କିଏ ଖସିଲା, କିଏ ଫସିଲା ? ନିଜ ମୁଣ୍ଡରୁ ଦୋଷ କାଢିନେଲା ଶକ୍ତି ବିଭାଗ, ବସରେ କରେଣ୍ଟ ଲାଗି ୧୦ ଜଣଙ୍କ ମୃତ୍ୟୁ ଘଟଣାରେ ବନ୍ଧା ହେଲେ ବସ ଡ୍ରାଇଭର ।
କନକ ବ୍ୟୁରୋ : ‘କୁଜି ଅସରପା ଉପରେ କାଣୀ ବିରାଡ଼ିର ରାଜ୍’। ବ୍ରହ୍ମପୁରର ମେନ୍ଦ୍ରାଜପୁରଠାରେ ଘଟିଥିବା ଲୋମଟାଙ୍କୁରା ବସ୍ ଦୁର୍ଘଟଣାରେ ପ୍ରଶାସନର ଆଭିମୁଖ୍ୟ, ଏଭଳି ଏକ ଉକ୍ତିକୁ ଯଥାର୍ଥ ପ୍ରମାଣିତ କରୁଛି । ଆଉ ଏହି ଘଟଣାରେ କେବଳ ବସର ଡ୍ରାଇଭର ଗିରଫ ହେବା, ସମସ୍ତଙ୍କୁ ଆଶ୍ଚର୍ଯ୍ୟ କରିଦେଇଛି ।
Kanak News is now on WhatsApp
Join and get latest news updates delivered to you via WhatsApp
ଗଞ୍ଜାମ ଜିଲ୍ଲା ମେନ୍ଦ୍ରାଜପୁରଠାରେ ଏକ ଘରୋଇ ବସ୍ ୧୧କେଭି ବିଦ୍ୟୁତ ତାର ସଂସ୍ପର୍ଶରେ ଆସି, ଏଥିରେ ୧୦ ଜଣଙ୍କର ମୃତ୍ୟୁ ହେବା ଘଟଣାରେ ଆଜି ବସର ଡ୍ରାଇଭରକୁ ଗିରଫ କରିଛି ଗୋଳନ୍ଥରା ପୋଲିସ । ରବିବାର ମଧ୍ୟାହ୍ନରେ ଘଟିଥିବା ଏହି ହୃଦୟ ବିଦାରକ ଘଟଣା, ସାରା ଓଡ଼ିଶାକୁ ଦୋହଲାଇ ଦେଇଥିଲା । କାହିଁକି ଏମିତି ଏକ ଅଘଟଣ ଘଟିଗଲା, ଆଉ ଏଥିପାଇଁ କିଏ ଦାୟୀ ? ସେନେଇ ଚାଲିଥିଲା ଚର୍ଚ୍ଚା ଆଲୋଚନା । ଆଉ ସବୁ ଦିଗକୁ ବିଶ୍ଳେଷଣ କଲେ, ସଷ୍ଟ ବାରି ହୋଇପଡୁଛି, ଏହି ଅଘଟଣ ପାଇଁ ବିଦ୍ୟୁତ ବିଭାଗ ହିଁ ଦାୟୀ । ବିଦ୍ୟୁତ ବିଭାଗର ଚରମ ଅବହେଳା ପାଇଁ ହିଁ ଏମିତି ଏକ ଅଘଟଣ ଘଟିଗଲା ।
କିଏ ଖସିଲା, କିଏ ଫସିଲା ? ବନ୍ଧା ହେଲେ ଡ୍ରାଇଭର । ବିଦ୍ୟୁତ ତାର ସଂସ୍ପର୍ଶରେ ଯାତ୍ରୀବାହୀ ବସ ଆସିବା ପଛରେ ସାମ୍ନାକୁ ଆସିଥିଲା ବିଜୁଳି ବିଭାଗର ଚରମ ଅବହେଳା । ରାସ୍ତାଠାରୁ ୬.୧ମିଟର ଉଚ୍ଚତାରେ ବିଦ୍ୟୁତ ତାର ଟାଣିବାକୁ ନିୟମ ଥିବା ବେଳେ ମାତ୍ର ୩.୧୪ମିଟର ଉଚ୍ଚତାରେ ଟଣା ଯାଇଥିଲା ୧୧କେଭିର ତାର । ଆଉ ରାସ୍ତା ଉପରେ ରହିଥିଲା ବିଦ୍ୟୁତ ଖୁଣ୍ଟ । କ’ଣ ଏଥିପାଇଁ ବସର ଡ୍ରାଇଭର ଦାୟୀ ।
ଥରେ ଭାବନ୍ତୁ, ଯଦି ତାରଟି ବସରେ ନଲାଗି, କୌଣସି ଲୋକଙ୍କ ଉପରେ ପଡିଯାଇଥାନ୍ତା, ତେବେ ଏଥିପାଇଁ କ’ଣ ଉକ୍ତ ଲୋକ ହିଁ ଦାୟୀ ହୋଇଥାନ୍ତେ । ରାସ୍ତାରେ କ’ଣ ଯା’ଆସ କରିବା ମନା ? ବିଦ୍ୟୁତ ବିଭାଗ ନିଜ ଦୋଷ ଲୁଚାଇବାକୁ ଯାଇ ଡ୍ରାଇଭର ଉପରେ ସବୁ ଦୋଷ ଲଦିଦେଉନାହାନ୍ତି ତ?
