ଲିଫ୍ଟ ଦେବା ବାହାନାରେ କଲେଜ ଛାତ୍ରୀଙ୍କୁ ଗଣଦୁଷ୍କର୍ମ କଲେ ସହପାଠୀ । ଥାନାରେ ଅଭିଯୋଗ ପରେ ୪ ଅଭିଯୁକ୍ତଙ୍କୁ ଗିରଫ କଲା ପୋଲିସ ।
କନକ ବ୍ୟୁରୋ : ସୁନ୍ଦରଗଡରୁ ପୁଣି ଆସିଛି ସମ୍ବେଦନଶୀଳ ଘଟଣା । କଲେଜ ଛାତ୍ରୀଙ୍କୁ ଲିଫ୍ଟ ଦେବା ବାହାନାରେ ଜଙ୍ଗଲକୁ ଜୋର ଜବରଦସ୍ତି ନେଇ ଗଣଦୁଷ୍କର୍ମ କରାଯାଇଥିବା ଅଭିଯୋଗ ହୋଇଛି । ଆଉ ସବୁଠୁ ବଡ କଥା ହେଉଛି ଗଣଦୁଷ୍କର୍ମ କରିଥିବା ଅଭିଯୁକ୍ତଙ୍କ ମଧ୍ୟରେ ଛାତ୍ରୀଙ୍କର ସହପାଠୀ ରହିଛନ୍ତି । ଆଉ ଏଭଳି ଘଟଣା ପୂରା ଅଞ୍ଚଳରେ ଚାଞ୍ଚଲ୍ୟ ଖେଳାଇ ଦେଇଛି । ଅଭିଯୋଗ ପରେ ପୋଲିସ ୪ ଜଣ ଅଭିଯୁକ୍ତଙ୍କୁ ଗିରଫ କରିଛି ।
Kanak News is now on WhatsApp
Join and get latest news updates delivered to you via WhatsApp
ଛାତ୍ରୀଙ୍କର ଅଭିଯୋଗ ଅନୁଯାୟୀ, ଗତ ଜୁନ୍ ମାସ ୨୬ ତାରିଖରେ କଲେଜ ଯିବା ପାଇଁ ସୁନ୍ଦରଗଡଠାରେ ଛାତ୍ରୀ ଜଣକ ଛିଡା ହୋଇଥିବା ସମୟରେ ଦୁଇ ଜଣ ସହପାଠୀ ବାଇକରେ ଆସି କଲେଜରେ ଛାଡି ଦେବା ପାଇଁ କହିଥିଲେ । ଛାତ୍ରୀ ଜଣକ ରାଜି ହେବା ପରେ ତାଙ୍କୁ ବାଇକରେ ବସାଇ ନେଇଥିଲେ ସହପାଠୀ । ତେବେ ଅଧବାଟରେ କିଞ୍ଜିରକେଲା ଥାନା ପୁଟୁଡିହି ଜଙ୍ଗଲକୁ ଜୋର ଜବରଦସ୍ତି ଛାତ୍ରୀ ଜଣଙ୍କୁ ନେଇ ଯାଇଥିଲେ ସହପାଠୀ । ପରେ ତାଙ୍କର ଆଉ ଦୁଇ ସହପାଠୀ ଘଟଣାସ୍ଥଳରେ ପହଞ୍ଚି ଛାତ୍ରୀ ଜଣଙ୍କୁ ଜୋରଜବରଦସ୍ତ ଦୁଷ୍କର୍ମ କରିଥିଲେ ।
ଦୁଷ୍କର୍ମ କରିବା ପରେ ଛାତ୍ରୀ ଜଣଙ୍କୁ ସେଠାରୁ ଛାଡି ପଳାଇ ଯାଇଥିଲେ ଅଭିଯୁକ୍ତ । ଆଉ ଏହି କଥାକୁ ପ୍ରଘଟ ନ କରିବାକୁ ଧମକ ମଧ୍ୟ ଦେଇଥିଲେ । ଆଉ ସେହି ଭୟ ଓ ଲୋକଲଜ୍ଜାକୁ ଡରି ଛାତ୍ରୀ ଜଣକ କାହାକୁ କିଛି କହି କହିନଥିଲେ । କିନ୍ତୁ ଦୁଷ୍କର୍ମ ପରେ ଛାତ୍ରୀ ଜଣକ କଲେଜ ଯିବା ଏକପ୍ରକାର ବନ୍ଦ କରିଦେବା ସହ ଚୁପଚାପ ରହୁଥିଲେ । ତେବେ ଛାତ୍ରୀ ଜଣକ ଏଭଳି ଆଚରଣ ଦେଖି ପରିବାର ଲୋକ ସନ୍ଦେହ କରିବା ପରେ ପୂରା ଘଟଣା ପଦାକୁ ଆସିଥିଲା । ପରେ ସୁନ୍ଦରଗଡ ଥାନାରେ ଏନେଇ ଛାତ୍ରୀ ଜଣକ ଲିଖିତ ଅଭିଯୋଗ କରିବା ପରେ ପୋଲିସ ୪ ଜଣଙ୍କୁ ଗିରଫ କରିଛି । ଆଉ ଏହାସହ ଦୁଷ୍କର୍ମରେ ବ୍ୟବହାର ହୋଇଥିବା ବାଇକକୁ ମଧ୍ୟ ଜବତ କରିଛି ।