ତେଲେଙ୍ଗାନାରୁ ଗାଙ୍ଗଷ୍ଟର ହାଇଦର ଗିରଫ୍ : ଆଜି ହାଇଦରକୁ ଓଡିଶା ଆଣିପାରେ କମିଶନରେଟ୍ ପୁଲିସ
ଗତକାଲି ସଂଧ୍ୟାରେ ହାଇଦ୍ରାବାଦ ଉପକଣ୍ଠରୁ ତେଲେଙ୍ଗାନା ପୁଲିସର ସହାୟତାରେ ଧରିଲା କଟକ ପୁଲିସ
କନକ ବ୍ୟୁରୋ : ତେଲେଙ୍ଗାନାର ସଙ୍ଗାରେଡ୍ଡି ଜିଲ୍ଲାରୁ ସ୍ଥାନୀୟ ପୁଲିସ ସହାୟତାରେ ହାଇଦରକୁ ଗିରଫ କରାଯାଇଛି ବୋଲି କହିଛନ୍ତି ପୁଲିସ କମିସନର । ଖୁବଶୀଘ୍ର ହାଇଦରକୁ ଓଡିଶା ଅଣାଯିବ । ତେଲେଙ୍ଗାନା ପୁଲିସ ସହାୟତାରେ କମିଶନରେଟ ପୁଲିସ ଗୁରୁବାର ସନ୍ଧ୍ୟାରେ ହାଇଦରକୁ କାବୁ କରିଛି । ମୋଟର ସାଇକେଲରେ ସେ ଯାଉଥିବା ବେଳେ ପୁଲିସ ତାକୁ ପିଛା କରିଥିଲା । ଶେଷରେ ହାଇଦରକୁ କାବୁ କରିବାରେ ସଫଳ ହୋଇଥିଲା ପୁଳିସ ।
Kanak News is now on WhatsApp
Join and get latest news updates delivered to you via WhatsApp
ଏହି ଦୁର୍ଦ୍ଦାନ୍ତ ଅପରାଧୀକୁ ଧରିବାରେ ହାଇଦ୍ରାବାଦ ସିଟି ପୁଲିସର ଟାସ୍କଫୋର୍ସ ସମେତ ତେଲେଙ୍ଗାନାର କିଛି ପୁଲିସ ଟିମ୍ ସହାୟତା କରିଥିଲେ । ହାଇଦର ଗତ ୧୦ ତାରିଖରେ କଟକ ଏସସିବିରୁ ଫେରାର ହେବା ପରେ ତାର ଗତିବିଧି ଉପରେ କଡା ନଜର ରଖାଯାଇଥିଲା । ତାକୁ ଧରିବା ପାଇଁ କଟକ ସିଟି ପୁଲିସର ଦୁଇଟି ଟିମ ତେଲେଙ୍ଗାନା ଯାଇଥିଲା । ଧରାପଡିବା ପରେ କଟକ ପୁଲିସ ହାଇଦରକୁ ଚିହ୍ନଟ କରିଛି ବୋଲି ପୁଲିସ କମିଶନର କହିଛନ୍ତି ।
ମାର୍ଚ୍ଚ ୨୩ ତାରିଖରେ ସମ୍ବଲପୁରର ୬ ଜଣ ସୁରକ୍ଷା କର୍ମୀଙ୍କ ହେପାଜତରେ ହାଇଦରକୁ ଚିକିତ୍ସା ପାଇଁ କଟକ ନିଆଯାଇଥିଲା । କଟକ ମେଡିକାଲରେ ଥିବାବେଳେ ୧୦ ତାରିଖରେ ସୁରକ୍ଷା କର୍ମୀଙ୍କୁ ଅଚେତ କରି ସେ ଫେରାର ହୋଇଯାଇଥିଲା । ଏହା ପରେ ହାଇଦରର ସହଯୋଗୀ ୟାକୁବକୁ ଗିରଫ କରିଥିଲା କମିଶନରେଟ ପୁଲିସ । ଗୁରୁବାର ହାଇଦର ଗିରଫ କରିଛି ପୁଲିସ । ଓଡିଶାକୁ ଆଣିବା ପରେ ତାକୁ ପଚରା ଉଚରା କରାଯିବ । ସେ କେମିତି ଫେରାର ହେଲା , କେଉଁ ବାଟ ଦେଇ ସେ ତେଲେଙ୍ଗାନା ଯାଇଥିଲା, ତାଙ୍କୁ ଏଥିରେ କିଏ ସହାୟତା କରିଥିଲା ସେ ନେଇ ଜେରା କରାଯିବ ।
