ଅସହାୟକଙ୍କ ଆଶାବାଡି ‘ପୁଷ୍ପାଞ୍ଜଳି’। ସାଇକେଲ ଚଢି ଗାଁ ଗାଁ ବୁଲି କରୁଛନ୍ତି ରୋଗୀ ସେବା। ‘ମାନବ ସେବା ହିଁ ମାଧବ ସେବା’କୁ ଜୀବନର ବ୍ରତ କରି ନିଜ କର୍ତ୍ତବ୍ୟ ପଥରେ ଚାଲିଛନ୍ତି ଆଗେଇ
କନକ ବ୍ୟୁରୋ: ମାନବ ସେବା ହିଁ ମାଧବ ସେବା ଆଉ ଏହାକୁ ଜୀବନର ବ୍ରତ ଭାବି ନିଜ କର୍ତ୍ତବ୍ୟ ପଥରେ ଆଗେଇ ଚାଲିଛନ୍ତି ଜଳେଶ୍ୱରର ପୁଷ୍ପାଂଜଳି ଟୁଡୁ । ଯେଉଁଠି କୃଷ୍ଠରୋଗୀମାନଙ୍କୁ ଅଛୁଆଁ ବୋଲି କହି ଲୋକେ ତାଙ୍କୁ ଘୃଣ୍ୟ ଦୃଷ୍ଟିରେ ଦେଖିଥିବା ବେଳେ ସେଠି କିନ୍ତୁ ଏମାନଙ୍କର ସେବା କରି ହିଁ ଆତ୍ମସନ୍ତୋଷ ପାଉଛନ୍ତି ପୁଷ୍ପାଂଜଳି । ଆଉ ତାଙ୍କର ଏହି କାମ ଆଜି ତାଙ୍କୁ କରିଦେଇଛି ଅନ୍ୟମାନଙ୍କଠାରୁ ଭିନ୍ନ ।
Kanak News is now on WhatsApp
Join and get latest news updates delivered to you via WhatsApp
ବାଲେଶ୍ୱର ଜିଲ୍ଲା ଜଳେଶ୍ୱର ବ୍ଲକର ପୁଷ୍ପାଂଜଳି ଟୁଡୁ ମହାମହିମ ରାଜ୍ୟପାଳ ପ୍ରଫେସର ଗଣେଶୀଲାଲଙ୍କଠାରୁ ପାଇଛନ୍ତି କୁଷ୍ଠ ସେବିକା ସମ୍ମାନ । ପିଲାଟି ଦିନରୁ ତାଙ୍କର ସ୍ୱପ୍ନ ଥିଲା ରୋଗୀ ସେବା କରିବା ଆଉ ତାହାହିଁ ଆଜି ତାଙ୍କୁ ଏହି ସମ୍ମାନର ଅଧିକାରୀଣୀ କରେଇ ପାରିଛି । ତେବେ ରୋଗୀ ସେବା କରିବା ତାଙ୍କର ପେଶା ଆଉ ନିଶା କହିଲେ କିଛି ଭୁଲ ମଧ୍ୟ ହେବନି । ରୋଗୀଙ୍କ ସେବା କରିବାର ଝୁଙ୍କ ଏମିତି ଯେ ସାଇକେଲ ଖଣ୍ଡେ ଧରି ଗାଁ ଗାଁ ବୁଲି ରୋଗୀ ସେବା କରୁଛନ୍ତି ପୁଷ୍ପାଂଜଳି ।
ପୁଷ୍ପାଂଜଳି ଥିଲେ ଜଣେ ମେଧାବୀ ଛାତ୍ରୀ । ହେଲେ ଘରର ଆର୍ଥିକ ପରିସ୍ଥିତି ତାଙ୍କୁ ଅଧାରୁ ପାଠପଢା ଛାଡିବାକୁ ବାଧ୍ୟ କରିଥିଲା । ମାତ୍ର ସେ ଭଲ ପାଠ ପଢୁଥିବାରୁ ତତକାଳୀନ ଡାକ୍ତର ମିହିର କୁମାର ପ୍ରଧାନ ତାଙ୍କୁ ୧୯୮୭ରେ ନିଜ ଡାକ୍ତରଖାନାରେ ରୋଗୀ ସେବା ପାଇଁ ନିଯୁକ୍ତି ଦେଲେ । ଆଉ ସେବେଠାରୁ ଆଜି ପର୍ଯ୍ୟନ୍ତ ପୁଷ୍ପାଂଜଳି ପୂରା ଏକାଗ୍ରତାର ସହ କରିଆସୁଛନ୍ତି ରୋଗୀ ସେବା । ଏପରିକି ତାଙ୍କ ହାତ ସ୍ପର୍ଶରେ ବହୁ କୁଷ୍ଠ ରୋଗୀ ଭଲ ହୋଇ ଘରକୁ ଫେରିଥିବା ମଧ୍ୟ ନଜୀର ରହିଛି । ଡାକ୍ତର ମିହିର ପ୍ରଧାନଙ୍କ ମୃତ୍ୟୁ ପରେ ବି ପୁଷ୍ପାଂଜଳୀ ନିଜ କର୍ତ୍ତବ୍ୟରୁ ତିଳେ ମାତ୍ର ଅବହେଳା କରିନାହାଁନ୍ତି । ପୁଷ୍ପାଂଜଳିଙ୍କ ଏଭଳି ସେବାମନବୃତି ପାଇଁ ତାଙ୍କୁ ଜଳେଶ୍ୱର ହାତିଗଡ ଡାକ୍ତରଖାନା ଅଧିନରେ ୨୦୦୭ରେ ଆଶାକର୍ମୀ ଭାବେ ନିଯୁକ୍ତି କରାଯାଇଛି ।
ତେବେ ଶ୍ରଦ୍ଧା ଏବଂ ଭଲ ପାଇବା ଦେଲେ ଜଣେ କୁଷ୍ଠ ରୋଗୀ ଭଲ ହୋଇପାରିବ କହିଛନ୍ତି ପୁଷ୍ପାଂଜଳି । ତାଙ୍କର ଏଭଳି ସେବା ପାଇଁ ତାଙ୍କୁ ଜଳେଶ୍ୱରର ମଦରଟେରେସା ବୋଲି କହିଛନ୍ତି ସ୍ଥାନୀୟବାସୀନ୍ଦା ।