କନକ ବ୍ୟୁରୋ : ପର୍ଯ୍ୟଟକଙ୍କୁ ଆକୃଷ୍ଟ କରୁଛି ଗଜପତିର ବୌଦ୍ଧ ମନ୍ଦିର । ଦକ୍ଷିଣ ଏସିଆର ସବୁଠୁ ବଡ଼ ବୌଦ୍ଧ ମନ୍ଦିର କୁହାଯାଉଥିବା ଏହି ମନ୍ଦିରରେ ଜମୁଛି ଲୋକଙ୍କ ଭିଡ । ମନ୍ଦିରରେ ଥିବା ବୁଦ୍ଧଙ୍କ ୭୨ ଫୁଟର ପ୍ରତିମା ସାଙ୍ଗକୁ ପାହାଡ ପର୍ବତ ଭରା ପରିବେଶ ଲୋକଙ୍କୁ ଆକର୍ଷିତ କରୁଛି । ୨୦୧୦ରେ ବୌଦ୍ଧ ଗୁରୁ ଦଲାଇଲାମା ଏହାକୁ ପ୍ରତିଷ୍ଠା କରିଥିଲେ ।

Advertisment

ଗଜପତି ଜିଲ୍ଲାରେ ଅଛି ଦକ୍ଷିଣ ଏସିଆର ସବୁଠୁ ବଡ ବୌଦ୍ଧ ମନ୍ଦିର । ବିଶ୍ୱାସ ହେଉନଥିଲେ ମଧ୍ୟ ଏହା ସତ୍ୟ । ଗଜପତି ଜିଲ୍ଲା ଚନ୍ଦ୍ରଗିରିରେ ନିର୍ମାଣ ହେଇଛି ଏହି ବୌଦ୍ଧ ମନ୍ଦିର । ଯାହା ଏବେ ଜିଲ୍ଲାର ପ୍ରମୁଖ ପର୍ଯ୍ୟଟନସ୍ଥଳୀ ପାଲଟିଛି । ପାହାଡ ପର୍ବତ ଘେରା ଏଠାକାର ଶାନ୍ତ ପରିବେଶ ରାଜ୍ୟ ଏବଂ ରାଜ୍ୟ ବାହାର ପର୍ଯ୍ୟଟକଙ୍କୁ ମଧ୍ୟ ଆକୃଷ୍ଟ କରିଛି । ୭୨ ଫୁଟ ଉଚ୍ଚତାର ଏହି ମନ୍ଦିରର ଶୋଭା ବଢାଉଛି ଏଠାରେ ଥିବା ବିଶାଳ ଜଳାଶ୍ରୟ । ମନ୍ଦିରରୁ ୬ କିମି ଦୂରରେ ଖସଡ଼ା ଜଳପ୍ରପାତ ରହୁୂଥିବାରୁ ଏହା ପର୍ଯ୍ୟଟଙ୍କ ପେଣ୍ଠସ୍ଥଳୀ ପାଲଟିଛି ।

୧୯୫୦ ମସିହା ପରେ ଯେତେବେଳେ ଚୀନ୍ ତିବ୍ଦତ ଦେଶକୁ ଆକ୍ରମଣ କରିଥିଲା । ଚୀନର ଅତ୍ୟାଚାର ସହି ନ ପାରି ସେଠାରୁ କିଛି ତିବ୍ଦତୀୟ ଭାରତ ପଳାଇ ଆସିଥିଲେ । ଭାରତ ସରକାର ସେମାନଙ୍କୁ ଶରଣାର୍ଥୀ ଭାବେ ଗଜପତି ଜିଲ୍ଲାର ଚନ୍ଦ୍ରଗିରି ଅଂଚଳରେ ରହିବା ପାଇଁ ଜମି ଦେଇଥିଲେ । ସେମାନେ ସେଠାରେ ପ୍ରଥମେ ଏକ ଛୋଟ ବୌଦ୍ଧ ମନ୍ଦିର କରି ପୂଜାର୍ଚ୍ଚନା କରୁଥିଲେ । ସମୟ କ୍ରମେ ୨୦୦୩ରେ ଏହି ମନ୍ଦିର କାର୍ଯ୍ୟ ଆରମ୍ଭ ହୋଇ ୨୦୦୮ରେ ଶେଷ ହୋଇଥିଲା । ୫ କୋଟି ଟଙ୍କା ବ୍ୟୟରେ ନିର୍ମାଣ ହୋଇଥିବା ଏହି ମନ୍ଦିରକୁ ୨୦୧୦ରେ ପ୍ରତିଷ୍ଠା କରିଥିଲେ ବୌଦ୍ଧ ଗୁରୁ ଦଲାଇଲାମା । ମନ୍ଦିର ନିର୍ମାଣ ପାଇଁ ଭୁଟାନ, ନେପାଳରୁ ଆସିଥିବା ପଥର ଖୁଂଟେଇ ଏବଂ ଚିତ୍ର ଶିଳ୍ପୀମାନେ ଅତି ସୁନ୍ଦର ଭାବେ ମନ୍ଦିର ନିର୍ମାଣ କରିଛନ୍ତି । ପର୍ଯ୍ୟଟକଙ୍କ ପେଣ୍ଠସ୍ଥଳୀ ପାଲଟିଥିବା ଏହି ମନ୍ଦିରର ବିକାଶ ପାଇଁ ସରକାର ଯଦି କିଛି ବିକାଶମୂଳକ କାର୍ଯ୍ୟ ହାତକୁ ନେବେ ତେବେ ଏହା ଜାତୀୟସ୍ତରରେ ମଧ୍ୟ ପରିଚିତ ହୋଇପାରିବ ।