ହଁ ଏହା ଠିକ୍ ଯେ, ଡ୍ରାଇଭରଙ୍କୁ ସଚେତନ ହୋଇ ଗାଡିଚାଳନା କରିବାର ଥିଲା । କିନ୍ତୁ ରାସ୍ତା ଉପରେ ଝୁଲି ରହିଥିବା ତାର ଯେ, ମୃତ୍ୟୁର ଫାଶ ସାଜି ବସରେ ଲାଗିଯିବ, ତାହା କିଏ ଜାଣିଥିଲା । ଏହି ଘଟଣାରେ କ’ଣ ବିଦ୍ୟୁତ ବିଭାଗର କିଛି ବି ଭୁଲ୍ ନାହିଁ ? ଆଉ ଯଦି ଭୁଲ୍ ଅଛି, ତେବେ ଏପର୍ଯ୍ୟନ୍ତ କେତେ ଜଣ ଗିରଫ ହୋଇଛନ୍ତି । ୪ ଜଣ ଇଞ୍ଜିନିୟରଙ୍କୁ ସସପେଣ୍ଡ କରିଦେଲେ, କ’ଣ ସବୁ ଦୋଷ ତ୍ରୁଟି ମୁଣ୍ଡରୁ ଖସିଯିବ, ନା ଯେଉଁ କ୍ଷତି ହୋଇଛି ତାର ଭରଣା ହୋଇଯିବ । ଯଦି ଡ୍ରାଇଭର କାଠଗଡାକୁ ଟଣାହେବେ, ତେବେ ଏହି ଘଟଣା ପାଇଁ ଦାୟୀ ଥିବା ଅନ୍ୟ ବ୍ୟକ୍ତି ଖସିଯିବେ କ’ଣ ପାଇଁ ।
ସାରା ରାଜ୍ୟରେ ବିଦ୍ୟୁତ ବିଭାଗର ଅବହେଳା ହୁଏତ ଆଉ କାହାକୁ ଅଛପା ନାହିଁ । ଗଞ୍ଜାମରୁ ଗଜପତି ଏବଂ କେନ୍ଦ୍ରାପଡାରୁ କନ୍ଧମାଳ, ଯେଉଁଠି ଦେଖିବେ ସେହି ସମାନ ଚିତ୍ର । ମୁଣ୍ଡ ଉପରେ ଝୁଲୁଛି ମୃତ୍ୟୁର ଜାଲ । ଉଚ୍ଚ କ୍ଷମତା ସମ୍ପନ୍ନ ବିଦ୍ୟୁତ ତାର ଝୁଲି ରହି ମୃତ୍ୟୁକୁ ସତେ ଯେମିତି ଅପେକ୍ଷା କରିଛି । ରବିବାର ଯେଉଁ ଅଘଟଣ ଘଟିଗଲା, ତାହା ଆଉ କେବେ କେଉଁଠି ନଘଟୁ । ଆଉ ଯଦି ଘଟେ, ତେବେ ଏଥିପାଇଁ ଶକ୍ତି ବିଭାଗ ପୁଣି କାହାକୁ ଦାୟୀ କରିବ । ସାରା ରାଜ୍ୟରେ ଭୁଷୁଡି ପଡିଥିବା ବିଦ୍ୟୁତ ବ୍ୟବସ୍ଥା ନେଇ ଉତ୍ତର ରଖିବେ କି ଶକ୍ତି ମନ୍ତ୍ରୀ ଏବଂ ଶକ୍ତି ବିଭାଗ ଏବଂ ରାଜ୍ୟ ସରକାର ।