ଗୋଳିଆ ହେଉଛି ଗୋପାଳପୁର ରାଜନୀତି ! ବିଜେଡି ଦୁର୍ଗ ଭାଙ୍ଗିବାକୁ ବଳ କଷୁଛନ୍ତି ବିରୋଧୀ ।
କନକ ବ୍ୟରୋ: ଦୀର୍ଘ ୨୦ବର୍ଷ ହେଲା ଗଞ୍ଜାମ ଜିଲ୍ଲାର ଗୋପାଳପୁର ବିଧାନସଭା ଆସନକୁ କବଜା କରି ରହିଛି ବିଜେଡି । କିନ୍ତୁ ଆଗାମୀ ନିର୍ବାଚନରେ ଏହି ଆସନ ବିଜେଡି ପାଇଁ ଏତେଟା ସହଜ ହେବ ନାହିଁ ବୋଲି କୁହାଯାଉଛି । ଗତ ନିର୍ବାଚନରେ ଦ୍ବିତୀୟ ସ୍ଥାନରେ ରହିଥିବା ବିଜେପି ଏହି ନିର୍ବାଚନମଣ୍ତଳୀରେ ଏଥର ବିଜୟ ତିଳକ ପିନ୍ଧିବା ପାଇଁ ସମସ୍ତ ପ୍ରକାର ପ୍ରସ୍ତୁତି କରିଛି । ଅନ୍ୟପକ୍ଷରେ ଗୋପାଳପୁର ବିଧାନସଭା କ୍ଷେତ୍ରରେ ୪୦ ପ୍ରତିଶତ ତେଲୁଗୁ ସମ୍ପ୍ରଦାୟର ଭୋଟ ରହିଥିବାରୁ କ˚ଗ୍ରେସ ଜଣେ ତେଲୁଗୁ ସମ୍ପ୍ରଦାୟର ବ୍ୟକ୍ତିଙ୍କୁ ପ୍ରାର୍ଥୀ କରିବ ବୋଲି ଚର୍ଚ୍ଚା ହେୁଛି । ତେଣୁ ଏହି ନିର୍ବାଚନମଣ୍ତଳୀରେ ୩ ପ୍ରମୁଖ ଦଳ ମଧ୍ୟରେ କଡ଼ା ମୁକାବିଲା ହେବା ଏବେ ଠାରୁ ଜଳ ଜଳ ଦେଖାଯାଉଛି।
Kanak News is now on WhatsApp
Join and get latest news updates delivered to you via WhatsApp
ଗୋପାଳପୁର ବିଧାନସଭା କ୍ଷେତ୍ର ୧୯୭୪ ମସିହାରେ ଗଠିତ ହୋଇଥିବା ବେଳେ ଇତିମଧ୍ୟରେ ୧୦ଟି ନିର୍ବାଚନକୁ ସାମ୍ନା କରିଛି । ଏହି ବିଧାନସଭା କ୍ଷେତ୍ର ଏସସି ବର୍ଗ ପାଇଁ ସ˚ରକ୍ଷତି ରହିଥିଲା। ଏକଦା ଅର୍ଥାତ ୧୯୭୪ ଠାରୁ ୧୯୮୫ ଯାଏଁ ଏହି ବିଧାନସଭା ଆସନ କ˚ଗ୍ରେସ ଦଖଲରେ ରହିଥିଲା । କିନ୍ତୁ ୧୯୯୦ ନିର୍ବାଚନରେ ବିଜୁ ପଟ୍ଟନାୟକଙ୍କ ଜନତା ଦଳ ସରକାର ଗଢିଥିଲା । ଆଉ ଏହି ଆସନ କ˚ଗ୍ରେସ ହାତରୁ ଖସିଥିଲା। କିନ୍ତୁ ୨୦୦୪ ନିର୍ବାଚନ ଏହି ଆସନକୁ ବିଜେଡି ହାତରୁ କ˚ଗ୍ରେସ ଛଡାଇ ନେଇଥିଲା। କ˚ଗ୍ରେସ ପ୍ରାର୍ଥୀ ତ୍ରିନାଥ ବେହେରା ବିଜୟୀ ହୋଇଥିଲେ । ଏହାପରେ ୨୦୦୯ ସୀମା ନିର୍ଦ୍ଧାରଣରେ ଏହି ଆସନ ସାଧାରଣ ବର୍ଗଙ୍କ ପାଇଁ ଉଦ୍ଦିଷ୍ଟ ରହିଥିଲା।
