ରାଜନୀତିରେ ନିର୍ବାଚନୀ ଋତୁ: ପଲିଟିକ୍ସର ପାରଦ ୪୦ ଡିଗ୍ରୀ ପାର୍ । ଖରାକୁ ଖାତିର୍ ନକରି ନେତା କରୁଛନ୍ତି ଝାଳବୁହା ପ୍ରଚାର…
କନକ ବ୍ୟୁରୋ: ମୁଣ୍ଡ ଉପରେ ଟାଇଁ ଟାଇଁ ଖରା । ଦିନର ବୟସ ଟିକେ ବଢିଲେ ଖରା ଏତେ ଟାଣ କରୁଛି ଯେ, ଆକାଶରୁ ନିଆଁହୁଳା ବର୍ଷିଲା ପରିକା ଲାଗୁଛି । ଦେହମୁହଁ ଝାଞ୍ଜିରେ ପୋଡି ଯାଉଛି, ମୁଣ୍ଡରୁ ଗମଗମ ଝାଳ ବୋହୁଛି । ତଥାପି ରୁମାଲରେ ଝାଳ ଟିକେ ପୋଛି ଦେଇ ପୁଣି ଉଦୁଉଦିଆ ଖରାବେଳଟାରେ ପ୍ରଚାର ଜୋରଦାର ଚାଲୁଛି । ନା ଖରାକୁ ଖାତିର ଅଛି ନା ଗ୍ରୀଷ୍ମର ଏ ନାଲି ଆଖିକୁ । କାରଣ ନେତାଙ୍କ ପାଇଁ ଏବେ ନିର୍ବାଚନ ଋତୁ ଆସିଯାଇଛି…
Kanak News is now on WhatsApp
Join and get latest news updates delivered to you via WhatsApp
ଲୋକଙ୍କ ପାଇଁ ଏହା ଗ୍ରୀଷ୍ମ ଋତୁ ହୋଇପାରେ ସତ ହେଲେ ନେତାଙ୍କ ପାଇଁ ଏହା ନିର୍ବାଚନୀ ଋତୁ । ଏ ଋତୁ ସେମାନଙ୍କ ରାଜନୈତିକ ଜୀବନରେ ବସନ୍ତ ବି ଭରିପାରେ, ନିଦାଘ ବି ଆଣିପାରେ । କାରଣ ନେତା ଜାଣନ୍ତି ଏହି ମାସେ, ଦେଢ ମାସ ଭଲକି ଖଟିଦେଲେ ସେମାନଙ୍କୁ ସେମାନଙ୍କ ପରିଶ୍ରମର ଫଳ ମିଳିଯିବ । ତେଣୁ କ୍ଷମତାର ଏ ଲୋଭ ଆଗରେ ନାହିଁ ଖରାକୁ ଖାତିର ।
ରାଜ୍ୟରେ ଅସମ୍ଭାଳ ତାତିରେ ନେତା କରୁଛନ୍ତି ଝାଳବୁହା ପ୍ରଚାର । ଖରାକୁ ନାହିଁ ଡର, ପ୍ରାର୍ଥୀ ବୁଲୁଛନ୍ତି ଘରକୁ ଘର । ଓଡିଶାରେ ବିଧାନସଭା ଓ ଲୋକସଭା ନିର୍ବାଚନ ପାଇଁ ଯଦିଓ ତାରିଖ ଘୋଷଣା ସରିଛି ତଥାପି ୩ ପ୍ରମୁଖ ଦଳ ନିଜ ନିଜ ଯୋଦ୍ଧା ଏଯାଏଁ ପୂରା ଘୋଷଣା କରି ନାହାନ୍ତି । ବିଜେପି, ବିଜେଡି, କଂଗ୍ରେସ- ଉଭୟ ବିଧାନସଭା ଓ ଲୋକସଭା