କଟକ ମେଡିକାଲରେ ସୁନା ଚୋରୀର କଳଙ୍କିତ କାହାଣୀ ! ମୃତ୍ୟୁ ପରେ ମହିଳାଙ୍କ ବେକରୁ ଚୋରୀ ହୋଇଗଲା ଚେନ୍ । କିଏ କଲା ଏମିତି କାଣ୍ଡ ?
କନକ ବ୍ୟୁରୋ: ଶବ ବେକରୁ ସୁନା ଚୋରୀ । ଆଇସୋଲେସନ ୱାର୍ଡରେ ଅଭାବନୀୟକାଣ୍ଡ । ବଡ ମେଡିକାଲରୁ ବଡ ଅଭିଯୋଗ । କଟକ ବଡ ମେଡିକାଲରେ ସୁନା ଚୋରୀ ନେଇ ଆସିଲା ସାଙ୍ଘାତିକ ଅଭିଯୋଗ । ଶବ ବେକରୁ ଚେନ ଚୋରି ହୋଇଯାଇଛି । ସକାଳେ ମୃତ ମହିଳାଙ୍କ ବେକରେ ଝୁଲୁଥିବା ଚେନ ସଞ୍ଜରେ ଗାଏବ ହୋଇଯାଇଥିବା ଅଭିଯୋଗ କରିଛନ୍ତି ମୃତାଙ୍କ ପୁଅ । ତେବେ ବଡ ମେଡିକାଲର ଆଇସୋଲେସନ ୱାର୍ଡରେ ଏଭଳି ଅଭାବନୀୟ ଘଟଣା ଏବେ ପୂରା ବ୍ୟବସ୍ଥା ଉପରେ ଆଙ୍ଗୁଳିି ଉଠାଇଛି ।
Kanak News is now on WhatsApp
Join and get latest news updates delivered to you via WhatsApp
ତେବେ ଭୁବନେଶ୍ୱର ବରମୁଣ୍ଡା ଅଞ୍ଚଳର ଜଣେ ଯୁବକ ସୁବୋଧ ସରାଫ ନିଜ ମାଆଙ୍କୁ ନେଇ କଟକ ବଡ ମେଡିକାଲ ଯାଇଥିଲେ । ଶ୍ୱାସ ନେବାରେ କଷ୍ଟ ଅନୁଭବ କରିବା ପରେ ଭୁବନେଶ୍ୱରର ଦୁଇଟି ସରକାରୀ ମେଡିକାଲରେ ଦେଖାଇଥିଲେ । ମାତ୍ର ସେଠାରେ ସାମାନଙ୍କୁ ଫେରାଇ ଦେବା ପରେ କଟକ ନେଇଥିଲେ ହେଁ ବଡ ମେଡିକାଲରେ ଚିକିତ୍ସା ନକରାଇ ସିଧା ଆଇସୋଲେସନ ୱାର୍ଡକୁ ପଠାଇ ଦେଇଥିଲେ ।
ହେଲେ ସେତିକିରେ ସରିନଥିଲା ସେମାନଙ୍କ କଷ୍ଟ । ମାଆଙ୍କ ଯନ୍ତ୍ରଣା ବଢି ବଢି ଚାଲୁଥିବା ବେଳେ ଦୀର୍ଘ ସମୟ ଧରି କାହାରି ଦେଖାନଥିଲା । ଅନେକ ନେହୁରା ଡାକ୍ତର ଶୁଣିଥିଲେ ହେଁ ବହୁ ବିଳମ୍ବରେ ଅକ୍ସିଜେନ ଦିଆଯାଇଥିଲା । ମାତ୍ର ସେତେବେଳକୁ ସରାଫଙ୍କ ମାଆଙ୍କ ଜୀବନ ଦୀପ ଲିଭି ଲିଭି ଆସୁଥିଲା । ଆଉ ଶେଷରେ ସେ ଆଖିବୁଜିଥିଲେ ।
ଆଇସୋଲେସନ ୱାର୍ଡରେ ଅବହେଳାରୁ ୭୬ ବର୍ଷୀୟା ମହିଳାଙ୍କ ମୃତ୍ୟୁ ହୋଇଥିବା ଅଭିଯୋଗ ହୋଇଥିବା ବେଳେ ମଲା ପରେ ବି ଶବ ସହ ସରିନଥିଲା ଅତ୍ୟାଚାର । କାଗଜପତ୍ରର ବାହାନା କରି ଶବକୁ ୧୪ ଘଣ୍ଟା ତଳେ ପକାଇଥିଲେ । ଆଉ ମୃତ୍ୟୁ ପରେ ଶବ ବେକରୁ ଚେନ ଚୋରି ହୋଇଗଲା । ଆଇସୋଲେସନ ୱାର୍ଡରେ ସୁନା ଚୋରୀ ହୋଇଥିବା ପୁଅ କହିଥିବା ବେଳେ ମାଆର ଶେଷ ସନ୍ତକଟିଏ ବି ପାଇଲେନି ବୋଲି କାନ୍ଦିକାନ୍ଦି କହିଛନ୍ତି ।
ତେବେ କଟକ ମେଡିକାଲର ଏ କରୁଣ କାହାଣୀ ଶିକ୍ଷିତ ସମାଜକୁ ଲଜ୍ଜିତ କରିଛି । ଶବ ଦେହରୁ ସୁନା ଚୋରି ଘଟଣା ମଣିଷଜାତି ଉପରେ ଆଙ୍ଗୁଳି ଉଠାଇଛି । ସମାଜର ଗତି କୁଆଡେ ? କାହିଁକି ମଣିଷର ମାନବିକତା ଏତେ ତଳକୁ ଖସି ଖସି ଯାଉଛି? ଜୀବିତ ନୁହେଁ ବରଂ ଏଠି ଶବ ଦେହରୁ ବି ଚୋରି କରିବାକୁ ଲୋକଙ୍କ ହାତ ପଛାଉନି? କଣ ପାଇଁ ଏସବୁ ଘଟୁଛି, କେଉଁଠି ରହୁଛି ଭୁଲ ? ମଣିଷ ଆଉ ମଣିଷ ହୋଇ ଅଛି ? କିଏ ଦେବ ଉତ୍ତର ?