ଗଙ୍ଗାଧର ମେହେର ବିଶ୍ୱବିଦ୍ୟାଳୟରେ ଅଭିନବ ପଦକ୍ଷେପ: କଲେଜରେ ଖୋଲିବ ୨୪ ଘଣ୍ଟିଆ ଲାଇବ୍ରେରୀ; ଫ୍ରି ସମୟରେ କାମ କରି ପାଉଣା ପାଇବେ ଛାତ୍ରଛାତ୍ରୀ
କନକ ବ୍ୟୁରୋ: ସମ୍ବଲପୁର ଜିଏମ୍ ବିଶ୍ୱବିଦ୍ୟାଳୟ ପାଠ ପଢୁଥିବା ଛାତ୍ରଛାତ୍ରୀଙ୍କ ପାଇଁ ଆସିଛି ଖୁସି ଖବର । ପାଠ ପଢା ସାଙ୍ଗକୁ କିଛି କଲେଜ ଲାଇବ୍ରେରୀରେ କାମ କରି କିଛି ଅର୍ଥ ରୋଜଗାର କରିପାରିବେ ଛାତ୍ରଛାତ୍ରୀ । ଆଜିଠାରୁ ଆରମ୍ଭ ହୋଇଛି ଜିଏମ ବିଶ୍ୱ ବିଦ୍ୟାଳୟର ଏକ ଅଭିନବ ପଦକ୍ଷେପ ।
Kanak News is now on WhatsApp
Join and get latest news updates delivered to you via WhatsApp
ଗଙ୍ଗାଧର ମେହେର ବିଶ୍ୱବିଦ୍ୟାଳୟ ନାଁକୁ ନେଇ ଯେତିକି ଗର୍ବିତ ପ୍ରଶାସନିକ ସ୍ତରରେ ବିଭିନ୍ନ ପଦକ୍ଷେପକୁ ନେଇ ସେତିକି ଚର୍ଚ୍ଚିତ । ବିଶ୍ୱବିଦ୍ୟାଳୟ ପଢୁଥିବା ଛାତ୍ରଛାତ୍ରୀମାନେ ପାଠ ପଢିବା ସହିତ ଦୁଇ ପଇସା ରୋଜଗାର କରିପାରିବେ । ଯୋଜନା ଅନୁସାରେ ବିଶ୍ୱବିଦ୍ୟାଳୟରେ ୨୪ ଘଂଟିଆ ଲାଇବ୍ରେରୀ ଖୋଲା ହେବ । ଏଠାରେ ଛାତ୍ରଛାତ୍ରୀଙ୍କୁ ନିୟୋଜିତ କରାଯିବ । କେବଳ ଅଫିସ ସମୟରେ କର୍ମଚାରୀମାନେ କାମ କରୁଥିବା ବେଳେ ବାକି ସମୟରେ ଛାତ୍ରଛାତ୍ରୀମାନେ ନିୟୋଜିତ ହେବେ । ଏଥିପାଇଁ ସେମାନଙ୍କୁ ପାରିଶ୍ରମିକ ପ୍ରଦାନ କରିବେ ଗଙ୍ଗାଧର ମେହେର ବିଶ୍ୱବିଦ୍ୟାଳୟ କର୍ତ୍ତୃପକ୍ଷ ।
ଏହି ଯୋଜନାରେ ଲାଇବ୍ରେରୀ ସାଇନ୍ସ ପଢୁଥିବା ଛାତ୍ରଛାତ୍ରୀଙ୍କୁ ଅଗ୍ରାଧିକାର ଦିଆଯିବ । କାରଣ ସେମାନଙ୍କ ପାଠପଢା ସହ ପ୍ରାକ୍ଟିକାଲ ହୋଇପାରିବ । କିନ୍ତୁ ଅନ୍ୟ ଛାତ୍ରଛାତ୍ରୀମାନେ ଆବେଦନ କଲେ ସେମାନଙ୍କୁ ସୁଯୋଗ ମିଳିବ । ଛାତ୍ରଛାତ୍ରୀମାନେ ସକାଳେ ଓ ରାତିରେ କିଛି କିଛି ସମୟ ଲାଇବ୍ରେରୀ କାର୍ଯ୍ୟରେ ଯୋଗଦେବେ । କୂଳପତିଙ୍କ କହିବା ଅନୁସାରେ, ଏହା କୌଣସି ସ୍ଥାୟୀ ନିଯୁକ୍ତି ନୁହେଁ । କିନ୍ତୁ ଏହି ପଦକ୍ଷେପ ଲାଇବ୍ରେରୀ ପ୍ରତି ଛାତ୍ରଛାତ୍ରୀଙ୍କ କର୍ତ୍ତବ୍ୟ ଓ ପାଠପଢା ପ୍ରତି ଆଗ୍ରହ ବଢାଇବ । ଖୁବଶୀଘ୍ର ଏନେଇ ବିଜ୍ଞପ୍ତି ଜାରି କରିବା ସହ ଛାତ୍ରଛାତ୍ରୀଙ୍କ ଆବେଦନ ପତ୍ର ଗ୍ରହଣ କରାଯିବ ।