ୍ଚା ଜୋର ଧରିଛି । ଏହାକୁ ନେଇ ସରକାରଙ୍କୁ ଟାର୍ଗେଟ କରିଛନ୍ତି ବିରୋଧୀ ଆଉ କହିଛନ୍ତି, ବିରୋଧୀ ଦଳଙ୍କ ମେଣ୍ଟର ନାମ ଇଣ୍ଡିଆ ରଖାଯିବା ପରେ ଡରିଯାଇଛନ୍ତି ମୋଦୀ ସରକାର । ତେଣୁ ଇଣ୍ଡିଆ ବଦଳରେ ଏବେ ଭାରତ ଲେଖିବା ଆରମ୍ଭ କରିଛନ୍ତି ।

• ‘ଇଣ୍ଡିଆ’ ହଟିବ ଦେଶର ନାଁ ହେବ କେବଳ ‘ଭାରତ’
• ସଂସଦର ସ୍ୱତନ୍ତ୍ର ଅଧିବେଶନରେ ଆସିପାରେ ପ୍ରସ୍ତାବ

ଭାରତୀୟ ସମ୍ବିଧାନର ପ୍ରଥମ ଅନୁଚ୍ଛେଦରେ ଲେଖାଯାଇଛି ‘ଇଣ୍ଡିଆ ଦ୍ୟାଟ୍ ଇଜ ଭାରତ ସାଲ ବି ଏ ୟୁନିୟନ ଅଫ ଷ୍ଟେଟ୍ସ’ । ଅର୍ଥାତ ଇଣ୍ଡିଆ ଯାହାକି ଭାରତ, ରାଜ୍ୟଗୁଡି଼କର ଏକ ସଂଘ । ଜାତୀୟ ଗଣମାଧ୍ୟମରେ ହେଉଥିବା ଚର୍ଚ୍ଚା ଅନୁସାରେ ଦେଶର ନାଁ ହଟାଇ କେବଳ ଭାରତ କରିବାକୁ ଯୋଜନା କରୁଛନ୍ତି ମୋଦୀ ସରକାର । ଯାହାର ଅର୍ଥ ଦେଶର ନାଁ ଆଉ ଇଣ୍ଡିଆ ବୋଲି କୁହାଯିବ ନାହିଁ । ଏପରିକି ଆଗାମୀ ୧୮ରୁ ୨୨ ତାରିଖ ଯାଏଁ ହେବାକୁ ଥିବା ସଂସଦର ସ୍ୱତନ୍ତ୍ର ଅଧିବେଶନରେ ଏ ସଂପର୍କୀତ ପ୍ରସ୍ତାବ ଆଣିପାରନ୍ତି ମୋଦୀ ସରକାର । ଏଥିପାଇଁ ସମ୍ବିଧାନ ସଂଶୋଧନ ପ୍ରସ୍ତାବ ଅଣାଯାଇପାରେ ବୋଲି ବିରୋଧୀ ଅଭିଯୋଗ କରିଛନ୍ତି ।

ବିବାଦର ମୂଳ କାରଣ ହେଉଛି ରାଷ୍ଟ୍ରପତିଙ୍କ ଆମନ୍ତ୍ରଣ ପତ୍ର । ଦିଲ୍ଲୀରେ ଆଗାମୀ ୯ ତାରିଖରୁ ଆରମ୍ଭ ହେଉଛି ଜି-୨୦ ଶିଖର ସମ୍ମିଳନୀ । ଏଥିରେ ଯୋଗଦେଉଥିବା ଅତିଥିଙ୍କୁ ଏକ ନୈଶ ଭୋଜିରେ ଯୋଗ ଦେବାପାଇଁ ରାଷ୍ଟ୍ରପତି ଭବନ ପକ୍ଷରୁ ଆମନ୍ତ୍ରଣ କରାଯାଇଛି । ଇଂରାଜୀରେ ଲେଖାଯାଇଥିବା ଏହି ଆମନ୍ତ୍ରଣ ପତ୍ରରେ ‘ଦି ପ୍ରେସିଡେଣ୍ଟ ଅଫ ଇଣ୍ଡିଆ’ ସ୍ଥାନରେ ‘ଦି ପ୍ରେସିଡେଣ୍ଟ୍ ଅଫ ଭାରତ’ ବୋଲି ଲେଖାଯାଇଛି । ଯାହାକୁ ନେଇ ମୋଦୀ ସରକାରଙ୍କ ଉପରେ ଜୋରଦାର ଆକ୍ରମଣ ଆରମ୍ଭ କରିଛନ୍ତି ବିରୋଧୀ । ଇଣ୍ଡିଆ ମେଣ୍ଟର ଶକ୍ତିରେ ଭୟଭୀତ ହୋଇ ମୋଦୀ ସରକାର ଦେଶର ନାଁ ପରିବର୍ତନ କରିବାକୁ ଚାହୁଁଥିବା ଅଭିଯୋଗ କରିଛନ୍ତି ।