ପ୍ରାର୍ଥୀ ଘୋଷଣା ଅସମ୍ପୂର୍ଣ୍ଣ ରଖିଛନ୍ତି । ବିଜେପି ୨୧ ଲୋକସଭା ଆସନ ପାଇଁ ପ୍ରାର୍ଥୀ ଘୋଷଣା କରି ସାରିଥିବା ବେଳେ ବିଜେଡି ଆହୁରି ଗୋଟିଏ ଆସନରେ ପ୍ରାର୍ଥୀ ଦେଇନି । ବାଲେଶ୍ୱର ବିଜେଡି ପାଇଁ ବଡ ପାଚେରୀ ଛିଡା କରିଥିବା ବେଳେ ଟିକେଟ୍ ଗଣିତ ଛିଡି ପାରୁନି । ସେହିପରି ୩ ଦଳ ବିଧାନସଭା ପ୍ରାର୍ଥୀ ଘୋଷଣା ମଧ୍ୟ ଧିରେ ଧିରେ କରୁଛନ୍ତି ।
ଆଉ ଏତିକି ବେଳେ ଯେଉଁମାନଙ୍କୁ ଟିକେଟ୍ ମିଳି ସାରିଛି ସେମାନେ ନିଜ ନିଜ ଅଞ୍ଚଳରେ ମୈଦାନକୁ ଓହ୍ଲାଇ ପ୍ରଚାର ଆରମ୍ଭ କଲେଣି । ପ୍ରାୟ ଅନେକ ସ୍ଥାନରେ ବିଜେପି ପ୍ରାର୍ଥୀମାନେ ପ୍ରଚାରକୁ ଜୋରଦାର କରିଥିବା ଜଣାପଡିଛି । ସିମୁଳିଆରେ ବିଜେପି ଜୋରସୋରରେ ପ୍ରଚାର ଆରମ୍ଭ କରିଛି । ବିଜେପିର ଭଦ୍ରକ ଲୋକସଭା ପ୍ରାର୍ଥୀ ଅଭିମନ୍ୟୁ ସେଠୀ ଏବଂ ସିମୁଳିଆ ବିଧାନସଭା ପ୍ରାର୍ଥୀ ମିଳିତ ଭାବେ ପ୍ରଚାର ମଇଦାନକୁ ଓହ୍ଲାଇଛନ୍ତି । ସେହିପରି ବୌଦ୍ଧରେ ସରୋଜ କୁମାର ପ୍ରଧାନ ସମର୍ଥକଙ୍କୁ ଧରି ଶୋଭାଯାତ୍ରା କରିଛନ୍ତି ।
ଟିକଟ ଘୋଷଣା ପରେ ମଇଦାନକୁ ଓହ୍ଲାଇଛନ୍ତି କବିସୂର୍ଯ୍ୟନଗରର ବିଜେପି ପ୍ରାର୍ଥୀ ପ୍ରତାପ ଚନ୍ଦ୍ର ନାୟକ । କର୍ମୀଙ୍କ ବିପୁଳ ସ୍ୱାଗତ ସମ୍ବର୍ଦ୍ଧନା ସହ ବାଇକ ରାଲିରେ ସାମିଲ ହୋଇଛନ୍ତି । ସେହିପରି ସତ୍ୟବାଦୀ ନିର୍ବାଚନ ମଣ୍ଡଳୀରେ ବିଜେପିର ପ୍ରାର୍ଥୀ ଓମ ପ୍ରକାଶ ମିଶ୍ର ନିଜର ପ୍ରଥମ ନିର୍ବାଚନୀ ପ୍ରଚାର ଆରମ୍ଭ କରିଛନ୍ତି । ତେବେ ଟାଣଖରାକୁ ଟାଏଟାଏ କରି ନିର୍ବାଚନୀ ପରୀକ୍ଷା ଦେବା ପାଇଁ ପ୍ରାର୍ଥୀ କରୁଥିବା ଝାଳବୁହା ପରିଶ୍ରମର ଫଳ କାହାକୁ କେମିତି ମିଳୁଛି ତାହା ଜୁନ୍ ୪ରେ ହିଁ ଜଣା ପଡିବ ।