ଆଜି ହାଇଦରକୁ ଓଡିଶା ଆଣିପାରେ କମିଶନରେଟ୍ ପୁଲିସ । ସେପଟେ କମିଶନରେଟ ପୁଲିସକୁ ପ୍ରଶଂସା କରିଛନ୍ତି ପୁଲିସ ମହାନିର୍ଦ୍ଦେଶକ । ପୁଲିସ କମିଶନର ଓ କଟକ ଡିସିପିଙ୍କ ନେତୃତ୍ୱରେ ଯେଉଁଭଳି ଢଙ୍ଗରେ ହାଇଦ୍ରାବାଦରୁ କୁଖ୍ୟାତ୍ ଫେରାର ଅପରାଧୀ ହାଇଦରକୁ ଗିରଫ କରାଗଲା, ତାହା ପ୍ରଶଂସନୀୟ ବୋଲି ଟ୍ୱିଟ୍ କରିଛନ୍ତି ଡିଜିପି ଅଭୟ ।
ସୂଚନାଯୋଗ୍ୟ ଯେ କଟକ ବଡ଼ ମେଡିକାଲ୍ର କ୍ୟାବିନ୍ ନ˚ ୫ରୁ ଗଲା ୧୦ ତାରିଖ ଅପରାହ୍ନରେ ଫେରାର ହୋଇ ଯାଇଥିଲା ହାଇଦର । ହାଇଦର୍ର ମଝିଆ ପୁଅ ଏକ ବାଇକ୍ରେ ତାକୁ ଖୋର୍ଦ୍ଧା ନେଇଥିଲା । ଖୋର୍ଦ୍ଧାରୁ ଏକ କାର୍ରେ ହାଇଦର୍ ସହିତ ମଝିଆ ପୁଅ ଆଜାରୁଦ୍ଦିନ ଓ ତା’ର ୩ରୁ ୪ ଜଣ ସାଙ୍ଗ, ଆଜାରୁଦ୍ଦିନ୍ର ସହଯୋଗୀ କାଳିଆ ସାମିଲ ହୋଇଥିଲେ । ହାଇଦର୍ କଟକ ମେଡିକାଲରୁ ଯେଉଁ ବାଇକ୍ରେ ଫେରାର୍ ହୋଇଯାଇଥିଲା, ସେହି ବାଇକ୍କୁ ତାକୁ କାର୍ ପଛରେ ଚଲାଇ ଚଲାଇ ଯାଇଥିଲା ତା’ ଜ୍ବାଇଁ । ତେଲେଙ୍ଗାନାରେ ପହଞ୍ଚିବା ପୂର୍ବରୁ ପୁଣି ବାଇକ୍ରେ ଯାଇଥିଲା ହାଇଦର ।
ଶେଷରେ ୧୧ ତାରିଖ ଦିନ ହାଇଦର୍ ତେଲେଙ୍ଗାନାର ସାଙ୍ଗାରେଡ୍ଡି ଜିଲ୍ଲାରେ ପହଞ୍ଚିଥିଲା । ସାଙ୍ଗାରେଡ୍ଡି ଜିଲ୍ଲାରେ ହାଇଦର୍ ବାଇକ୍ରେ ଯାଉଥିବା ବେଳେ ତାକୁ ପିଛା କରିଥିବା କଟକ କମିସନରେଟ୍ ପୁଲିସର ଏକି ଟିମ୍ କାବୁ କରି ନେଇଥିଲା । କିନ୍ତୁ ହାଇଦର୍ ସହିତ ଥିବା ମଝିଆ ପୁଅ ଆଜାରୁଦ୍ଦିନ, ସାନ ପୁଅ ସେକ୍ ଚୁନ୍ନେଇ, ଭାଇ କାଳିଆ, ପୁତୁରା କାଲା, ଶଳା ଗୋରା, ସାନ ଜ୍ବାଇଁ ଓ ଆଜାରୁଦ୍ଦିନର ସହଯୋଗୀ କାଳିଆ ଫେରାର ହୋଇଯାଇଛନ୍ତି । ପୁଲିସର ଆଉ ଏକ ଟିମ୍ ସେମାନଙ୍କ ପିଛା କରିଥିବା ସୂଚନା ମିଳିଛି। ହାଇଦର୍କୁ କମିସନରେଟ୍ ପୁଲିସ ଟ୍ରାନ୍ଜିଟ୍ ରିମାଣ୍ତରେ କଟକ ଆଣୁଛି ।
ହାଇଦର ଫେରାର ହେବାର ପ୍ରାୟ ଅଢେଇ ଘଣ୍ଟା ପରେ ପୋଲିସ ଖବର ପାଇଥିଲା । ଯେଉଁଥିପାଇଁ ହାଇଦର ନିରାପଦରେ ଢେର ବାଟ ଯାଏ ଚାଲିଯାଇଥିଲା । ତାକୁ ଧରିବା ପାଇଁ କମିସନରେଟ୍ ପୁଲିସର ୫ଟି ଟିମ୍ ଗଠନ ହୋଇଥିଲା। ପୁଲିସ ପ୍ରଥମେ ହାଇଦର୍ ଓ ତା’ ପରିବାର ସଦସ୍ୟଙ୍କ ମୋବାଇଲ୍ ଫୋନ୍ ଓ ଏଟିଏମ୍ କାର୍ଡ ଟ୍ରାକ୍ କରିଥିଲା । ବଡ଼ ମେଡିକାଲ୍ରୁ ଆରମ୍ଭ କରି କଟକ ସହରର ସମସ୍ତ ପ୍ରସ୍ଥାନ ପଥରେ ଲାଗିଥିବା ସିସି କ୍ୟାମେରା ଫୁଟେଜ୍ ପୁଲିସ ଜବତ କରିଥିଲା। ସିସି କ୍ୟାମେରା ଫୁଟେଜ୍ ଓ ୟାକୁବ୍ର ବୟାନ ଆଧାରରେ ପୁଲିସ ତେଲେଙ୍ଗାନାରେ ପହଞ୍ଚିଥିଲା ।