୨୦୦୯ ନିର୍ବାଚନରେ ବିଜେଡି ପ୍ରାର୍ଥୀ ପ୍ରଦୀପ କୁମାର ପାଣିଗ୍ରାହୀ ୩୭ ହଜାର ୬୧୨ଖଣ୍ତ ଭୋଟ ପାଇ ବିଜୟୀ ହୋଇଥିଲେ। କ˚ଗ୍ରେସ ପ୍ରାର୍ଥୀ ତ୍ରିନାଥ ବେହେରା ଦ୍ବିତୀୟ ସ୍ଥାନ ଓ ବିଜେପି ପ୍ରାର୍ଥୀ ବିଭୂତି ଭୂଷଣ ଜେନା ତୃତୀୟ ସ୍ଥାନରେ ରହିଥିଲେ।
କିନ୍ତୁ ସେତେବେଳେ ବିଜେଡି ପ୍ରାର୍ଥୀ ଅନୁଜ କୁମାର ନାୟକ ଟିକେଟ ଆଶାୟୀ ରହିଥିଲେ। କିନ୍ତୁ ଦଳ ତାଙ୍କୁ ଟିକେଟ ନ ଦେବାରୁ ସେ ସ୍ବାଧୀନ ପ୍ରାର୍ଥୀ ଭାବେ ଲଢି ୧୪,୬୭୯ଖଣ୍ତ ଭୋଟ ପାଇଥିଲେ। କିନ୍ତୁ ବିଜେଡିର ବିଦ୍ରୋହୀ ପ୍ରାର୍ଥୀ ସତ୍ତ୍ବେ ପ୍ରଦୀପ ପାଣିଗ୍ରାହୀ ତାଙ୍କ ନିକଟତମ ପ୍ରତିଦ୍ବନ୍ଦ୍ବୀଙ୍କ ଠାରୁ ପ୍ରାୟ ୧୮ହଜାରରୁ ଅଧିକ ଭୋଟ ବ୍ୟବଧାନରେ ବିଜୟୀ ହୋଇଥିଲେ । ଏହାପରଠୁ ପ୍ରଦୀପ ପାଣିଗ୍ରାହୀ ଏହି ନିର୍ବାଚନମଣ୍ତଳୀକୁ ଆଉ ହାତଛଡା କରିବାକୁ ଦେଇନାହାନ୍ତି। ଆସନ୍ତା ନିର୍ବାଚନରେ ମଧ୍ୟ ପ୍ରଦୀପଙ୍କୁ ଟିକେଟ୍ ମିଳିବା ଏକ ପ୍ରକାର ସୁନିଶ୍ଚିତ ବୋଲି ଶୁଣିବାକୁ ମିଳୁଛି । କାରଣ ପ୍ରଦୀପଙ୍କ ବ୍ୟତୀତ ବିଜେଡିରେ ଅନ୍ୟ କୌଣସି ପ୍ରାର୍ଥୀଙ୍କ ନାଁ ଏଯାବତ୍ ଲୋକଲୋଚନକୁ ଆସିନାହିଁ ।
