ଗଞ୍ଜାମରେ କମୁଛି କରୋନା ସଂକ୍ରମଣ । ବିକଶିତ ହେଉଛି କି ହର୍ଡ ଇମ୍ୟୁନିଟି? ଡାକ୍ତର କହିଲେ, ଲକଡାଉନ୍ ପାଇଁ କମିଛି ସଂକ୍ରମଣ, ପୁଣି ବଢିପାରେ ସଂଖ୍ୟା ।
କନକ ବ୍ୟୁରୋ : କରୋନା ସଂକ୍ରମଣରେ ରାଜ୍ୟର ଶୀର୍ଷରେ ଥିବା ଗଂଜାମ ଜିଲ୍ଲାରେ ଗତ ୬ ଦିନ ହେଲା ଆକ୍ରାନ୍ତଙ୍କ ସଂଖ୍ୟା କମିବାରେ ଲାଗିଛି । ହ୍ରାସ ପାଉଥିବା ସଂକ୍ରମଣକୁ ଦେଖି ପ୍ରଶ୍ନ ଉଠୁଛି ଯେ, ଗଂଜାମରେ ବିକଶିତ ହେଉଛି କି ହର୍ଡ ଇମ୍ୟୁନିଟି ବା ସମୂହ ପ୍ରତିରୋଧକ ଶକ୍ତି । ତେବେ ବରିଷ୍ଠ ମେଡିସିନ୍ ସ୍ପେଶାଲିଷ୍ଟ ଡାକ୍ତର ନିରୋଜ ମିଶ୍ରଙ୍କ କହିବା କଥା ହେଉଛି, ଲକଡାଉନ୍ ଯୋଗୁଁ ଜିଲ୍ଲାରେ ସଂକ୍ରମଣ ନିୟନ୍ତ୍ରଣକୁ ଆସିଛି, ଲକଡାଉନ୍ ଖୋଲିଲେ ପୁଣି ସଂଖ୍ୟା ବଢିଯାଇପାରେ । ସେପଟେ ଡାକ୍ତର ଅଶୋକ ମହାପାତ୍ର କହିଛନ୍ତି, ଆସନ୍ତା ୭ ଦିନ ଗଂଜାମ ପାଇଁ ବେଶ୍ ଗୁରୁତ୍ୱପୂର୍ଣ୍ଣ ।
Kanak News is now on WhatsApp
Join and get latest news updates delivered to you via WhatsApp
ଗଞ୍ଜାମ
ଜୁଲାଇ ୨୪ ୭୩୨
ଜୁଲାଇ ୨୫ ୫୬୦
ଜୁଲାଇ ୨୬ ୪୮୪
ଜୁଲାଇ ୨୭ ୪୯୧
ଜୁଲାଇ ୨୮ ୩୩୨
ଜୁଲାଇ ୨୯ ୨୪୫
ରାଜ୍ୟରେ ସଂକ୍ରମଣର ଶୀର୍ଷରେ ଥିବା ଗଂଜାମ ଜିଲ୍ଲାର ଚିତ୍ର ବଦଳୁଛି । ଗତ ୭ ଦିନର କରୋନା ଗ୍ରାଫ କହୁଛି ଯେ, ଜିଲ୍ଲାରେ ହ୍ରାସ ପାଉଛି କରୋନା ଆକ୍ରାନ୍ତଙ୍କ ସଂଖ୍ୟା । ଜୁଲାଇ ୨୪ରେ ୭ ଶହରୁ ଅଧିକ ନୂଆ ଆକ୍ରାନ୍ତ ଚିହ୍ନଟ ହୋଇଥିବା ବେଳେ ଏହାର ୫ ଦିନ ପରେ ସଂଖ୍ୟା ପହଁଚିଛି ୨୪୫ରେ । ଧିରେ ଧିରେ ଆକ୍ରାନ୍ତଙ୍କ ସଂଖ୍ୟା କମିବାରେ ଲାଗିଛି ।
ଗଞ୍ଜାମରେ ହ୍ରାସ ପାଉଛି ସଂକ୍ରମଣ । ବିକଶିତ ହେଉଛି କି ହର୍ଡ ଇମ୍ୟୁନିଟି ? ଡାକ୍ତର ନିରୋଜ ମିଶ୍ରଙ୍କ କହିବା କଥା ହେଉଛି, ଯଦି ଲକଡାଉନ୍ ପାଇଁ ଗଂଜାମରେ ସଂକ୍ରମଣ ହ୍ରାସ ପାଇଛି ତେବେ ଲକଡାଉନ୍ ଖୋଲିବା ପରେ ସଂଖ୍ୟା ପୁଣି ବଢିଯିବ । ହର୍ଡ ଇମ୍ୟୁନିଟି ବା ସମୂହ ପ୍ରତିରୋଧ ଶକ୍ତି ପାଇଁ ୬୦ରୁ ୭୦ ପ୍ରତିଶତ ସଂକ୍ରମିତ ହେବା ଦରକାର ।
ଗଞ୍ଜାମ : ଆକ୍ରାନ୍ତ- ୯୭୪୬, ମୃତ- ୮୬ । ସାରା ରାଜ୍ୟରେ ଯେତିକି ସଂକ୍ରମିତ ହୋଇଛନ୍ତି ସେଥିରୁ ୩୪ ପ୍ରତିଶତ ହେଉଛନ୍ତି ଗଂଜାମର । ଜିଲ୍ଲାର ମୃତ୍ୟୁ ହାର ହେଉଛି ପାଖାପାଖି ୫୫ ପ୍ରତିଶତ । ବିଶେଷଜ୍ଞ ଡାକ୍ତର ଅଶୋକ ମହାପାତ୍ର କହିଛନ୍ତି, ସଂକ୍ରମଣ ଶୀର୍ଷ ସ୍ତରକୁ ଯିବା ପରେ ନିୟନ୍ତ୍ରଣକୁ ଆସେ ଏବଂ ତାପରେ ଧିରେ ଧିରେ କମେ । ତେଣୁ ଆସନ୍ତା ୭ ଦିନ ଗୁରୁତ୍ୱପୂର୍ଣ୍ଣ ।
ପ୍ରକୃତରେ ଗଂଜାମରେ ହର୍ଡ ଇମ୍ୟୁନିଟି ବା ସମୂହ ପ୍ରତିରୋଧ ଶକ୍ତି ବଢିଛି କି ନାହିଁ ତାହା ସେରୋ ସର୍ଭେରେ ଜଣାପଡିବ । ଗତ କିଛି ଦିନ ହେଲା ସଂଖ୍ୟା କମିବା ପରେ ଆଂଚଳିକ ଭେଷଜ ଗବେଷଣା କେନ୍ଦ୍ର ବା ଆରଏମଆରସି ଅନୁଭବ କରୁଛି ଯେ, ଏବେ ଗଂଜାମରେ ସେରୋ ସର୍ଭେ କରିବା ଦରକାର । ଏହି ସେରୋ ସର୍ଭେ ପରେ ହୁଏତ ଜଣାପଡିବ ଯେ, ଗଂଜାମରେ ସମୂହ ପ୍ରତିରୋଧ ଶକ୍ତି ବଢିଛି ନା ଲକଡାଉନ୍ ପାଇଁ ସାମୟିକ ଭାବେ ସଂକ୍ରମଣ ନିୟନ୍ତ୍ରଣକୁ ଆସିଛି ।