ମୁକୁଳିବ ରୋଜିଙ୍କ ସାର୍ଟିଫିକେଟ୍ ! କନକ ନ୍ୟୁଜରେ ଖବର ପ୍ରସାରଣ ପରେ ଡ଼େଲାଙ୍ଗ ରୋଜି ବେହେରାଙ୍କ ପାଇଁ ବଢିଆସିଲା ସହାୟତାର ହାତ: ସାର୍ଟିଫିକେଟ୍ ମୁକୁଳାଇବାକୁ ୨୫ ହଜାର ଟଙ୍କା ଦେଲେ ଅଭିନେତ୍ରୀ ରାନୀ ପଣ୍ଡା
କଲେଜ ବକେୟା ଟଙ୍କା ଦେବାକୁ ମନରେଗାରେ ମାଟି କାମ କରୁଥିଲେ ରୋଜି
କନକ ବ୍ୟୁରୋ: ସାର୍ଟିଫିକେଟ୍ ମୁକୁଳାଇବାକୁ ଇଂଜିନିୟରିଂ ଛାତ୍ରୀ ଗାଁ ଦାଣ୍ଡରେ ମାଟି କାମ କରିବା ଖବର ପ୍ରସାରଣ ପରେ ସହାୟତା ପାଇଁ ଆଗେଇ ଆସିଲେ ରାନୀ ପଣ୍ଡା । ମଂଚ କଳାକାର ଭାବେ ରାଜ୍ୟରେ ଲୋକପ୍ରିୟତା ହାସଲ କରିଥିବା ରାନୀ ପଣ୍ଡା ଏବେ ରାଜ୍ୟ ବାହାରେ ଅଛନ୍ତି । ତଥାପି ଓଡ଼ିଆଙ୍କ ଦୁଃଖ ଦେଖି ତାଙ୍କ ହୃଦୟ ତରଳି ଯାଇଛି । କନକ ନ୍ୟୁଜରେ ଡ଼େଲାଙ୍ଗ ଅଂଚଳର ରୋଜି ବେହେରା ମନରେଗାରେ ମାଟି କାମ କରିବା ଦେଖି ସେ ସହାୟତାର ହାତ ବଢାଇଛନ୍ତି । ରୋଜିଙ୍କ ସାର୍ଟିଫିକେଟ୍ ମୁକୁଳାଇବାକୁ ନିଜ ବ୍ୟାଙ୍କ ଆକାଉଂଟରୁ ଦୁଇଟି କିସ୍ତିରେ ୨୫ ହଜାର ଟଙ୍କା ମଧ୍ୟ ପଠାଇଛନ୍ତି ରାନୀ ପଣ୍ଡା ।
Kanak News is now on WhatsApp
Join and get latest news updates delivered to you via WhatsApp
ଖୋର୍ଦ୍ଧାର ଏକ ଘରୋଇ ଇଂଜିନିୟରିଂ କଲେଜରେ ଡିପ୍ଲୋମା କରୁଥିବା ରୋଜି ବେହେରାଙ୍କ ଜୀବନ ସଂଘର୍ଷର କାହାଣୀ କନକ ନ୍ୟୁଜରେ ପ୍ରସାରଣ ହୋଇଥିଲା । ସିଭିଲି ଇଂଜିନିୟରିଂରେ ଡିପ୍ଲୋମା ସରିଥିଲେ ବି ତାଙ୍କ ସାର୍ଟିଫିକେଟ ମିଳିନାହିଁ । କାରଣ କଲେଜର ବକେୟା ୨୫ ହଜାର ଟଙ୍କା ସେ ଦେଇ ପାରି ନାହାନ୍ତି । ବାପା ମାଆଙ୍କର ସେମାନେ ୫ ଝିଅ, ସମସ୍ତେ ପାଠ ପଢୁଛନ୍ତି, ଆଉ ଖର୍ଚ୍ଚ ତୁଳାଇବା ପରିବାର ପକ୍ଷରେ ସମ୍ଭବ ହୋଇପାରୁନଥିବାରୁ କଲେଜ ଫି ଦେଇ ପାରିନାହାନ୍ତି । ତେଣୁ କଲେଜରେ ଫସିଥିବା ସାର୍ଟିଫିକେଟକୁ ମୁକୁଳାଇବା ପାଇଁ ଏଭଳି ମୁଲ ଲାଗୁଛନ୍ତି ରୋଜି ବେହେରା । ହେଲେ ରାନୀ ପଣ୍ଡାଙ୍କ ଠାରୁ ସହାୟତା ପାଇବା ପରେ ରୋଜି ତାଙ୍କ ସାର୍ଟିଫିକେଟ୍ ମୁକୁଳାଇବାରେ ସମର୍ଥ ହେବେ ବୋଲି ଆମେ ଆଶା କରୁଛୁ ।