ଆଗାମୀ ୧୮ ତାରିଖରୁ ଆରମ୍ଭ ହେବାକୁ ଥିବା ସଂସଦର ସ୍ୱତନ୍ତ୍ର ଅଧିବେଶନରେ କଣସବୁ ପ୍ରସଙ୍ଗ ଆସିବ ସେନେଇ ସ୍ପଷ୍ଟ ହୋଇନାହିଁ । କିନ୍ତୁ ଆରଏସଏସ ମୁଖ୍ୟ ମୋହନ ଭାଗବତ ମଧ୍ୟ କିଛିଦିନ ତଳେ ଇଣ୍ଡିଆ ସ୍ଥାନରେ ଦେଶର ନାଁ କେବଳ ଭାରତ କହିବାକୁ ଆହ୍ୱାନ ଦେଇଥିଲେ । ତେଣୁ ସଂସଦରେ ସମ୍ବିଧାନ ସଂଶୋଧନ ବିଲ ଆଣି ମୋଦୀ ସରକାର ଏ ଦିଗରେ ପଦକ୍ଷେପ ନେଇ ପାରନ୍ତି ବୋଲି ବିରୋଧୀ ଆଶଙ୍କା କରୁଛନ୍ତି ।

ଲୋକସଭାରେ ଆବଶ୍ୟକ ସଂଖ୍ୟା ଗରିଷ୍ଠତା ଥିବାରୁ ଏଭଳି ବିଲ ପାସ କରାଇବାରେ ଏନଡିଏ ସରକାରକୁ ସମସ୍ୟା ହେବନାହିଁ । କିନ୍ତୁ ରାଜ୍ୟ ସଭାରେ ଅନ୍ୟ ଆଞ୍ଚଳିକ ସହଯୋଗୀ ଦଳଙ୍କ ସମର୍ଥନ ଆବଶ୍ୟକ କରିପାରନ୍ତି ମୋଦୀ ସରକାର । ୨୦୨୦ରେ ଏ ସଂପର୍କିତ ଏକ ଜନସ୍ୱାର୍ଥ ମାମଲାର ଶୁଣାଣି କରି ସୁପ୍ରିମକୋର୍ଟ ହସ୍ତକ୍ଷେପ କରିବାକୁ ମନା କରିଦେଇଥିଲେ । ଦେଶର ନାଁକୁ ଇଣ୍ଡିଆ କୁହାନଯାଉ କେବଳ ଭାରତ କୁହାଯାଉ ବୋଲି ଦର୍ଶାଇଥିଲେ ଆବଦେନକାରୀ । କୋର୍ଟ କହିଥିଲେ ଏ ସଂପର୍କରେ ସରକାରଙ୍କୁ ଜଣାନ୍ତୁ । ଏବେ ସରକାର ଏ ସଂପର୍କିତ ବିଲ ଆଣି ସମ୍ବିଧାନ ସଂଶୋଧନ କଲେ ଗୋଟିଏ ଦେଶ ଗୋଟିଏ ନାଁ ରହିବ ବୋଲି ଚର୍ଚ୍ଚା ଆରମ୍ଭ ହୋଇଛି ।