ରାଜନୀତି ପାଇଁ ଗାନ୍ଧୀ ଆଦର୍ଶ : ବିଜେଡି ଆରମ୍ଭ କଲା ଜନ ସମ୍ପର୍କ ପଦଯାତ୍ରା; ଘରେ ଘରେ କଂଗ୍ରେସ କାର୍ଯ୍ୟକ୍ରମ, ବିଜେପିର ମୋ ମାଟି ମୋ ଦେଶ ଅଭିଯାନ

କନକ ବ୍ୟୁରୋ : ମହାତ୍ମା ଗାନ୍ଧୀଙ୍କ ଆଦର୍ଶକୁ ନେଇ ତେଜୁଛି ରାଜନୀତି । ଗାନ୍ଧୀ ଜୟନ୍ତୀ ଅବସରରେ ବିଜେଡି ଆରମ୍ଭ କରିଛି ଜନସମ୍ପର୍କ ପଦଯାତ୍ରା । ବିଜେଡି ସ୍ରୁପ୍ରିମୋ ନବୀନ ପଟ୍ଟନାୟକ ଭୁବନେଶ୍ୱର ବଡଗଡ଼ କଳିଙ୍ଗ ବିଜୁ ଆଦର୍ଶ କଲୋନିରେ ପଦଯାତ୍ରା ଆରମ୍ଭ କରିଛନ୍ତି । ଡିସେମ୍ବର ୨୬ ତାରିଖ ଯାଏ ଚାଲିବାକୁ ଥିବା ଏହି ପଦଯାତ୍ରା ଓଡ଼ିଶାର ୧୪୭ ନିର୍ବାଚନ ମଣ୍ଡଳୀରେ ହେବ । ଏହି କାର୍ଯ୍ୟକ୍ରମ ଜରିଆରେ ରକ୍ତଦାନ, ବୃକ୍ଷରୋପଣ ସମେତ ବିଭିନ୍ନ କାର୍ଯ୍ୟକ୍ରମ କରିବାକୁ ଯୋଜନା ରଖିଛି ବିଜୁ ଜନତା ଦଳ ।

ସେପଟେ ଘରେ ଘରେ କଂଗ୍ରେସ, ଘରେ ଘରେ ହାତ କାର୍ଯ୍ୟକ୍ରମ ଜରିଆରେ ଲୋକଙ୍କ ପାଖରେ ପହଂଚିବାକୁ ଯୋଜନା ରଖିଛି କଂଗ୍ରେସ । ଆଜି ଦଳ ପକ୍ଷରୁ ଭୁବନେଶ୍ୱର ମଧ୍ୟମ ନିର୍ବାଚନ ମଣ୍ଡଳୀର କାଳୀ ମନ୍ଦିର ପାଖରୁ କାର୍ଯ୍ୟକ୍ରମ ଆରମ୍ଭ କରାଯାଇଛି । ଏଥିରେ ପ୍ରଦେଶ କଂଗ୍ରେସ ସଭାପତି, ପୂର୍ବତନ ପିସିସ ସଭାପତି, ଭୁବନେଶ୍ୱର ଜିଲ୍ଲା କଂଗ୍ରେସ ସଭାପତିଙ୍କ ସମେତ ଦଳର ବହୁ ବରିଷ୍ଠ ନେତା ଓ କର୍ମୀ ସାମିଲ ହୋଇଛନ୍ତି । ମହାତ୍ମା ଗାନ୍ଧୀଙ୍କ ନୀତି ଆଦର୍ଶ ଲୋକଙ୍କ ପାଖରେ ପହଂଚାଇବା ପାଇଁ ଏହି କାର୍ଯ୍ୟକ୍ରମ କରାଯାଉଛି । ଏସବୁ ଭିତରେ ଭାରତୀୟ ଜନତା ପାର୍ଟି ମଧ୍ୟ ମହାପୁରୁଷଙ୍କ ଜନ୍ମମାଟିରୁ ମାଟି ସଂଗ୍ରହ ଅଭିଯାନ ଜାରି ରଖିଛି । ଗାନ୍ଧୀ ଜୟନ୍ତୀ ଅବସରରେ ଏହି କାର୍ଯ୍ୟକ୍ରମକୁ ଆହୁରି ତ୍ୱରାନିତ କରୁଛି ବିଜେପି ।

