ସତ ହେଲା ଜିଲ୍ଲାପାଳଙ୍କ ଆକଳନ । ଗଞ୍ଜାମରେ ଖସିଲା କରୋନା ଗ୍ରାଫ୍, ଗଂଜାମ ଜିଲ୍ଲାପାଳ କହିଲେ ଟ୍ରେସିଂ, ଟେଷ୍ଟିଂ ଓ ସଙ୍ଗରୋଧ ଯୋଗୁଁ ହ୍ରାସ ପାଇଲା ସଂକ୍ରମଣ । ସେପଟେ ଗଞ୍ଜାମ ଯାଇ ସ୍ଥିତି ସମୀକ୍ଷା କଲେ ସ୍ୱାସ୍ଥ୍ୟ ସଚିବ ।
କନକ ବ୍ୟୁରୋ: ଓଡ଼ିଶାର ହଟସ୍ପଟ ବା କରୋନାର ଗଡ଼ କୁହାଯାଉଥିବା ଗଞ୍ଜାମରେ ସ୍ଥିତି ଏବେ ବି ଜଟିଳ ରହିଛି । ତେବେ ଗତ ୧୫ ଦିନରେ ଗଂଜାମ ଜିଲ୍ଲାରେ କିପରି ବଢିଛି କରୋନା?
ଜୁଲାଇ ୨୦ – ୨୩୯ ଆକ୍ରାନ୍ତ ଚିହ୍ନଟ
ଜୁଲାଇ ୨୪ – ୭୩୨
ଜୁଲାଇ ୨୭ – ୪୯୧
ଜୁଲାଇ ୩୧ – ୩୬୮
ଅଗଷ୍ଟ ୨ – ୩୨୦
ଅଗଷ୍ଟ ୪ – ୨୮୮
ଆଉ ଅଗଷ୍ଟ ୫ ତାରିଖରେ – ୨୦୧ ପଜିଟିଭ୍ ମାମଲା ଗଂଜାମ ଜିଲ୍ଲାରେ ସାମ୍ନାକୁ ଆସିଛି ।
ଜୁଲାଇ ୨୪ ତାରିଖରେ ଗୋଟିଏ ଦିନରେ ୭୩୨ଟି ଆକ୍ରାନ୍ତ ଚିହ୍ନଟ ହୋଇଥିଲା, ଯାହା ସମସ୍ତଙ୍କ ଚିନ୍ତା ବଢ଼ାଇ ଦେଇଥିଲା । ତେବେ ଧୀରେ ଧୀରେ ଅଗଷ୍ଟ ଆରମ୍ଭରେ ହ୍ରାସ ପାଇବାରେ ଲାଗିଛି ଆକ୍ରାନ୍ତଙ୍କ ସଂଖ୍ୟା ।
Kanak News is now on WhatsApp
Join and get latest news updates delivered to you via WhatsApp
ଗଂଜାମ ଜିଲ୍ଲାର ସ୍ଥିତି ଅସମ୍ଭାଳ ହେବା ସମୟରେ ଜିଲ୍ଲାପାଳ ସାମ୍ବାଦିକ ସମ୍ମିଳନୀ କରି ଲୋକଙ୍କୁ ଆଶ୍ୱସ୍ତ କରିଥିଲେ ଯେ ଆସନ୍ତା ୧୫ ଦିନ ମଧ୍ୟରେ ସ୍ଥିତି ଆୟତକୁ ଆସିଯିବ । ତେବେ କେଉଁ ଆଧାରରେ ଜିଲ୍ଲାପାଳ ଏଭଳି ଆକଳନ କଲେ, ସେ ନେଇ ପ୍ରଶ୍ନ ଉଠିଲା ।
କିନ୍ତୁ ଜିଲ୍ଲାପାଳଙ୍କ ଆକଳନ ଯାହା ଥିଲା, ସେହିଭଳି ହ୍ରାସ ପାଇଛି ଗଂଜାମ ଜିଲ୍ଲାରେ ସଂକ୍ରମଣ ।
କାହିଁକି କମିଲା ସଂକ୍ରମଣ, ଦେଖନ୍ତୁ କ’ଣ କହୁଛନ୍ତି ଜିଲ୍ଲାପାଳ?
– ଘରକୁ ଘର ଯାଇ ଲକ୍ଷଣ ଥିବା ବ୍ୟକ୍ତିଙ୍କୁ ଚିହ୍ନଟ କରିବାକୁ ଚେଷ୍ଟା କରାଗଲା
– ଫଳରେ ସବୁ ଲକ୍ଷଣ ଥିବା ବ୍ୟକ୍ତି ଠାବ ହୋଇଗଲେ
– ସେମାନଙ୍କର କରୋନା ପରୀକ୍ଷା କରାଗଲା ଏବଂ ସଙ୍ଗରୋଧ କରାଗଲା
– ପଜିଟିଭ ଥିବା ବ୍ୟକ୍ତିଙ୍କୁ ହସପିଟାଲ ନିଆଯାଇ ଚିକିତ୍ସା କରାଗଲା
– ଜିଲ୍ଲା ପ୍ରଶାସନ ପକ୍ଷରୁ ପରୀକ୍ଷା ବଢ଼ାଇ ଦିଆଗଲା
– ଫଳରେ ସଂକ୍ରମଣ କମିଗଲା ବୋଲି କହିଛନ୍ତି ଜିଲ୍ଲାପାଳ
ଏପଟେ ଗଂଜାମ ଗସ୍ତ କରି ସ୍ଥିତି ସମୀକ୍ଷା କରିଛନ୍ତି ସ୍ୱାସ୍ଥ୍ୟ ସଚିବ ଏବଂ ଡାକ୍ତରୀ ଶିକ୍ଷା ଓ ତାଲିମ ବିଭାଗର ନିର୍ଦ୍ଦେଶକ । ଯଦି ଜିଲ୍ଲାପାଳଙ୍କ କହିବା ଅନୁସାରେ ଏହି ପଦକ୍ଷେପଗୁଡତକ ପାଇଁ ସଂକ୍ରମଣ ହ୍ରାସ ପାଇଛି, ତେବେ ଏହା ନିଶ୍ଚୟ ଏକ ଶୁଭ ସଂକେତ । ସବୁ ଲକ୍ଷଣ ଥିବା ଲୋକଙ୍କୁ ଚିହ୍ନଟ କରି ସଙ୍ଗରୋଧ କରିବା କରୋନା ମୁକାବିଲାର ସବୁଠାରୁ ଭଲ ମଡେଲ ବୋଲି କୁହାଯିବ ।