ବିଧାନସଭାରେ ରାଜ୍ୟପାଳ ଆଙ୍କିଲେ ସରକାରଙ୍କ ସଫଳତାର ଗୋଲାପୀ ଚିତ୍ର । ବିରୋଧୀ କହିଲେ, ରାଜ୍ୟପାଳଙ୍କ ମୁହଁରେ ଅସତ୍ୟ କୁହାଇଛନ୍ତି ସରକାର ।

କନକ ବ୍ୟୁରୋ : ବିଧାନସଭା ବଜେଟ ଅଧିବେଶନର ପ୍ରଥମ ଦିନରେ ରାଜ୍ୟପାଳ ପ୍ରଫେସର ଗଣେଶୀ ଲାଲ ନିଜ ଅଭିଭାଷଣ ରଖି କହିଛନ୍ତି, ଗାଁରେ ଗରିବଙ୍କୁ ପକ୍କା ଘର ଏବଂ ସହରରେ ଜାଗା ମିଶନ ଏକ ଯୁଗାନ୍ତକାରୀ ପଦକ୍ଷେପ । ଏଥିସହ ସରକାରୀ କର୍ମଚାରୀଙ୍କ ଉପରେ ଭିଜିଲାନ୍ସର ଚଢ଼ାଉକୁ ପ୍ରଶଂସା କରି ରାଜ୍ୟପାଳ ସରକାରଙ୍କ ଶୂନ ସହନଶୀଳତାକୁ ପ୍ରଶଂସା କରିଛନ୍ତି । ସେପଟେ ବିରୋଧୀ କହିଛନ୍ତି ରାଜ୍ୟପାଳଙ୍କ ମୁହଁରେ ସରକାର ଅସତ୍ୟ କୁହାଇଛନ୍ତି । ଆଜି ପ୍ରଥମ ଦିନରେ ପ୍ରଥମେ ଦିବଗଂତ ନେତାଙ୍କୁ ଶ୍ରଦ୍ଧାଞ୍ଜଳି ଜଣାଯାଇଥିଲା ।

ବଜେଟ ଅଧିବେଶନରେ ସମ୍ବୋଧନ କରି ରାଜ୍ୟ ସରକାରଙ୍କ ସଫଳତା ଗଣାଇଛନ୍ତି ରାଜ୍ୟପାଳ । ରାଜ୍ୟପାଳ ପ୍ରଫେସର ଗଣେଶୀ ଲାଲ କହିଛନ୍ତି, ଗରିବଙ୍କୁ ପକ୍କାଘର ଯୋଗାଇ ଦେବାଠାରୁ, ଆରମ୍ଭ କରି ସହରାଂଚଳର ବସ୍ତି ବାସିନ୍ଦାଙ୍କ ପାଇଁ ସରକାର କରିଥିବା ଜାଗା ମିଶନ ଯୁଗାନ୍ତକାରୀ । ସହରାଂଚଳରେ ଶହେ ପ୍ରତଶତ ଘରକୁ ପାଇପ ଜଳ ଯୋଗାଇ ରେକର୍ଡ ସୃ୍ଷ୍ଟି କରିଛନ୍ତି ରାଜ୍ୟ ସରକାର । ଦୁର୍ନୀତି ବିରୋଧରେ ରାଜ୍ୟ ସରକାରଙ୍କ ଶୂନ ସହନଶୀଳତା ଓ ଦଣ୍ଡବିଧାନ ପ୍ରଶଂନୀୟ । ମୋଟ ଉପରେ ରାଜ୍ୟରେ କିଭଳି ଶିକ୍ଷା, ସ୍ୱାସ୍ଥ୍ୟ, ଶିଳ୍ପ ସବୁ କ୍ଷେତ୍ରରେ ଉନ୍ନତି ହୋଇଛି ତାହା ରାଜ୍ୟପାଳଙ୍କ ଅଭିଭାଷଣରେ ପ୍ରତିଫଳିତ ହୋଇଛି ।

ରାଜ୍ୟପାଳଙ୍କ ଅଭିଭାଷଣ ପରେ ବର୍ଷିଛନ୍ତି ବିରୋଧୀ । ରାଜ୍ୟ ସରକାର ରାଜ୍ୟପାଳଙ୍କ ମୁହଁରେ ଅସତ୍ୟ କୁହାଇଛନ୍ତି ବୋଲି ଅଭିଯୋଗ କରିଛନ୍ତି । ବିରୋଧୀ ଦଳ ଉପନେତା ବିଷ୍ଣୁ ଚରଣ ସେଠୀ କହିଛନ୍ତି ରାଜ୍ୟପାଳଙ୍କ ଭଳି ବିଦ୍ୱାନ ବ୍ୟକ୍ତିତ୍ୱଙ୍କ ମୁହଁରେ ଏଭଳି ସରକାରଙ୍କ ଗୁଣଗାନ ଦୁଃଖଦ ଓ ପରିତାପର ବିଷୟ । ସରକାର ରାଜ୍ୟପାଳଙ୍କ ମୁହଁରେ ମିଛ ନୁହେଁ ଅସତ୍ୟ କୁହାଇଛନ୍ତି । କଂଗ୍ରେସ ବିଧାୟକ ଦଳ ନେତା ନରସିଂହ ମିଶ୍ର କହିଛନ୍ତି, ରାଜ୍ୟରେ ନିୟନ୍ତ୍ରଣରେ ନାହିଁ ଆଇନ ଶୃଙ୍ଖଳା ବ୍ୟବସ୍ଥା । ରାଜ୍ୟପାଳ ଗୃହରେ ସରକାର ଆଗକୁ କଣ କରିବେ ତାହା କହିବା କଥା, କିନ୍ତୁ ତାହା ନକରି ସରକାରଙ୍କ ଗୁଣଗାନ କରିଛନ୍ତି ।