ଛାତ୍ରୀ ନିବାସରେ ପାଲ ଟାଣି ରହୁଛନ୍ତି ପିଲା । ଭଙ୍ଗା ଛାତରୁ ଖସୁଛି ସିମେଣ୍ଟ ପ୍ଲାଷ୍ଟର । ଅଭିଯୋଗ ଶୁଣୁନାହାନ୍ତି ବିଭାଗୀୟ ଅଧିକାରୀ ।
କନକ ବ୍ୟୁରୋ: ସ୍କଲ ପିଲାଙ୍କ ପାଠ ପଢା ପାଇଁ ରାଜ୍ୟ ସରକାର କୋଟି କୋଟି ଟଙ୍କା ଖର୍ଚ୍ଚ କରି ଆଦର୍ଶ, ଉତ୍କର୍ଷ, ସ୍ମାର୍ଟ କ୍ଲାସ ରୁମର ବ୍ୟବସ୍ଥା କରୁଛନ୍ତି । ବିଜ୍ଞାପନ ଜରିଆରେ ଏହାର ପ୍ରଚାରପ୍ରସାର ପାଇଁ ମଧ୍ୟ ଟଙ୍କା ଖର୍ଚ୍ଚ କରାଯାଉଛି । କିନ୍ତୁ ଏପଟେ ପାଠ ପଢିବା ପାଇଁ ମୌଳିକ ସୁବିଧା ପାଇପାରୁନାହାନ୍ତି ଛାତ୍ରୀ । ଛାତ୍ରୀନିବାସରେ ଛାତରୁ ପାଣି ଗଳୁଥିବା ବେଳେ ବିପଦସଙ୍କୁଳ ଅବସ୍ଥାରେ ପାଲ ଟାଙ୍ଗି ରହୁଛନ୍ତି ଛାତ୍ରୀ ।
Kanak News is now on WhatsApp
Join and get latest news updates delivered to you via WhatsApp
ଏଭଳି କିଛି ଅଭିଯୋଗ ଆସିଛି ମାଲକାନଗିରି ଜିଲା ମାଥିଲି ବ୍ଲକ ଅନ୍ତର୍ଗତ କିଆଙ୍ଗ ପଞ୍ଚାୟତ ସଦର ମୀରାବାଇ ଛାତ୍ରୀ ନିବାସରୁ । ଏଠାରେ ରହୁଥିବା ଆଦିବାସୀ ଛାତ୍ରୀ ମୁଣ୍ଡାଇଛନ୍ତି ବିପଦ । ଛାତରୁ ଲୁହା ଛଡ ବାହାଗଲାଣି କିନ୍ତୁ ଏବେ ବି ସେଠାରେ ରହୁଛନ୍ତି ଛାତ୍ରୀ । ବର୍ଷାରେ ପାଣି ଗଳିବାରୁ ରାତି ଉଜାଗର ରହିବା ସହ ପାଲ ତଳେ ଆଶ୍ରୟ ନେଉଛନ୍ତି ଅନ୍ତେବାସୀ । ଏନେଇ ଛାତ୍ରୀମାନେ ବହୁବାର ଅଭିଯୋଗ କରିଥିଲେ ମଧ୍ୟ କୌଣସି ପଦକ୍ଷେପ ନେଉନି ଶିକ୍ଷା ବିଭାଗ ।
ତେବେ ରାଜ୍ୟ ସରକାର ସ୍ମାର୍ଟ ସ୍କୁଲ ଓ ହଷ୍ଟେଲକୁ ମଡେଲ କରିବାକୁ ଯୋଜନା ପ୍ରସ୍ତୁତ କରିଥିବାବେଳେ ଆଦିବାସୀ ଅଂଚଳରେ ନିର୍ମିତ ଏଭଳି ହଷ୍ଟେଲ ଘର ସମସ୍ୟା ସୃଷ୍ଟି କରିଛି । ଜୀବନକୁ ହାତରେ ଧରି ହଷ୍ଟେଲରେ ରହୁଛନ୍ତି ଛାତ୍ରୀ । ଗୋଟିଏ ପଟେ ସ୍ମାର୍ଟ କ୍ଲାସ ରୁମରେ ପାଠ ପଢାଇବାର ବ୍ୟବସ୍ଥା, ଅନ୍ୟପଟେ ପାଠ ପଢିବା ପାଇଁ ଅସୁରକ୍ଷିତ ଘରେ ଆଦିବାସୀ ଛାତ୍ରୀ । ଏଭଳି ସ୍ଥଳେ ସରକାରଙ୍କ ଆଦର୍ଶ, ଉତ୍କର୍ଷ, ସ୍ମାର୍ଟ କ୍ଲାସ ରୁମକୁ ନେଇ ପ୍ରଶ୍ନ ଉଠୁଛି ।