କନକ ବ୍ୟୁରୋ : ବିଜେଡିରେ ତୀବ୍ର ବିବାଦ ଆରମ୍ଭ ହେବା ପରେ ଭୁବନେଶ୍ୱରରେ ପହଂଚିଛନ୍ତି ନବୀନଙ୍କ ସଙ୍କଟ ମୋଚକ ତାଙ୍କ ବଡ ଭଉଣୀ ଗୀତା ମେହେଟ୍ଟା । ଆଜି ନବୀନ ନିବାସରେ ବସିଥିଲା ଗୀତା ଦରବାର । କିଛି ବରିଷ୍ଠ ପ୍ରଶାସକ ମଧ୍ୟ ପହଂଚିଥିଲେ ନବୀନ ନିବାସରେ । ମୁଖପାତ୍ର ପ୍ରତାପ ଦେବଙ୍କୁ ବି ଡକରା ପଡିଥିଲା । କୁହାଯାଉଛି, ଦଳରେ ସୃଷ୍ଟି ହୋଇଥିବା ଏହି ବିବାଦ ଉପରେ ପରାମର୍ଶ କରିଥିଲେ ଗୀତା । କିନ୍ତୁ ଏସବୁ ଘଟଣାବଳୀକୁ ଗଣମାଧ୍ୟମଠାରୁ ଦୂରେଇ ରଖାଯାଇଥିଲା ।
Kanak News is now on WhatsApp
Join and get latest news updates delivered to you via WhatsApp
ଚାରି ଚାରି ଥରର ସାଂସଦ ବୈଜୟନ୍ତ ପଣ୍ଡା ଦଳରେ ବୋମା ପକାଇବା ପରେ ବିଜେଡି ରାଜନୀତିରେ ଭୂକମ୍ପ ସୃଷ୍ଟି ହୋଇଛି । କାରଣ ଏଥର ଉଠିଛି ଦଳ ଭାଙ୍ଗି ଯିବାର ଆଶଙ୍କା । ଦଳର ବରିଷ୍ଠ ନେତା ତଥା ସାଂସଦ ତଥାଗତ ଶତପଥୀ ଟୁଇଟ୍ କରି ବିଜେଡି ଭାଙ୍ଗିଯିବ ବୋଲି ଆଶଙ୍କା ପ୍ରକାଶ କରିବା ସହ ବୈଜୟନ୍ତ ଏଥିରେ ସହାୟତା କରୁଛନ୍ତି ବୋଲି ଇସାରା କରିବା ପରେ ବିଜେଡିରେ ଛନକା ପଶିଛି । ଆଉ ସଙ୍କଟ ମୋଚକ ଭାବେ ନବୀନ୍ ନିବାସରେ ଦରବାର ମେଲିଛନ୍ତି ଗୀତା ।
ଦଳର ମୁଖପାତ୍ର ପ୍ରତାପ ଦେବ ମଧ୍ୟ ପହଂଚିଥିଲେ ନବୀନ୍ ନିବାସରେ । କିଛି ସମୟ ରହିବା ପରେ ଫେରିଯାଇଥିଲେ ପ୍ରତାପ । କିନ୍ତୁ କେହି କିଛି ପାଟି ଖୋଲିବାକୁ ରାଜି ନଥିଲେ ।