କନକ ବ୍ୟୁରୋ: ଗଞ୍ଜାମ ଖଲ୍ଲିକୋଟରେ ଟିକାକରଣ କେନ୍ଦ୍ରରେ ଅସମ୍ଭାଳ ଭିଡ଼ । ଟିକା ନେବା ପାଇଁ ରାତି ୧୨ଟାରୁ ଧାଡ଼ିରେ ଛିଡ଼ା ହେଉଛନ୍ତି ଶତାଧିକ ପୁରୁଷ-ମହିଳା । ଦିନରେ ଟିକା ପାଇବାକୁ ରାତି ସାରା ଲୋକ ହେଉଛନ୍ତି ରାତି ଅନିଦ୍ରା । ସେହିପରି ଭଂଜନଗରରେ ମଧ୍ୟ ଦେଖିବାକୁ ମିଳିଛି ଟିକା କେନ୍ଦ୍ର ବାହାରେ ଶହ ଶହ ଲୋକଙ୍କ ଭିଡ । ଆଉ ଲୋକଙ୍କ ଭିଡକୁ ଦେଖି ଡାକ୍ତରଖାନା କର୍ତ୍ତୃପକ୍ଷ ଟିକାକରଣ ବନ୍ଦ କରି ପୋଲିସକୁ ଡାକିବାକୁ ବାଧ୍ୟ ହୋଇଥିଲେ ।
Kanak News is now on WhatsApp
Join and get latest news updates delivered to you via WhatsApp
କରୋନା ଟିକା ନେବା ପାଇଁ ଏମିତି ବି ଲୋକ ଡାକ୍ତରଖାନା ବାହାରେ ଅପେକ୍ଷା କରୁଥିବେ, କହିଲେ କେହି ହୁଏତ ବିଶ୍ୱାସ କରିବେନି । ହେଲେ ସାରା ରାତି ଟିକାକରଣ କେନ୍ଦ୍ର ଆଗରେ ଧାଡିରେ ରହୁଛନ୍ତି ଲୋକେ ।
ଖଲ୍ଲୋକୋଟର କଲ୍ୟାଣୀ ମଣ୍ଡପ ଓ ଏସ୍ଏମ୍ ହାଇସ୍କୁଲରେ ଚାଲିଥିବା ଟିକା କେନ୍ଦ୍ରରେ ଟିକି ଡୋଜ୍ ଟିଏ ପାଇବାକୁ ଅନ୍ଧାର ରାତିରେ ଏମିତି ଅପେକ୍ଷା କରୁଛନ୍ତି ଶତାଧିକ ପୁରୁଷ ମହିଳା । ଖଲ୍ଲିକୋଟରେ ଏବେ ୩ଟି ଟିକା କେନ୍ଦ୍ରରେ ଟିକାକରଣ ଜାରି ରହିଛି । ଆଉ ୧୮ରୁ ୪୪ ବର୍ଷର ଯୁବପୀଢି ଟିକା ନେବା ପାଇଁ ଏଭଳି ଗହଳି ଲଗାଉଛନ୍ତି । ଖଲ୍ଲିକୋଟରେ ପଂଚାୟତ ସ୍ତରରେ ଟିକା କେନ୍ଦ୍ର ବ୍ୟବସ୍ଥା କରାଯାଇଥିଲେ ମଧ୍ୟ ଖୋର୍ଦ୍ଧା ଅଂଚଳରୁ ବହୁ ଲୋକ ଖଲ୍ଲିକୋଟକୁ ଟିକା ନେବା ପାଇଁ ଆସୁଛନ୍ତି । ରାତିରୁ ଶହ ଶହ ମହିଳା ଓ ପୁରୁଷଧାଡି ବାନ୍ଧି ସକାଳ ଯାଏଁ ଛିଡା ହେଉଛନ୍ତି ।
ଲୋକ ଏବେ କରୋନା ଟିକା ନେବାକୁ ସଚେତନ ହୋଇଛନ୍ତି । ଟିକା ନେବା ପାଇଁ ସେମାନଙ୍କ ମନରେ ଆଗ୍ରହ ବଢିଛି । ହେଲେ ଟିକା ପାଇବାକୁ ରାତି ଅଧିଆ ଅନିଦ୍ରା ରହିବା , ଟିକାକରଣ ପ୍ରକ୍ରିୟାର ବ୍ୟବସ୍ଥା ଆଡକୁ ଅଙ୍ଗୁଳି ନିର୍ଦ୍ଦେଶ କରୁଛି ।
ଖଲ୍ଲିକୋଟରେ ଟିକା ପାଇଁ ରାତିରେ ଭିଡର ଦୃଶ୍ୟ ଦେଖିଥିଲେ । ଏ ହେଉଛି ଗଞ୍ଜାମ ଜିଲ୍ଲା ଭଂଜନଗର ବ୍ଳକ ବାହାଡ଼ାପଦର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରର ଦୃଶ୍ୟ । ଟିକାକରଣ ପାଇଁ ଲୋକଙ୍କ ନାହିଁ ନଥିବା ଭିଡ଼ । ଡାକ୍ତରଖାନାରେ ରହିଛି ମାତ୍ର ୩୮୦ ଡୋଜ୍ । ଅନଲାଇନରେ ୩୦୦ ସ୍ଲଟ୍ ବୁକ୍ ହୋଇଛି । ୮୦ ଡୋଜ୍ ଅନସ୍ପଟ୍ ଦିଆଯିବ । ହେଲେ ଭିଡରେ ଏତେ ଲୋକ ଆସିଛନ୍ତି ଯେ କାହାକୁ ଟିକା ଦେବେ ଅଡୁଆରେ ପଡିଛନ୍ତି ଡାକ୍ତରଖାନା କର୍ତୃପକ୍ଷ । ବାଧ୍ୟ ହୋଇ ଡାକ୍ତରଖାନା କର୍ତୃପକ୍ଷ ପୋଲିସକୁ ଜଣାଇଛନ୍ତି ।
ଲୋକମାନେ କରୋନା ଟିକା ପାଇଁ ଏଭଳି ଦାବି କରିବା ଭିତରେ ସାମାଜିକ ଦୂରତା କଥା ପୁରା ଭୁଲି ଯାଇଛନ୍ତି । ଧାଡି କେଉଁଟା ବି ଖୋଜି ପାଇବା କଷ୍ଟକର । ସକାଳୁ ଆସି ଡାକ୍ତରଖାନା ଆଗରେ ଅପେକ୍ଷା କରିଥିବା ଲୋକ କିନ୍ତୁ ଟିକା ପାଇଁ ଜିଦ୍ କରିଥିଲେ । ସରକାର ଅନସ୍ପଷ୍ଟ୍ ଟିକାକରଣ ପାଇଁ ଘୋଷଣା କରିଥିବାରୁ , ଡାକ୍ତରଖାନାକୁ ଆସିଥିବା ସମସ୍ତ ଲୋକ ଟିକା ଦେବାକୁ ଲୋକ ଦାବି କରିଥିଲେ ।