ଗାନ୍ଧୀ ଜୟନ୍ତୀ ଅବସରରେ ବିଜେଡି ଆରମ୍ଭ କରିଥିବା ଜନସମ୍ପର୍କ ପଦଯାତ୍ରା ଡିସେମ୍ବର ୨୬ ତାରିଖ ଯାଏ ଚାଲିବ । ଏହାରି ଭିତରେ ଅକ୍ଟୋବର ୯ ତାରିଖରେ ଉତ୍କଳମଣି ଗୋପବନ୍ଧୁ ଦାସଙ୍କ ଜୟନ୍ତୀ, ଅକ୍ଟୋବର ୧୧ରେ ଜୟପ୍ରକାଶ ନାୟକ ଜୟନ୍ତୀ ପାଳନ କରାଯିବ । ଡିସେମ୍ବର ୨୬ରେ ବିଜେଡି ଦଳ ପ୍ରତିଷ୍ଠାକୁ ୨୬ ବର୍ଷ ପୁରୁଥିବାରୁ କାର୍ଯ୍ୟକ୍ରମକୁ ବ୍ୟାପକ କରିବାକୁ ଯୋଜନା ରଖିଛି ଦଳ । ଏହି ଅବସରରେ ପ୍ରତି ନିର୍ବାଚନ ମଣ୍ଡଳୀରେ ପଦଯାତ୍ରା ଓ ପ୍ରଶିକ୍ଷକ କାର୍ଯ୍ୟକ୍ରମ କରାଯିବ । ପ୍ରତ ୱାର୍ଡରେ ପହଂଚି ବିଜେଡି ସରକାରର ସଫଳତା ସମ୍ପର୍କରେ ଲୋକଙ୍କୁ ସୂଚନା ଦେବ ବିଜୁ ଜନତା ଦଳ ।

ଏପଟେ କଂଗ୍ରେସ ଦଳ ପଦଯାତ୍ରା ଜରିଆରେ ଘରେ ଘରେ କଂଗ୍ରେସ ଘରେ ଘରେ ହାତ କାର୍ଯ୍ୟକ୍ରମକୁ ବ୍ୟାପକ କରିଛି । ଭୁବନେଶ୍ୱରରେ ଆଜି ପଦଯାତ୍ରା ଜରିଆରେ ଗାନ୍ଧୀ ଆଦର୍ଶର କଥା କହିଛି ଦଳ । ଏଥିରେ ପ୍ରଦେଶ କଂଗ୍ରେସ ସଭାପତି, ପୂର୍ବତନ ପିସିସ ସଭାପତି, ଭୁବନେଶ୍ୱର ଜିଲ୍ଲା କଂଗ୍ରେସ ସଭାପତିଙ୍କ ସମେତ ଦଳର ବହୁ ବରିଷ୍ଠ ନେତା ଓ କର୍ମୀ ସାମିଲ ହୋଇଛନ୍ତି ।

ଗାନ୍ଧୀ ଜୟନ୍ତୀର ଅବସରକୁ ହାତଛଡା କରିବାକୁ ଚାହିଁନି ଭାରତୀୟ ଜନତା ପାର୍ଟି । ମୋ ମାଟି ମୋ ଦେଶ କାର୍ଯ୍ୟକ୍ରମକୁ ବ୍ୟାପକ କରିଛି ବିଜେପି । ଏହି କାର୍ଯ୍ୟକ୍ରମ ଜରିଆରେ ମହାପୁରୁଷ ଏବଂ ସହୀଦ ଯବାନଙ୍କ ଜନ୍ମମାଟିରୁ ମାଟି ସଂଗ୍ରହ କରି ଦେଶଭକ୍ତିର ଭାବନା ଜାଗ୍ରତ କରିବାକୁ ଦଳ ଉଦ୍ୟମ କରୁଛି ।