ଏସିଆ କପ୍ ଚାମ୍ପିୟନ ହେଲା ଶ୍ରୀଲଙ୍କା, ପଡିଆ ମଝିରେ ପତାକା ଉଡାଇଲେ ପୂର୍ବତନ ଭାରତୀୟ କ୍ରିକେଟର । ଗମ୍ଭୀର କହିଲେ, ସୁପରଷ୍ଟାର ଟିମ୍ ।
କନକ ବ୍ୟୁରୋ : ଏସିଆ କପର ଫାଇନାଲ ମ୍ୟାଚରେ ପାକିସ୍ତାନକୁ ୨୩ ରନରେ ମାତ୍ ଦେଇ ଚାମ୍ପିୟନ ହୋଇଛି ଶ୍ରୀଲଙ୍କା । ଏହାସହ ୬ଥର ଏସିଆ କପ ନିଜ ନାଁରେ କରିଛି ଶ୍ରୀଲଙ୍କା । ଏସିଆ କପର ଚାମ୍ପିୟନ ହେବା ପରେ ଟିମର ଖେଳାଳୀ ସେଲିବ୍ରେସନ କରିଛନ୍ତି ।ଯାହାର ଭିଡ଼ିଓ ସୋସିଆଲ ମିଡ଼ିଆରେ ଭାଇରାଲ ହୋଇଛି । ଶ୍ରୀଲଙ୍କା ବିଜୟରେ କେବଳ ଶ୍ରୀଲଙ୍କାବାସୀ ନୁହଁନ୍ତି ବରଂ ଅନ୍ୟ ଦେଶରେ ମଧ୍ୟ ସେଲିବ୍ରେସନ ଦେଖିବାକୁ ମିଳିଛି । ଏପରିକି ପୂର୍ବତନ ଭାରତୀୟ କ୍ରିକେଟର ଗୌତମ ଗମ୍ଭୀର ମଧ୍ୟ ଏହି ସେଲିବ୍ରେସନରେ ନିଜକୁ ସାମିଲ କରିଛନ୍ତି । ଦୁବାଇ ଗ୍ରାଉଣ୍ଡରେ ଗମ୍ଭୀର ଏମିତି କିଛି କରିଛନ୍ତି ଯାହା ବେଶ ଭାଇରାଲ ହେବାରେ ଲାଗିଛି ।
ଫାଇନାଲ ମ୍ୟାଚ୍ ପରେ ଗମ୍ଭୀର ନିଜ ଟ୍ୱିଟର ଆକାଉଣ୍ଟରେ ଏକ ଭିଡ଼ିଓ ପୋଷ୍ଟ କରିଥିଲେ, ଯେଉଁଥିରେ ଶ୍ରୀଲଙ୍କା ଚାମ୍ପିୟନ ହେବା ପରେ ଗମ୍ଭୀର ଶ୍ରୀଲଙ୍କାର ପତାକା ଧରିଥିବାର ଦେଖିବାକୁ ମିଳିଥିଲା । ଆଉ ଏହି ଭିଡ଼ିଓ ପୋଷ୍ଟ କରିବା ସହ ଗମ୍ଭୀର ଲେଖିଥିଲେ ସୁପରଷ୍ଟାର ଟିମ୍, ସତରେ ଏଥିପାଇଁ ତୁମେ ହକଦାର । ଆଉ ଗମ୍ଭୀରଙ୍କ ଏହି ଭିଡ଼ିଓକୁ କ୍ରିକେଟପ୍ରେମୀ ଖାସକରି ଶ୍ରୀଲଙ୍କାବାସୀ ବେଶ ପସନ୍ଦ କରିଛନ୍ତି । ଶ୍ରୀଲଙ୍କାର ବିଜୟରେ ଜଣେ ପୂର୍ବତନ କ୍ରିକେଟର ଭାବେ ଗମ୍ଭୀର ଯେଉଁ ସମ୍ମାନ ଦେଖାଇଛନ୍ତି ତାହା ଶ୍ରୀଲଙ୍କାବାସୀଙ୍କ ମନ ଜିଣିନେଇଛି ।
Superstar team…Truly deserving!! #CongratsSriLanka pic.twitter.com/mVshOmhzhe
— Gautam Gambhir (@GautamGambhir) September 11, 2022
ଏସିଆ କପର ଫାଇନାଲ ମୁକାବିଲାରେ ଟସ୍ ହାରି ପ୍ରଥମେ ବ୍ୟାଟିଂ କରିଥିବା ଶ୍ରୀଲଙ୍କା ପ୍ରଥମରୁ ନିୟମିତ ବ୍ୟବଧାନରେ ୱିକେଟ ହରାଇ ସଙ୍କଟଜନକ ସ୍ଥିତିରେ ପଡିଥିଲା । ତେବେ ହସରଙ୍ଗା ଓ ରାଜପକ୍ଷେ ଧୈର୍ଯ୍ୟପୂର୍ଣ୍ଣ ବ୍ୟାଟିଂ କରି ପାକିସ୍ତାନ ସାମ୍ନାରେ ୧୭୧ ରନର ବିଜୟଲକ୍ଷ୍ୟ ରଖିଥିଲେ । ଜବାବରେ ପ୍ରାରମ୍ଭିକ ବ୍ୟାଟିଂ ବିପର୍ଯ୍ୟୟ ସତ୍ତେ୍ୱ ମଧ୍ୟ ଲଢେଇ କରିଥିଲା ପାକିସ୍ତାନ । ତେବେ ରିଜୱାନ ଓ ଇଫତିକାରଙ୍କ ୱିକେଟ ପତନ ପରେ ପାକିସ୍ତାନ ବିଜୟ ପାଇଁ ସଂଘର୍ଷ କରିଥିଲା । ୨୦ ଓଭରରେ ସମସ୍ତ ୱିକେଟ ହରାଇ ମାତ୍ର ୧୪୭ ରନ କରିବାକୁ ସକ୍ଷମ ହୋଇଥିଲା ପାକିସ୍ତାନ । ଏହାସହ ୨୩ ରନରେ ଦଳ ପରାଜିତ ହୋଇଥିଲା ।