ସେହିଭଳି ବିଜେପି ୨୦୧୪ ନିର୍ବାଚନରେ ଦ୍ବିତୀୟ ସ୍ଥାନକୁ ଆସିବା ପରେ ଏହି ନିର୍ବାଚନ କ୍ଷେତ୍ରକୁ ଯଥେଷ୍ଟ ଗୁରୁତ୍ବ ଦେଇଆସିଛି। ଭାଜପା ରାଷ୍ଟ୍ରୀୟ ସଭାପତି ଅମିତ ଶାହ ଏହି ନିର୍ବାଚନମଣ୍ତଳୀର ହୁଗୁଳୁପଟା ଗ୍ରାମଠାରେ ଆୟୋଜିତ ସଭାରେ ଯୋଗଦେଇ ‘ ମୋ ବୁଥ୍ ଟ୍ଟଅଧିକ ମଜବୁତ’ କାର୍ଯ୍ୟକ୍ରମର ଶୁଭାରମ୍ଭ କରିଥିଲେ। ଏପରିକି ଏହି ନିର୍ବାଚନମଣ୍ତଳୀର ହୁଗୁଳାପଟା ଗ୍ରାମର ନବୀନ ନାମକ ଜଣେ ଦଳିତ ଗରିବ ପରିବାର ଘରେ ଶାହ, କେନ୍ଦ୍ରମନ୍ତ୍ରୀ ଧର୍ମେନ୍ଦ୍ର ପ୍ରଧାନ ଓ ଜୁଏଲ ଓରାମ ଖାଦ୍ୟ ଖାଇବା ଘଟଣା ଚର୍ଚ୍ଚା ପରିଷରକୁ ଆସିଛି । ଅନ୍ୟପଟେ ଗତ ପଞ୍ଚାୟତ ନିର୍ବାଚନରେ ୪ଟି ଜୋନ୍ରୁ ୨ଟି ଜୋନ୍ ଅକ୍ତିଆର କରିବା ପରେ ଦଳକୁ ଅତିରିକ୍ତ ବଳ ଦେଇଛି । ତେଣୁ ଏହି ନିର୍ବାଚନମଣ୍ଡଳୀରେ ଭାଜପାରୁ ବିଭୂତି ଭୂଷଣ ଜେନାଙ୍କୁ ପୁନର୍ବାର ଟିକେଟ୍ ମିଳିବ ବୋଲି ଆପାତତଃ ସ୍ଥିର ହୋଇଥିବା ଗେରୁଆ କ୍ୟାମ୍ପରେ ଶୁଣିବାକୁ ମିଳୁଛି ।
ସେପଟେ କେନ୍ଦ୍ର ରାଜନୀତିରେ ଯୁବ କଂଗ୍ରେସ ଅଧ୍ୟକ୍ଷଙ୍କୁ ପାଇ ଉତ୍ସାହିତ ହୋଇଛି କଂଗ୍ରେସ । ବିଭିନ୍ନ ରାଜ୍ୟକୁ ବିଜେପି ହାତରୁ ଛଡ଼ାଇଆଣି ‘ହାତ’କୁ ମଜଭୁତ କରିଥିବା କଂଗ୍ରେସ ମଧ୍ୟ ଓଡ଼ିଶାରେ କମାଲ କରିବାକୁ ଗୋଟିଚାଳନା କରୁଛି । ଗତଥର କ˚ଗ୍ରେସରୁ ପ୍ରାର୍ଥୀ ହୋଇଥିବା ଜିଲ୍ଲା କ˚ଗ୍ରେସ ସଭାପତି ଭଗବାନ ଗନ୍ତାୟତ ଇତିମଧ୍ୟରେ କ˚ଗ୍ରେସ ଛାଡି ବିଜେଡି ଶିବିରରେ ଯୋଗ ଦେଇଥିଲେ ସୁଦ୍ଧା କଂଗ୍ରେସକୁ ନୂଆ ମୁହଁ ମିଳିଯାଇଥିବା ଚର୍ଚ୍ଚା ହେଉଛି । ତେଣୁ ନୂଆ ରଣନୀତି ପ୍ରସ୍ତୁତ କରି ଏସ୍. ଧର୍ମରାଜ ରେଡ୍ଡିଙ୍କୁ ପ୍ରାର୍ଥୀ କରିବ ବୋଲି ଶୁଣିବାକୁ ମିଳୁଛି । କାରଣ ଧର୍ମରାଜ ରେଡ୍ଡି ତେଲୁଗୁ ସମ୍ପ୍ରଦାୟରୁ ଆସୁଥିବାରୁ ତାଙ୍କୁ କଂଗ୍ରେସକୁ ଫାଇଦା ହୋଇପାରେ ବୋଲି ରାଜନୀତି ସମୀକ୍ଷକମାନେ ମତ ପ୍ରକାଶ କରିଛନ୍ତି ।