ଆଶ୍ଚର୍ଯ୍ୟ ହେଲେ ବି ସତ…ଭ୍ୟାକ୍ସିନ୍ ନେଲେ ମାଗଣାରେ ମିଳିବ ମୋବାଇଲ୍ । ଜାଣନ୍ତୁ କେଉଁଠି ଆରମ୍ଭ ହେଲା ଏମିତି ସୁବିଧା ।
କନକ ବ୍ୟୁରୋ : ଟୀକା ନେଲେ ମିଳିବ ସ୍ମାର୍ଟଫୋନ୍ । ଭ୍ୟାକସିନ୍ ନେଲେ ମାଗଣାରେ ମିଳିବ ମୋବାଇଲ୍ । କରୋନା ଟୀକା ନେଲେ ଆପଣଙ୍କୁ ମାଗଣାରେ ମୋବାଇଲ୍ ଫୋନ୍ ମିଳିବ । ଆଶ୍ଚର୍ଯ୍ୟ ହୋଇଗଲେ ନା…କିନ୍ତୁ ଏହା ସତ । ଯଦି ଆପଣ କରୋନା ଟୀକା ନେଉଛନ୍ତି ତେବେ ଆପଣ ଏକ ସ୍ମାର୍ଟଫୋନ୍ ଜିତିବାର ସୁଯୋଗ ପାଇପାରିବେ । ଏଭଳି କିଛି ପ୍ରସ୍ତୁତି ଚଳାଇଛି ଭୋପାଳ ଜିଲ୍ଲା ପ୍ରଶାସନ ।
Kanak News is now on WhatsApp
Join and get latest news updates delivered to you via WhatsApp
କରୋନା ଭାଇରସର ଦ୍ୱିତୀୟ ଲହର ସଂକ୍ରମଣ ପୂରା ବିଶ୍ୱରେ କାୟା ମେଲାଇଥିବା ବେଳେ, ସଂକ୍ରମଣର ଚେନ୍ ଭାଙ୍ଗିବା ପାଇଁ ପ୍ରାୟତଃ ସବୁ ଦେଶ କଟକଣା ଜାରି କରିଛନ୍ତି । ବିଶେଷ କରି ମାସ୍କ ପିନ୍ଧିବା ଉପରେ ଗୁରୁତ୍ୱ ଦିଆଯାଇଥିବା ବେଳେ ସାମାଜିକ ଦୂରତାକୁ ବାଧ୍ୟତାମୂଳକ କରାଯାଇଛି । ତେବେ କରୋନା ବିରୋଧୀ ଯୁଦ୍ଧରେ ସବୁଠୁ ବଡ଼ ଅସ୍ତ୍ର ହେଉଛି ଟୀକା । ସେଥିପାଇଁ ପୂରା ବିଶ୍ୱରେ ଚାଲିଛି ଟୀକାଦାନ ପ୍ରକ୍ରିୟା ।
ତେବେ ଏହି ଟୀକା ଦାନ ପ୍ରକ୍ରିୟାରେ ସାମିଲ ହୋଇ ଅନେକ ଲୋକ ଟୀକା ନେଉଥିବା ବେଳେ, କିଛି ଏମିତି ବି ଲୋକ ରହିଛନ୍ତି, ଯେଉଁମାନେ ଟୀକା ନେବାକୁ ଇଚ୍ଛା ପ୍ରକାଶ କରୁନାହାନ୍ତି କିମ୍ବା ଭୟ କରୁଛନ୍ତି । ତେବେ ଲୋକଙ୍କ ଭିତରେ ଟୀକା ନେବାକୁ ଉତ୍ସାହ ଆଣିବା ପାଇଁ କିଛି ଏଭଳି ନିଆରା ପ୍ରସ୍ତୁତି ଚଳାଇଛି ଭୋପାଳ ଜିଲ୍ଲା ପ୍ରଶାସନ ।
ଅଧିକରୁ ଅଧିକ ଲୋକଙ୍କ ଟୀକାକରଣ ଲାଗି ଲକ୍ଷ୍ୟ ରଖାଯାଇଛି । ଲୋକଙ୍କୁ ମୋବାଇଲ୍ ଫୋନ୍ ଦେବା ପାଇଁ ଏକ ଆକର୍ଷଣୀୟ ଅଫର ଦିଆଯିବ, ଯାହାଦ୍ୱାରା ଅଧିକରୁ ଅଧିକ ଲୋକ ଟୀକା ନେବାକୁ ଆସିବେ । ବିଶେଷ କରି ଯେଉଁଠାରେ କମ୍ ଟିକାକରଣ ହୋଇଛି, ସେହିଠାରେ ଏହି ଯୋଜନା କରାଯିବ ।
ବାସ୍ତବ କଥା ହେଉଛି, କୌଣସି ଭୁଲ ଧାରଣା ହେତୁ, ଭୋପାଳର ଗ୍ରାମାଂଚଳର ଲୋକେ ଟୀକା ନେବାକୁ ଆଗ୍ରହ ପ୍ରକାଶ କରୁନାହାନ୍ତି । ସେଥିପାଇଁ ଟୀକାକରଣକୁ ପ୍ରୋତ୍ସାହିତ କରିବା ପାଇଁ ଏଭଳି କୌଶଳ ଆପଣେଇଛି ଭୋପାଳ ଜିଲ୍ଲା ପ୍ରଶାସନ । ଲୋକଙ୍କୁ ଉତ୍ସାହିତ କରିବା ପାଇଁ ମୋବାଇଲ୍ ଫୋନ୍ ଉପହାର ଦେବା ପାଇଁ ଯୋଜନା କରାଯାଇଛି । ଆଉ ଏଥିପାଇଁ ମୋବାଇଲ୍ କମ୍ପାନୀ ଲାଭା ସହ ଆଲୋଚନା କରିଛି ଜିଲ୍ଲା ପ୍ରଶାସନ । ଏହି ଯୋଜନାରେ କମ୍ପାନୀ ଦ୍ୱାରା ଲୋକଙ୍କୁ ମୋବାଇଲ୍ ଫୋନ୍ ଯୋଗାଇ ଦିଆଯିବ ।
ତେବେ ଏହି ଯୋଜନା ଅନୁଯାୟୀ, ଗ୍ରାମାଂଚଳର ଟୀକାକରଣ କେନ୍ଦ୍ରକୁ ଆସି ଟୀକା ନେଉଥିବା ବ୍ୟକ୍ତିଙ୍କ ମଧ୍ୟରୁ ଏକ ଲକି ଡ୍ର ବଛାଯିବ । ଆଉ ଏହି ଲକି ଡ୍ର ମାଧ୍ୟମରେ ୧୦ଜଣଙ୍କୁ ମିଳିବ ମୋବାଇଲ୍ ଫୋନ୍ । ଯାହାଦ୍ୱାରା ସେମାନେ ଗାଁକୁ ଯାଇ ଅଧିକ ଲୋକଙ୍କୁ ଟୀକାକରଣ ପାଇଁ ପ୍ରେରଣା ଯୋଗାଇପାରିବେ ।