ଭଉଣୀକୁ କମେଣ୍ଟ୍ କଲେ , ମାମୁଁଙ୍କ ମୁଣ୍ଡକୁ ଗୁଳି ମାରିଲେ : ଗୁଳି ମାଡ଼ରେ ଚାଲିଗଲା ସାମ୍ବାଦିକଙ୍କ ଜୀବନ । କାନ୍ଦି କାନ୍ଦି ଘଟଣା ବଖାଣିଲେ ଭଣଜା , କହିଲେ ନ୍ୟାୟ ନମିଳିବା ଯାଏଁ ମାମୁଁଙ୍କ ଶବଦାହ କରିବୁନାହିଁ ।
ରାଜଧାନୀ ଦିଲ୍ଲୀର ଗାଜିଆବାଦରେ ଗତ ୧୬ ଜୁଲାଇରେ ଜଣେ ସାମ୍ବାଦିକଙ୍କ ଭାଣିଜୀଙ୍କୁ କମେଣ୍ଟ୍ ମାରିଥିଲେ କିଛି ଦୁର୍ବୃତ୍ତ । ଏନେଇ ଥାନାରେ ଏତଲା ଦେଇଥିଲେ ମାମୁଁ । ପ୍ରତିଶୋଧ ପରାୟଣ ହୋଇ ସୋମବାର ଉକ୍ତ ସାମ୍ବାଦିକଙ୍କୁ ଗୁଳି କରିଥିଲେ ଦୁର୍ବୃତ୍ତ । ବୁଧବାର ସାମ୍ବାଦିକ ବିକ୍ରମ ଯୋଶୀ ହସ୍ପିଟାଲରେ ଶେଷ ନିଶ୍ୱାସ ତ୍ୟାଗ କରିଛନ୍ତି । ସାମ୍ବାଦିକଙ୍କ ହତ୍ୟା ଘଟଣାରେ ଗାଜିଆବାଦ୍ ପୋଲିସ୍ ୯ ଜଣ ଅଭିଯୁକ୍ତଙ୍କୁ ଗିରଫ କରିଛି । ଅନ୍ୟପକ୍ଷରେ ଘଟଣାକୁ ଚପାଇଦେବାକୁ ନେଇ ଥାନା ଇନଚାର୍ଜଙ୍କୁ ସସପେଣ୍ଡ ମଧ୍ୟ କରାଯାଇଛି ।
Kanak News is now on WhatsApp
Join and get latest news updates delivered to you via WhatsApp
ସାମ୍ବାଦିକ ବିକ୍ରମ ଯୋଶୀ ଭାଣିଜୀଙ୍କୁ ହଇରାଣ କରିବା ଏବଂ କମେଣ୍ଟ୍ ମାରୁଥିବା ଯୁବକଙ୍କ ନାଁରେ ଥାନାରେ ଏତଲା ଦେଇଥିଲେ । ହେଲେ ଏନେଇ ପୋଲିସ୍ ପକ୍ଷରୁ କୌଣସି କାର୍ଯ୍ୟାନୁଷ୍ଠାନ ନିଆଯାଇନଥିଲା । ଏହାପରେ ପ୍ରତିଶୋଧ ପରାୟଣ ଯୁବକ ସାମ୍ବାଦିକଙ୍କୁ ସୋମବାର ବାଇକରେ ଯାଉଥିବା ସମୟରେ ଗୁଳି କରି ହତ୍ୟା କରିଥିଲେ ।
ଏହି ଘଟଣାର ସିସିଟିଭି ଫୁଟେଜ୍ ମଧ୍ୟ ସାମ୍ନାକୁ ଆସିଛି । ଯେଉଁଥିରେ ୫ ରୁ ୬ ଜଣ ଲୋକ ସାମ୍ବାଦିକଙ୍କୁ ମାରପିଟ୍ କରୁଥିବା ବେଳେ ଆଉ ଜଣେ ଯୁବକ ଆସି ମୁଣ୍ଡ ପାଖରୁ ତାଙ୍କୁ ଗୁଳି ମାରୁଥିବା ଦେଖାଯାଉଛି । ଗୁଳି ମାରିବା ପରେ ଅପରାଧି ସେଠାରୁ ଫେରାର୍ ହୋଇଯାଉଥିବା ବେଳେ ସାମ୍ବାଦିକଙ୍କ କୁନିଝିଅ ସମସ୍ତଙ୍କୁ ସାହାଯ୍ୟ ପାଇଁ ନେହୁରା ହେଉଥିବା ନଜର ଆସୁଛନ୍ତି । ଏନେଇ ବିକ୍ରମଙ୍କ ଭଣଜା କହିଛନ୍ତି , ପୋଲିସ୍ ଯଦି ପୂର୍ବରୁ ସଠିକ୍ ଢଙ୍ଗରେ କାର୍ଯ୍ୟାନୁଷ୍ଠାନ ଗ୍ରହଣ କରିଥାନ୍ତେ ତେବେ ଆଜି ଆମକୁ ଏ ଦଶା ଦେଖିବାକୁ ପଡିନଥାନ୍ତା । ଯେଉଁ ପର୍ଯ୍ୟନ୍ତ ଆମକୁ ନ୍ୟାୟ ନମିଳିଛି ସେ ପର୍ଯ୍ୟନ୍ତ ଆମେ ମାମୁଁଙ୍କ ଶବଦାହ କରିବୁନାହିଁ ।