ଖୁବଶୀଘ୍ର ପଦ୍ମ ଧରିପାରନ୍ତି ପ୍ରଦୀପ ପାଣିଗ୍ରାହୀ । ଗଞ୍ଜାମରେ ଶକ୍ତି ବଢ଼ାଇବାକୁ ବିଜେପିର ଉଦ୍ୟମ । ବିଜେଡି କଲା କଟାକ୍ଷ, ବିରୋଧୀ ଶିବିରରେ ନେତାଙ୍କ ଅଭାବ

କନକ ବ୍ୟୁରୋ: ବିଜେପିରୁ ଆରମ୍ଭ ହେବ କି ପ୍ରଦୀପ ପାଣିଗ୍ରାହୀଙ୍କ ନୂଆ ଇଂନିସ୍ ? ଗୋପାଳପୁର ବିଧାୟକ ପ୍ରଦୀପ ପାଣିଗ୍ରାହୀ ଖୁବଶୀଘ୍ର ବିଧିବଦ୍ଧ ଭାବେ ବିଜେପିରେ ଯୋଗଦେଇପାରନ୍ତି ବୋଲି ଚର୍ଚ୍ଚା ହେଉଛି । କାହିଁକି ନା, ରାଜ୍ୟପାଳଙ୍କ ଶପଥ ସମାରୋହରେ କେନ୍ଦ୍ରମନ୍ତ୍ରୀଙ୍କ ସହ ପ୍ରଦୀପ ପାଣିଗ୍ରାହୀ ଦେଖାଦେଇଥିଲେ । ଆଉ ଏହାପରେ ସେ ବିଜେପିରେ ଯୋଗଦେବେ ବୋଲି ଆକଳନ ଚାଲିଛି ।

ତେବେ ଆଖିକୁ ଯାହା ଦେଖାଯାଏ, ଯଦିଓ ରାଜନୀତିରେ ଅବିକଲ ସେଇଆ ହୋଇନଥାଏ, ତଥାପି ନିକଟରେ ଥିବା ଲୋକଙ୍କୁ ନିକଟତର ବୋଲି ସାଧାରଣରେ ବିଶ୍ୱାସ ରହିଛି । ପ୍ରାୟ ଦୁଇ ସପ୍ତାହ ଧରି ଯେଉଁ ଚିତ୍ରକୁ ନେଇ ଭିତରେ ଭିତରେ ଚର୍ଚ୍ଚା ହେଉଥିଲା । ନେତାଙ୍କ ମୁହାଁରେ ସେଇ ସମାନ କଥା ଶୁଣିବାକୁ ମିଳିବା ପରେ ସରଗରମ ହୋଇଛି ଓଡ଼ିଶା ରାଜନୀତି ।

• ବିଜେପିରୁ ଆରମ୍ଭ ହେବ କି ପ୍ରଦୀପ ପାଣିଗ୍ରାହୀଙ୍କ ନୂଆ ଇଂନିସ୍ ?
• ଭାରତୀୟ ଜନତା ପାର୍ଟିରେ ଯୋଗ ଦେବେ କି ଗୋପାଳପୁର ବିଧାୟକ

ବିଜେଡିରୁ ବହିଷ୍କାର ହେବା ପରେ ବିଭିନ୍ନ ପ୍ରସଙ୍ଗରେ ରାଜ୍ୟ ସରକାରଙ୍କୁ ଟାର୍ଗେଟ କରି ଆସୁଥିବା ପ୍ରଦୀପ ପାଣିଗ୍ରାହୀ, ୨୦୨୪ରେ ବିଜେପି ଟିକେଟରେ ନିର୍ବାଚନ ଲଢ଼ିପାରନ୍ତି ବୋଲି ଚର୍ଚ୍ଚା ହେଇଛି । ଆଉ ଏହି ଚର୍ଚ୍ଚା ଖୋରାକ୍ ଯୋଗାଇଛି ନୂଆ ରାଜ୍ୟପାଳଙ୍କ ଶପଥ ସମାରୋହର ଦୃଶ୍ୟ । ଧର୍ମେନ୍ଦ୍ର ପ୍ରଧାନଙ୍କ ନିକଟରେ ବସିଥିଲେ ପ୍ରଦୀପ । ଆଉ ସେବେଠାରୁ ଗଞ୍ଜାମ ରାଜନୀତି ସରଗରମ ରହିଛି ।

ପ୍ରଦୀପ ପାଣିଗ୍ରାହୀ ବିଜେଡିରୁ ବିଦା ହେବା ପରେ ଯଦିଓ ଦଳୀୟ ସଂଗଠନର ଶକ୍ତି ତାଙ୍କ ପାଖରେ ନାହିଁ, ତଥାପି ଗୋପାଳପୁର ସମେତ ଗଞ୍ଜାମ ଜିଲ୍ଲାରେ ପ୍ରଦୀପ ପାଣିଗ୍ରାହୀଙ୍କ ପ୍ରଭାବ ରହିଛି । ପ୍ରଦୀପଙ୍କ ଦକ୍ଷତା ଓ ଅଭିଜ୍ଞତା ସହ ଲୋକଙ୍କ ମଧ୍ୟରେ ଥିବା ପ୍ରଭାବ ବିଜେଡିର ଆଧିପତ୍ୟ ପାଇଁ ଚ୍ୟାଲେଞ୍ଜ ସୃଷ୍ଟି କରିପାରେ ବୋଲି ଚର୍ଚ୍ଚା ହେଉଛି । ହେଲେ ବିଜେଡି ଏହି ଯୁକ୍ତିରେ ସହମତ ନୁହେଁ ।

ନିର୍ବାଚନ ପୂର୍ବରୁ ଦଳ ଡିଆଁ ଚର୍ଚ୍ଚା ଓ ମିଶ୍ରଣ ପୂର୍ବ ନୁଆଁ ନୁହେଁ । କିନ୍ତୁ ବର୍ଷ ବର୍ଷ ଧରି ଜଣେ ନେତାଙ୍କୁ ଗୋଟିଏ ଦଳରେ ଦେଖିଆସୁଥିବା ଜନତା, ଆଉ ଗୋଟିଏ ଦଳରେ କେମିତି ଗ୍ରହଣ କରିବେ, ତାହା ସେତେବେଳେ ଜଣାପଡ଼ିବ ଯେତେବେଳେ ପ୍ରଦୀପ ଆଉ ଏକ ରାଜନୈତିକ ଦଳରେ ସାମିଲ ହେବେ ଏବଂ ନିର୍ବାଚନ ଲଢିବେ । ତେବେ ଏହି ପ୍ରସଙ୍ଗରେ ପ୍ରଦୀପ ପାଣିଗ୍ରାହୀଙ୍କ ବୟାନ ମିଳିପାରିନାହିଁ ।