ଗୋଆରେ ନିର୍ବାଚନୀ କାର୍ଡ ଖେଳିଲେ କେଜ୍ରିୱାଲ, ‘ଆପ୍’ ସରକାର ଗଠନ ହେଲେ ମହିଳାଙ୍କୁ ମିଳିବ ମାସିକ ୨୫୦୦ ଟଙ୍କା

128

କନକ ବ୍ୟୁରୋ : ଆସନ୍ତା ବର୍ଷ ଗୋଆରେ ବିଧାନସଭା ନିର୍ବାଚନ ହେବାକୁ ଯାଉଛି । ଏହାପୂର୍ବରୁ ଗୋଆରେ ଜାତୀୟ ରାଜନୈତିକ ଦଳଠାରୁ ଆରମ୍ଭ କରି ଆଞ୍ଚଳିକ ଦଳମାନେ ପ୍ରସ୍ତୁତ ଆରମ୍ଭ କରିଛନ୍ତି । ୪୦ ଆସନ ବିଶିଷ୍ଠ ଗୋଆରେ ୨୦୨୨ ଫେବୃଆରୀ ମାସରେ ନିର୍ବାଚନ ହୋଇପାରେ ।

ରବିବାର ଦିନ ଦିଲ୍ଲୀ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିୱାଲ ଗୋଆ ଗସ୍ତରେ ଥିବାବେଳେ ରାଜ୍ୟର ମହିଳାମାନଙ୍କ ପାଇଁ ନିର୍ବାଚନୀ ଇସ୍ତାହାର ଘୋଷଣା କରିଛନ୍ତି । ସେ କହିଛନ୍ତି କି, ୨୦୨୨ ରେ ଯଦି ଗୋଆରେ  ‘ଆପ୍’ ସରକାର ଗଠନ କରିବ ତେବେ ରାଜ୍ୟର ପ୍ରତ୍ୟେକ ମହିଳାଙ୍କୁ ମାସିକ ୨୫୦୦ ଟଙ୍କା ମିଳିବ ।  କେବଳ ସେତିକି ନୁହେଁ ବିଜୁଳି ଓ ପାନୀୟ ଜଳକୁ ନେଇ ବି କେଜ୍ରିୱାଲ ଘୋଷଣା କରିଛନ୍ତି । କେଜ୍ରିୱାଲ କହିଛନ୍ତି କି ଗୋଆରେ ତାଙ୍କ ଦଳର ସରକାର ଗଠନ ହେଲେ ଦିଲ୍ଳୀ ଭଳି ମାଗଣା ବିଜୁଳି ଓ ମାଗଣା ପାଣି ଯୋଗାଇ ଦିଆଯିବ ।

ଅରବିନ୍ଦ କେଜ୍ରିୱାଲ କହିଛନ୍ତି କି ଗୋଆରେ ଆପ୍ ସରକାର ଗଠନ ହେବ ତେବେ ମହିଳାମାନଙ୍କୁ ଗୃହ ଆଧାର ଯୋଜନାରେ ରାଜ୍ୟର ୧୮ ବର୍ଷରୁ ଅଧିକ ମହିଳାଙ୍କୁ ମାସିକ ୨୫୦୦ ଟଙ୍କା ମିଳିବ । ଅନ୍ୟପଟେ କେଜ୍ରିୱାଲ ତାଙ୍କ ଭାଷଣରେ ଅଭିଯୋଗ କରିଥିଲେ କି ବିଜେପି ମହିଳା ସଶକ୍ତିକରଣର କଥା କହୁଛି ହେଲେ ମହିଳାଙ୍କୁ ସଶକ୍ତ କରାଇବା ନେଇ କୌଣସି କାମ କରୁନାହିଁ । ତେଣୁ ସର୍ବ ପ୍ରଥମେ ମହିଳାଙ୍କୁ ଆର୍ଥିକ ସ୍ତରରେ ମଜବୁତ କରିବାକୁ ପଡିବ ।